Aizawl - Guwahati inkar thlawhna service thar GoAir Mizoram CM in vailiam

Aizawl | October 15, 2019: Hun rei tak thlawhna service ah Mizoram in harsatna a tawh hnuin Chief Minister Pu Zoramthanga chuan tukin khan Lengpui Airport atanga Aizawl leh Guwahati inkar thlawhna service thar GoAir chu a vailiam.

He thlawhna hi February 10, 2019 a Jet Airways in Mizoram leh India hmarchhak state danga service a tihtawp hnu a Mizoram leh Assam inkara thlawhna service neih leh hmasak ber a ni a.

GoAir thlawhna hi Airbus 320 niin, vawiin atanga October ni 26 thleng hian Guwahati leh Aizawl inkar service bakah October ni 27 atangin Kolkata service a awm tel dawn bawk a ni.

Vawiin ni 15 atanga ni 26 October 2019 chhung hian Guwahati - Aizawl pan tur hi zing dar 6:50 ah chhuak in, Aizawl atanga Guwahati hi zing dar 8:40 ah Lengpui atangin a chhuak ang a, dar 9:50 ah a thleng ang a. Ni 27 atangin Kolkata - Aizawl thlawk hi zing dar 10 ah lo chhuak in dar 10:55 ah a lo thleng ang a. Aizawl atanga Guwahati pan in dar 11:25 ah a chhhuak ang a. Guwahati atanga Aizawl pan in chawhnu dar 1:15 ah thlawk chhuak leh in, Aizawl atanga Kolkata pan in chawhnu dar 3:05 ah Lengpui atangin a chhuak dawn a ni.


  

GoAir hi airline man tlawm, sumdawng company lian Wadia Group ta a ni a. November 2005 khan airline operation hi kalpui tanin, nitin flight 325 a nei thin a. Aizawl hi ramchhunga service a neihna khawpui, domestic destination 25-na a ni.

GoAir flight service lawmna inkhawmah Chief Minister chuan, hun rei tak Mizoram mipuiten an lo nghah hnua Aizawl leh Guwahati inkar thlawhna service a awm leh ta chu lawmawm a tih thu a sawi a. Damlo inenkawl tum te leh zirna leh hna thil avanga zinchhuah ngaite bakah Mizorama rawn khualzin turte tan he thlawhna service hi a pawimawh thu te, service a awmloh hun chhunga mi tam takin harsatna an lo tawh phah thu a sawi. GoAir bakah flight service dangte a awm belh zel a beisei thu leh chumi atan chuan Lengpui Airport pawh kawng hrang hranga thuamthat hna thawh a, hmalakna thar siam belh mek zel a nih thu Chief Minister chuan a sawi bawk.


 

Airport Authority of India (AAI) Regional Executive Director Sanjeev Jindal pawhin thu sawiin, Mizoram Chief Minister thahnemngaihna leh hmalakna avanga Guwahati leh Aizawl inkar thlawhna service a awm leh ta chu lawmawm a tih thu a sawi a. Heng khawpui pahnih inkara flight service siam hi sum siamna lam aiin mipui mamawh phuhruk tumna a nih zawk thu a sawi. GoAir Vice President Harjinder Singh Bhasin chuan Mizoram sawrkar hmalakna chungah lawmthu sawiin, he thlawhna service thar hian tourism hmasawnna kawngah pawh rah tha a chhuah a beisei thu a sawi.

He hunah hian Mizoram Chief Secretary Lalnunmawia Chuaungo, GAD Commissioner Ashish Kundra, Adviser to CM C Lalramzauva, DGP SBK Singh, Civil Aviation Principal Consultant Wing Commander J Lalhmingliana leh sawrkar hotu pawimawh dangte leh AAI atanga he hun hmang tura lo kalte an tel.

With Input from- DIPR

Post a Comment

He post chungchanga i ngaihdan lo sawi ve rawh:

Previous Post Next Post