An hmangaih Chelsea tan an thawk a, MIZO an chawisang thung!

Aizawl | September 23, 2019: Khawvel Footbal League lian leh en hlawh English Premiere League a Club lian, Khawvel Football Club lian pawl Chelsea FC chuan an stadium Stamford Bridge a hmun laili ber Mathew Harding Stand-ah, Chelsea FC intarna bul chiah-ah Khawvel hmuh theihin MIZO Chelsea Supporters Club bannner an tar a, nizan khan Liverpool nen an inkhelh ṭumin mipui hmuh theihin a awm ta.

MCSC vice chairman Ricky Lalbiakmawia chuan MCSC hmalakna leh hmalak dan hetiang hian Exploremizoram.com a hrilh. "Khawtlang leh mipui ṭhatna atan kan thawk a, a hmingṭhatna erawh kan hmangaih Chelsea tan tiin".

Chu an hmalakna chuan rahṭha a chhuah a, Football Fan Club te tana mellung pawimawh tak an phun a, Mizo mai ni lovin Football Khawvel ngaihven an hlawh. An hmangaih Chelsea tan an thawk a, MIZO an chawisang thung!

Facebook a Mizo Chelsea FC fans group / page hrang hrang te chuan 2011 November 11 (11.11.11) khan inhmukhawmin, ṭan inang, duh thuhmun, hmangaih thuhmun chu zai khata luankhawm zai an lo rel tawh ṭhin chu a tak chantirin, Mizo Chelsea  Supporters Club chu an din a. Club dang fans te pawhin an theih chu an theih ve ngei ringin, an page hrang hrang leh group hrang hrangte ṭhiatin hmun khatah an luangkhawm ta a.

An ring sual lo hle! Kum 2012 a lo inher chhuak a,  Khawtlang/Society tana thil ṭha tih tumna nena indin an ni bawk a, Ṭanpui ngaite ṭanpui kawngah hma an la char char a. Mizoram a Football Club fans member tlem ber ni siin an rahchhuah erawh a ṭha ber ṭan ta a. 

Charity leh blood donation  bakah Orphanage te tan thilpek an pe a. Nikkum khan cheng nuaih chuang home pakhatah an pe bawk.

Chu mai a la ni lo, Krismas apiangin mi harsa zawkte tan thawmhnaw, ei tur leh pawisa fai an hlan a. MCSC member pakhat chuan, "MCSC thilpek tlawmte vanga mi harsa zawkte'n hlim takin Krismas an hmang a ni tih hriat tluka hlimawm leh lawmawm a awm lo!" a ti.

MCSC hian Chelsea FC in inkhelh pawimawgah hnehna an chan apiangin thisen an pe ziah bawk a. No plastic rally, Clean Aizawl, leh ruihhlo ngaite tan Ei turte an sem ṭhin bawk.

Chu an hmalakna chu Chelsea FC pawhin ṭha tiin he pawl hi an pawm mai bakah an la tih ngai reng reng loh, Chelsea FC an magazine ah MCSC hmalakna hi an lo chhuah tawh nghe nghe a ni.

An hmalakna te thlirin 2012 aṭanga an lo dil tawh chu tihlawhtlinsakin tunhnai khan Chelsea FC home ah Mizo Chelsea Supporters Club banner chu an tarsak a. Hei hi India Media a dengchhuak rang hle.

He thil hi a lawmna chhungte International ah neiin, Yokohoma in an sponsor bawk a. Hun hlimawm tak an hmang bawk a ni.

Tunah hian an tum zinga pakhat Aizawl-ah Chelsea FC khelh lai en ngei an tum pawh la hlawhtling rih lo mahse, ban phak maiah a awm tawh a, hlawhtling mai thei dinhmunah a ding tawh niin kan thudawnna chuan a sawi.

Member 2000 chuang hret awmna Mizo Chelsea Supporters Club hi Chelsea FC fans club zingah Bronze ni ṭhin kha tunah chuan Gold ah an inhlangkai tawh nghe nghe.

Mizo Chelsea Supporters Club hruaitute:

Chairman : David Lalmuanzova

Vice Chairman : Ricky L Colney

General Secretary : Lalfingfela Royte

Asst Secretary : Malsawmkima Khawlhring

Honorary Secretary : Jonathan Lalremruata

Treasurer : Lalnunsangi Hnamte

Finance Secretary : Sentei Ngente