TZP in Mithar lawmna hun hmang; Harsatna tam tak tawktute chu an chhel a, a tawpah hlawhtlinna changtu an nih ṭhin - RRR

Aizawl | August 18, 2019: Tuipuiral Zirlai Pawl (TZP) nimin khan Dawrpui Multipurpose Hall-ah an bial huam chhung aṭanga zirna avanga Aizawla awm tharte lawmna hun an hmang, Tourism minister Robert Romawia Royte in khuallian niin hun a hmanpui.

Khuallian Pu Robert Romawia Royte chuan Zirlaite chu beidawng lo turin a fuih a. Harsatna tam tak tawktute chu an chhel a, a tawpah hlawhtlinna changtu an nih ṭhin thu leh, zirnaa tiṭha ṭhinte chu mi hlawhtling ber ber an ni bik lo a, ti hram hramte chu a hlawhtling an nih ṭhin thu a sawi a. Eng kimah a êng zawnga thil thlir thiam a, beiseina nung neitu ni turin zirlai kal khawmte a chah a ni.

Tuipuirala pi leh pu hmun hlui awm tlawhtute tana Lodge ṭha zawk neih theih nan te, Lodge sak mek chawlhsan tawh chu chhunzawm a nih theih nana hma an lak mek thu sawiin, Tuipuiral chu tlawh a, en zel a tum a ni.

Inbiak pawhna ṭha tawk lo a vei thu sawiin, sawrkar pawn a theih tawp a chhuah mek thu leh a chhuah zel tur thu a sawi a ni.

Khualzahawm, bialtu MLA ni bawk Pu Ramthanmawia chuan kum 2019-a  bial chhung school HSLC result chhia chu pawi a tih thu a sawi a. Kum dang ang bawka tiṭha leh tura theih tawp chhuah thar leh a tum thu sawiin, Tuipuiralah EMRS School dah theih ngei a beisei thu te a sawi a. Mizoram sawrkarin zirtirtu an lak thar turah bial mi zirlai tam zawk an lut thei tur chu a lawm thu a sawi a ni.

TZP-in zirlai lawmna hun an neihah hian, MLA Pu Ramthanmawia chuan a bial chhung zirna in aṭanga kum 2019-a HSLC distinction-a pass mi pali hnenah Laptop a pe a ni.

TZP member under graduate leh post graduate result chhuaka rank nei pha mi pasarih (7) hnenah lawmpuina leh chawimawina thuziak an pe a. An bial chhung Farkawn aṭanga MCS inziak tling K.Lalhlimpuia hnenah chawimawina thuziak an hlan a ni.

Chawhnu lamah Dr Lalzahawma, MF&AS hnen aṭangin career guidance ngaithlak a ni bawk.

He hun hmang tur hian TZP member 300 bawr vel leh TZP hruaitu hlui ṭhahnem tak an kal khawm.

He hun hi TZP Vice President Samuel Lalrinsanga'n a kaihruai a. TZP President Pu Zothansanga'n thu sawiin, an bial chuan eizawnna kawngah leh Tourism-a hma sawn turin inkal pawhna ṭha a pawimawh a, Tuipuiral chu kawng hnai zawk mamawh an nih thu a sawi a. Zirlaite chu mi tana malsawmna ni thei tura mahni inenkawl a, ruihhlo laka fihlim turin a fuih a ni.