EUROPE ZIN TITI


- Apuii Varte

Pathian khawngaihna zarah 2019 Ber thla chhung hian tour group ten inngeih tak leh hlim takin Europe ram pali  tlawh in kan zin ve a, heng zing a rilru khawih ta ber mai leh kan luanliam tawp theih loh ram chu ram mawi leh ralmuang a sawi thin naupan lai atanga tlawh ve chak a kan lo mangphan ve fo thin leh Poster ah te a ram thla lemte pawh kan lo thlir nin theih loh thin Switzerland ram hi a ni, a tak ngei a kan zuk hmu ve thei hi vannei kan inti haw ngawih ngawih mai a ni.

 

Kan ram ang a Kristian ram leh tlang ram annih ve tho vang te hian rilru a la bikin kan thlur bing bik lo thei lo bawk a ni , a ram mawi dan hi siam chawp ropui leh mawina nilo khuarel mawina (natural beauty) nei niin phul hring cham dup mai te, dil mawi tak tak te leh tlang mawi tak tak te, an ram hnim thleng a mawi, an in te pawh fel fai leh mawi tak a sak (cute leh cosy em em) awmna ram a nih angin khawilam hawi zawng  pawn hawi sual a awm thei tak tak lo a ni ber mai, khawi hmun mai pawh khu nun ti hahdam sawng sawng thei hmun hlir a ni ber mai e, fan hlan kan lo nghahhlelh em em thin ram kan han dai lut ta hlawl mai chu chauh leh hah lam pawh ngaihtuah phal lovin kan Camera te lek chungin kan te teng tung vek mai a ni.




A ram zau zawng hi Mizoram let vel lek 41,277 Sq kms, dil 1500 chuang awmna, Tlang, Lui leh Dil an ngah em avangin Land of Rivers and Lakes ti a an lo sawi thin, a ram thlai chin nan a hman tlak  chu 10.08% chauh a ni chungin an hausa in an intodelh hle a ni. Mihring pawh India ram khawpui pakhat Hyderabad ( 8.7 millions ) ai pawh a la tlem 8.6 millions (2019) chauh an ni, an currency hi Swiss Frank (CHF) niin kan pawisa pawh a inhlut hleih khawp mai,  CHF 1 leh 72 a intluk (kan zin hun lai ) Euro kan pekin an pawisa CHF min kir let tlat thin avangin ram dang ah a tangkai dawn siloh avangin hman zawh hram a ngai leh tho bawk!

Tlangram ve tho ni mahse inkalpawhna chi hrang hrang ( boruak bawlhlawh tichhuak lo chi an hmang nasa bawk )  an nei tha bik in Motor kawng pawh an nei tha, Solar energy hmang thei thlawhna nei ram awmchhun an la ni cheu bawk.

  

Keini 3rd World atanga zuk kal tan chuan kan pawisa a in hlut hleih em avang ten a hautak in thil man a to duh far far em a cham rei vak na chi pawh a ni lo 😄 Lunch vawi 1 ei man hi 1000 a chuang hrim hrim ang vel a ni, Souvenir ang chi Fridge magnet/Keychain mai mai pawh Europe hmun dang ah to ti tak a 3.5 Euro (1 Euro = 81)  a kan lei laiin SZL ah chuan CHF 7.5 hial te zu nia. Europe ah hian tui man a to hle bawk ( Beer aiin a to zawk !!)  Aizawl a 10 man 500ml hi 3 Euro ( 243 ) te a ni.

    

A ram hi a mawi em avangin film chan nan an hmang nasa a, Bollywood film lar tam tak te an channa hmun a nih vang ten Indian khualzin tam tak an neih phah vangin an lawm zia entir nan Bollywood Producer/Director lar Yash Chopra lim (statue) pawh an park mawi tak @ Interlaken ah pawh an lo dah hial a ni. An tlang lar tak pakhat khualzin tam tak te lawnna thin tho Mt Titlis chhip ah pawh Bollywood film lar tak  Dil Wale changtute Shah Rukh Khan leh Kajol te thla (lifesize photo)  pawh mawi takin an lo tar hial a ni.

 

Tourism hi an revenue sector pawimawh tak ni tawh in an ram tlawhtu pawh pung zelin mikhual pawh kum khat ah 18.4 million (2018) tling tawh in India leh China atang te in khualzin an tam zual.

Pawimawh na chi hrang tam tak an neih zingah an khawpui pakhat Geneva hi WHO Hqrs niin khawvel a Bank rintlak ber a ngaih chu Swiss Bank a ni bawk. An thil siam chhuah lar leh chhuanawm tak tak te chu -  Sana, Chocolates, Bawnghnute, Chemte leh adt te an ni.

He ram hi ram tha em em ang a lang lo tlang ram ve mai a nih vang nge  hman lai atang pawhin ram dang te pawn awp atana an it em em bik lem loh vangin an thenawm ram te angin run pawh an tawk ve mang lo ani awm e.

  

Tichuan he ram hi ram itawm lem lo tlang ram chheng chhe ve tak ni ve mai tur awm kha hmangchang hre takin tourism tih hmasawn nan an hmang ta hlauh thung khu an fing em em a ni. Khuanu duan ang a an ram mawina vawng him reng chung si a an tlangte miten harsa lo tak a an lawn a hun hlimawm tak an hman theih nan a an thawhrim rah te chu an tel mawlh mawlh ta mai a ni hlep hlir hlep hlir .

Khualzinte hiptu leh tih uar tak zinga thenkhat chu- Paragliding, Trekking, vur tleng leh tlangsang a lawn te an ni. 


 

An ram chhungah Europe khawmualpui a hmun sang ber Alps tlang chhip Top of Europe @ Jungfraujoch ( 3454 mts /11333 ft ) an nei a, he hmun sang tak hi khawvel a Railway Station sang berah an chantir thei hi a ropui a ni, he hmun hi Train ngat a lawn thlen theih nan lei tam tak verh a ngai a, (1893 a bul tan in an ram leilung hi a chan/ nghet that em vang te’n thawktute hian an thawkrim hle bawk a ni ) Zurich atanga Bus a Train Station kan thlen thleng khan leiverh (tunnel) 22 kan paltlang a ni. A then phei chu a thui ve ngat ngat  khawp mai. Top of Europe lawn thleng turin current hmang chi Train chi 2 in chuan nuam tawk tur a chakin min lawn tirin Screen ah kan thlen chin lan tir vek zel chungin leh leiverh tam tak paltlang leh in tlang chhip kan lawn thleng zak thei zuk nia!! Khatiang khawp a Rail kawng chho ulh zawh tur khan current awm loh palh tih vel chu an hlauhthawn ve loh hmel khawp mai 😉

 

Tichuan tlangchhip ah ngei hian han hawi khawthawng in kan la tawn ngai loh vur sur te han tawng in lawm em em in thla te kan han lak lawp2 theih avangin kan lawm a kim hle a ni.

Tlang chhipah hian hmun fan tur chi hrang hrang an siam bawk a,  leiverh thui tak fan theih si Ice Palace an tih mai ( vur hmun - a chhuat leh bang leh chung zawng zawng vur vek, a temperature an control vek si )  hmun te pawh an siam bawk a , Khualzin tan chuan han kal vel pawh nuam dang dai duh tak a ni, sawi tur a tam mai.



Top of Europe @Jungfraujoch ah hian Tower ang reng khawthlir theihna Sphinx an tih mai, a tir tak ah chuan observatory atan a an siam (1931) an sa bawk a, a phuisuiin engkim a felfai vel vek bawk, he tlang a kan lawn man hi a to hle bawk - Euro 150 @ 12150 /- vel kan chawi a ni, lunch ei man pawh 2300 /- vel a ni. An Restaurant pawh hi an lun em avangin tour grp ten booking tih hun thlap ah kan ei a tawi khawmuang lova in sa seng nghal a la ngai zui bawk, an tlang sang lawn man te  a sang ang bawkin heng vel a ei in man hi a to fia2 hlawm si a an hlawk bik dawn mang e 😉  

 

Tin, an tlang sang dang chhip ah te pawh Cable Car ( Current hmang - Ropeway tih thin bawk  ) ten hahdam takin khualzin te an hruai thleng zak2 thei hlawm bawk a ni, an Cable Car thenkhat phei chu khawvela awmchhun mi 74 chuan theihna vir kual thei bawk si te an la ni zui.

 

An ram hi a mawi mai a ni lova, an rinawm vang te leh an inrelbawlna a that em avang te in a  ralmuang a, zanlai-ah pawh hmeichhia a mal chauh pawh a len chhuah a hlauhawm lohna ram a ni. Crime rate hi 0.5 % niin tehfung hrang hrang a an teh in khawvela chenna atana ram duhawm ber BEST COUNTRY IN THE WORLD nihna kum 3 chhung a zawn in an nei tawh  a ni.

 

Kawng hrang hrang a an kalphung (system) tha em em hlir mai te khu sawi sen a ni lo, eizawnna kawng hrang hrang zinga hlawh sang ber pawl chu  Zirtirtu te an ni tlat bawk,  nausen an lo pianin  sorkar in a tih tur zawng zawng a ti nghal a, Emergency atan an mipui zawng zawng  tawmhimna tur ( Bunker) tam tawk neiin chung hun atana an ei tur chu an chhekkhawl teuhva, a lo hlui deuh hunah a dangin an thlak leh mai a ni.

 

Hetiang dinhmun an nih bik theih chhan nia lang ta chu, Pathian in chenna tur a a pek ram hi thu mai ni lovin a neitu rilru pu chungin a takin an hmangaih bik a, chu an hmangaihna chu thiltih in a takin an lantir a, an leilung khawilai mai pawh khu an ta bil liau liau ang maiin an duatin an enkawl hnumin a fai em em vek mai a, an rinawm in an taima in an thawkrim bawk a,  kan hmuh ve phak a an Dil leh Lui ah te bawlhlawh hmuh tur a awm ve lo mai a nilova, Vatawk leh Sangha te an leng del2 a  an hmuhnawm hlawm hle a ni, Kawngpui sir a an phul te tak ngial pawh an duat tih hriat takin a hnum vel vek mai a ni.

An Kristianna khu a takin an thiltih in an lan tir a ni ber mai,  tichuan a hmalam a kan sawi tawh ang khan Pathian malsawmna pawh an dawng nasa ta reng a ni tih a lang a ni.

 

Keini Kristian ram inti ve tho te hian kan ram hi Switzerland of the East  ni ve se tih hi kan duhthusam a ni ngei in a rinawm a,  awle tichuan tunah rih chuan kan inkar hi la hla rih viau in lang mahse, tun kan vawiin hman mek atang a rilru thar pu a anni pawhin an theih chuan,  ti a neitu tak tak rilru pu a kan ram hi hmangaihna tak tak nen a tihtak zet a hmasawn tur a ke kan pen chuan kan duhthusam hi kan thleng ve thei a ni tih hria in hmasawn duhna rilru pu chung a kan puanven te sawi chhingin RALTIANG I KAI VE ANG U.


(Pi Apuii Varte, a thuziak chhiar manhla tak mai a rawn thawh vangin a chungah kan lawm takzet e. thuziak thawh duhte tan hmet kauh rawh le.)

2 Comments

He post chungchanga i ngaihdan lo sawi ve rawh:

  1. This comment has been removed by the author.

    ReplyDelete
  2. A nawm hmel hle mai. A ziaktu in a ziak thiam bawk si. Chhiar a manhla in mit a tlei e👍👍👌

    ReplyDelete

Post a Comment

He post chungchanga i ngaihdan lo sawi ve rawh:

Previous Post Next Post