PZP Freshers' Social cum Felicitation

Lawngtlai | August 4, 2019: Pang Zirlai Pawl, Sub-Headquarters, Lawngtlai-te chuan nimin khan Freshers' Social cum Felicitation programme Central YLA Hall, Lawngtlai ah an hmang. He hun hi Mizoram deputy speaker Er. Lalrinawma  chuan Khuallian niin a hmanpui a, CYLA president J Sangthangpuia chu Khualzahawm a ni.

Khuallian Er. Lalrinawma chuan thusawiin, "Pang Zirlai Pawl, Sub-Headquarters, Lawngtlaite'n Freshers' Social cum Felicitation hun ṭha tak kan hmang thei hi a lawmawm ka ti hle a, Zirlaite chu kan tum ah chiang ila, kan tum tihlawhtling turin theihtâwp i chhuah ang u. Zoram ṭhalaite suattu AIDS dona kawngah kan harh thar a ngai, kan theihna apiangah zirlaite hian hma ila ang u. Kan hnam lam, ṭawng leh hnam serh leh sângte humhim zêlin, i vawng nung zêl ang u," a ti a. Khuallian chuan, "Pangfate hi Zoram buai laia a tuar nasa ber zînga mi in ni a, Hnam Pasalṭhate in lo duhsaknaah lawmthu ka sawi a, kan Sawrkar hian Pangfate hi a hre reng che u a ni," a  ti bawk.

Khualzahawm Pu. J. Sangthangpuia chuan, "Pang zirlaite chu Passed tum ngawr ngawr tura  zir lo in, thiamna tak tak neih theih turin zir zâwk ula, mi hlawhtling tak in ni dawn a ni. Hnambil anga hmalakna hi bansan ila, in unauna ṭha zâwk nên hma i la ho ang u. He Lairam hi kan ram a ni a, a chhûnga chêngte hian he ram hmasawnna tur hian mawhphurhna sâng tak kan nei vek a ni," tiin zirlai kalkhâwmte chu a chah a ni.

Uaptu PZP Gen. Hqrs president Herbert Ramengmawia  pawhin thusawiin, "Pang Zirlai Pawl hi Pangfa Zirlai harsa tak taka lehkha zirte'n engemaw kawng zawng tala hmasawnna a awm beiseina a vânga din a ni a. Zofate insuihkhawmna kawngah Pang Zirlai Pawl chuan theihtâwp a chhuah zêl dawn a.  Pangfate hian PZP tih loh Pang hnam hmingpu Pawl dang kan nei lo tih i hre reng ang u. PZP hian Pang  hnam leh Zirlaite harsatnaah a ding zêl dawn a ni," a ti bawk.

Chawhnu session chu Awareness Programme atan hmangin, District Vector Borne Disease Control Programme aṭângin District Consultant in Malaria Awareness leh District Child Protection unit lam aṭângin POCSO Act leh Juvenile Justice Act Awareness neih a ni bawk a, kalkhawm te'n an hlawkpui hle a ni.