Zirlaibuah Zo hnam ziarang ṭhahnem zawk telh chungchang Minister hovin sawiho

Aizawl | August 9, 2019: MZP rorelna sang Federal Council Sitting-in a lo rel tawh angin "Zirlaibuah Zo hnam ziarang ṭhahnem zawk telh a nih theih nan MZP-in hma la rawh se" tih MZP-in Sorkar thuneitute hnena a thlen chu Education Department lamin ngai pawimawhin August 7, 2019 khan Mizoram School Education minister Lalchhandama Ralte kaihruainain a  Office-ah, Education Department hotute leh MZP hruaitute nen sawi hona hun hman leh a ni.

 

Education Minister, Pu Lalchhandama Ralte chuan "MZP ten Zirlaibuah Zo-Hnam ziarang tun aia telh tam a nih theih nan-a hma an la chu a lawmawm hle a, kan ram leh hnam tan hetiang rilru zirlai hruaituten an seng hi zirlaite vanneihna  a ni a, zirlaibua kan hnam ziarang a tam thei ang ber a lan tam hi ka duh hle a. Hei hi kan ram leh hnam humhalhna kawng atana pawimawh tak pakhat a ni a, Zo hnam ziarang kan inzirtirna atana pawimawh tak a ni," a ti.

MZP Hruaitute hian Education Department thuneitute hnenah hian zirlaibuah Zo Hnam ziarang hi tun aia tam zawk telh an duh thu te, Mizo chanchin hi kan zir tam a, kan zirlai naupangte thinlungah kan tuh ngheh zual zel hi a ngaih thu te leh kan hnam ziarang zirlai ten an hriat zel a, kan inthlahchhawn zel a pawimawh thu te an thlen a ni. Tin, zirlaibua milem-te pawh Mizo thlalak a tam thei ang ber dah ni se, naupangte thinlungah kan hnam nunphung hi bet tlat se la, kan Zo nun ze mawi chawi san hi Zo-Hnam tan a pawimawh hle a, a chhung thu ṭhenkhat pawh siam rem ngai lai thuneitute hnenah hian an thlen nghal.

 

Education Department lam chuan theihtawpa ṭang tlanga zirlaibu siam ṭhat ngai lai siam ṭhat a nih tur thu te, zirlaite hmakhua ngaiin MZP nen ke pen ho zel a ṭhat thu te an sawi bawk. MZP rawtna lo ena siam ṭhat ngai lai siam ṭhat a nih tur thu te an sawi bawk.

MZP chuan Education Minister, zirlaite hmakhaw ngaitu kan nei hi Zo hnam tan chuan a lawmawm kan ti hle a, Mizoram Education siam ṭhatna tur leh zirlaite tana ṭha tura ke a pennaah theihtawp chhuahin kan thawhpui zel dawn a ni.

Hemi chungchang hi August 2 khan School Education Directorate Conference Hall-ah Pi Esther Lalruatkimi, Secretary, School Education Department hoin, Director School Education, SCERT, MBSE leh MZP hruaitute nen sawi ho a lo ni tawh bawk.