Food Truck Tihtawp a ni? Khawiah nge ṭhalaite khawvel?

Aizawl | September 3, 2019: Hmasawn tumte'n retheihnain a sabehna atanga talchhuah tuma tha leh zung senga an din leh an eizawnna Food Truck chu titawp tura thupek an nih avangin Zodin kual zau laia Food Truck hrang hrang inpho thinte chuan an eizawnna an tawpsan.

'Sawrkar hna kher a ngai lo' tia inzirtirna hmunah Sawrkar hna beisei lova anmahni mai ni lova thalaite tana hna an siamna chu tihtawp a ni. Khua a va var lo tak em.

Mizoram hi a nawlpuiin zingah Sawrkar office inhawn rual dawr hawng leh an ban rual dawr khar thin an nih vangin mahni hnaa inpe leh hun hmang, a bikin mimal hnuai leh company hnuaia thawkte tan phei chuan zan hun awl lo chu nun chenna a awm ve lo. Bazar pawh a  buaithlak a, Vishal a rawn awm a, zanah an inhawng thin a, a awm atangin hnathawh hnuah zanah mi tam tak chhungkua leh thian hovin an bazar theih phah.

Thalai mai bakah mi tam tak zana leng chhuak leh thil hrang hrang ti thinten zana inhnawhpuar nana an hman thin Zodin SBI Main Branch Opposite a Food Truck chu a remchan tehlul nen titawp tura thupek an nih vangin an tawpsan niin Social Media-ah post a awm.

He thil hi Thalai mai ni lo, Nu leh pa leh chhungkua tan, Entertainment khawvela chenga zana programme siam thinte bakah eizawnna avanga zana chhuak thinte leh Chanchinbumite tan hlei hlei hian a tangkai a, mahse, tihtawp a ni ta si a ni. Khawiah nge ṭhalaite khawvel? Anmahni mai ni lovin thalai hna nei lo hna an siamsak a, chhuna hmun danga inhlawh pawh zan hun hmang tangkaiin inhlawhna an siamsak thei lehzel bawk. Mahse, Zodin ah erawh kan hmu tawh dawn lo a nih hmel a, khawiah nge an inzar leh ang?

 Facebook ah LallianZuala Varte tih chuan a hnuaia mi ang hian post a siam:

Theihtawp chhuahin mahni inhaikuak tumin, intodelh nih duhin risk la in Food Truck business lam ah kan han lut ve râwih a, Pathian zarah kan kal tluang chho ve em² a. Tunah hian mi 4 in kalpui mekin, nupui fanau nei vek kan ni a, chhungkaw ei bêl bera hmang kan ni hlawm. Aizawl khawpuia hmun laili deuh ber leh hmun zau leh rem ber, residence area lo ber leh keini Food Truck ho tana traffic tihbuai lohna tur ber, Zodin SBI Main Branch Opposite ah sawn kan ding hlawm a. Sawlai saw chu tupawn kan hria anga hman ata tawh Addict leh KS ho awmkhawmna ani a. Kan awm vanga awm nilo in, awmsa an ni. Chung ho zawng² awm chu kan han inhralh tha ve deuh chho ve tan ta maw tih chhohah khan kan koh khawm angah an lo dah ta bawk nen. Chutah kan dinna atanga kan haw hnua buaina lo chhuakah pawh kan thiamloh a ni ta zel bawka. Tun thla thar atang khan lehkha kan dawng a, "HARSATNA HRANG² THLEN TU" tih ang zâwngin min han ti ta zawk hlauh mai bawk  nen. Ding tawhlo turin min ti ta rup mai a. Kan rilru a na in hrehawm kan ti tlang khawp mai. Ram hmasawnnan tlem a zawng kan thawh ve anga kan inngaih laiin, harsatna thlentu mai kan lo ni hi hrehawm kan ti in kan hrethiam lo hle mai. Chubakah kan din laiin buaina a chhuak ngailoa, traffic tihbuai viau kan nei lemlo. Engpawh ni se, keini thalai te hi intodelh, eizawnna bul tanna kawngah lehzel pawh min khap zel dawn chu a nih hi. Khap ram kan ni miau a. 

P.s.- Sawtilaia damdawi zuar leh ti leh ks ho an hnawt bo theilo a keini zawk min hnawt ta ani ber e.

RIP Food Truck

- LallianZuala Varte

Hemi bakah hian Bee Lee inti chuan a hnuaia mi ang hian post a siam bawk

Food Truck For Sale:

Mihausa nih loh chuan dawr luah tur hmuh hi thil har tak a ni, hmun rem leh tha leh lun lai chu a nei faten an chang zo vek a!! Sumdawn vanga hausa ai chuan Hausak avanga sumdawng pawh an tam narawh!! Kum 15 sipai tan hnu ah pension in nikum ah ka chhuak a, khawnge sawrkar hna zawng tawh loin mahni eizawnna kan tan teh ang tiin Pension zawng zawng deuhthaw i. Food Truck kan siam risk a, mipuiin an hlut in chhungkaw pali laiin ei bel ah kan hmang a! Min lawmpui tu an tam ang bawkin hnawk min titu pawh an lo tam narawh!! Kan Food Truck chu KS leh Drug addict ai pawhin a lo ngaimawh awm hi a lo ni a,  Aizawl khawchhung a kawng zau ber leh residence awm lohna ah pawh hnawk mai kan  lo nih tak si ah hian chuan ti hian rilru siam vat ila Mizoram ah hi chuan kan survive zawk ang ka ti ta zawk a . Mahni intodelh min zirtirtu te bawk hian kan intodelh hi an lo phal miahlo hi a lo nia, pension pawisa Food Truck a invest vak vak lo khan tunlai hausak thut na ang te hi lo ti ve ila, tournament lian deuh deuh ah sponsorship te kan pe ve anga, celeb, NGO hruaitute, Model ho nen TV ah kan lang ve chuai chuai tur hi a nia. Kuthnathawk tute , hmelhriat tha pawh neilo,mahni intodelh tum, rahbeh a awm mek te rilru natna ang a them tereuhte ka tem ve hi  experienced hlu tak, ka hlep ah ka ngai. Ka hlep nual tawh avangin ka Food Truck hi ka rawn zuar e

#RIP FoodTruck