Hranghlui Zaithiam Thangbuaia kan chan ta

Aizawl | September 23, 2019: Mizo hranghlui zaithiam, a hun laia Zoram dung leh vang luahtu Thangbuaia vawiin September 23, 2019 zing lam dar 9:50 khan a chenna in Chhiahtlangah a boral.

Radio-a khawhar hla leh lêngkhawm hla thiam taka  sa fâwn hlarh hlarh ṭhin, nu leh pa upa lam te'n a zâi an ngaihthlâk kham loh leh an lung tilêng thar ṭhintu Thangbuaia hi kum 1946, July ni 21 ah Pu Sabuta leh Pi Nawliangi te inkârah Khuangthing khuaah a piang  a ni.

Thangbuaia hi  Kum 1966 rambuai sawikhâwm avângin Khuangthing aṭangin Khawbungah an pêm a. Kum 1968 ah Chhiahtlang hmunah an insawn leh a. Kum 1989 ah Aizawlah an lût a, chuta ṭangin kum 2001 ah Mualmâm(Sesawng)ah an insawn leh ta a ni.

      Kum 2001 ah Chuauchhingpuii nen an innei a ni. Zai lama a lâr chhohna hi a rei fu tawh a. Kum 1978 ah Radio-ah hla a record ṭan a. Chuta ṭang chuan a zai chu miten an duh hle a, a lâr chho fu mai a. A hla record hmasak ber ṭum hian lengzêm hla a record a, Pu Lalṭanpuia Sialsuk ami phuah "Awmhar champion vâl kan ni' tih te,  'Ṭhal favâng turnipui kâwl a êng no ruai' tih te 'Lênna vangkhua tlâng a dang hi' tih te hi a record a ni.

        A hla sak lâr zual zingah Pu Damhauhva phuah 'Zûn phur thing tin pâr leh khawtlâng lii liai' tih te  'Ngai teh a hun leh ni a thleng thuai dawn e' tih te, 'Hun ral ta zawng zawng ka thlir a'  tih te hi a lâr hlawm hle.

Zaithiam tum lo, zaithiam si a ni a, tu aw mah a la chhawng lo a, ama zai zaia zai tawp mai, aw original em em anih hi a danglamna a ni a, amah anga zaithiam mahni nihna anga ding nghet tlat ngam, tuma aw copy buai duh der lo, ral khat ațang a, a zai hriat pawhin Thangbuaia zai anih hi a chiang nghal ngawih ngawih mai a, hetiang taka mahni nihnaa chiang, signature nei țha hi Mizo tan a hluin a uiawm tak zet a ni.

Beram no Lalna, ram ni tla ngai lovah chuan,

Kan ṭhen tâk te'n khawvel ngai lovin;

Zaiin Beramno ropui an fak a,

Nunna thing daihhlim hnuaiah chuan puan vâr sinin an lêng.

- Mr CS