Mizoram Kailawn Networking Event buatsaih

Aizawl | August 3, 2019: Mizoram Kailawn leh Folkland buatsaih 'Networking Event' chu nizan khan The Warehouse cafe, Folkland, Aizawl-ah buatsaih  a ni.

He event hi Entrepreneurs te inhmelhriatnan leh inpawhna tha zawk a awm nan te, Expert te nen inkawmna hun leh Business partnerte nena inpawhna tha zawk a awm theih nan leh Mizoram Kailawn chungchang inhrilhhriatna atana buatsaih a ni.

 

He hunah hian Entrepreneurs tharlam tak tak bakah sumdawnna lama hlawhtling tawhte leh Mizoram Kailawn Business partner bakah expert tam tak an tel a. Inkawmna hun tha leh nuam an hmang hova, inhmelhriat tawnna bakah sumdawnna kawnga an hmalak dan tur inhrilhhriatna hun an hmang bawk  a ni.

   

Mizoram Kailawn hi 2017 atanga bul tan a ni a, Mizoram Sawrkar hnuaia Mizoram State Entrepreneurship Development Monitoring Committee (MEDMOC), Planning & Programme Implementation Department l leh IIM Calcutta Innovation Park (IIMCIP) te nen tanghova thawh a ni a. Mizoram Kailawn 2019 hi June Ni 17 khan Mizoram Sawrkar Chief Secretary Pu Lalnunmawia Chuango, Mizoram State Entrepreneurship Development Monitoring Committee (MEDMOC) Chairman ni bawk chuan Aijal Club-ah a hawng a. Mizoram Kailawn 2019: Business Plan Contest hmanga Entrpreneurs te inlena a tel duhte tan dilna hawn mek zel a ni a.

  

 Dilna hi July Ni 17 atanga August Ni 9, 2019 chhungin Online hmangin www.mizoramkailawn.org ah thehluh theih a ni a, diltu zinga beiseiawm leh titha 40 thlanchhuah Finalist-te September Ni 6, 2019 hian puan a ni dawn a. Finalist-te hi IIM Calcutta lama mithiam ten September thla kar thumnaah hian Booth Camp/Training an neih pui ang  a.  September Ni 23, 2019 hian Entreprenuership Summit-2019 neih ani dawn a, Entrepreneur titha thlanchhuahte chuan sawrkar lam atangin eizawnna bultanna tura hamthatna leh pawimawhte an dawng thei dawn a ni.   

 Mizoram State Entrepreneurship Development Monitoring Committee (MEDMOC) hi October Ni 25, 2016 khan a din a ni a. MEDMOC chuan Entrepreneurship lama tui thalaite tan kawng  hawn sak a tum bakah an bul tanna tur thlengin a ngaihtuahsak dawn a ni. MEDMOC hnuaiah hian Entrepreneurship Development Scheme (EDS) kalpui niin Chief Secretary kaihhruaina hnuaiah Planning & Programme Implementation Department, Commerce & Industries Department leh Higher &Technical Department hotute an tel a, Non-official expert member 3 an tel bawk a ni.

MEDMOC thawhpui IIM Calcutta Innovation Park (IIMCIP) hi India rama Management zirna IIM-Calcutta hnuaia awm a ni a. India ram hmun hrang hranga entrepreneurship hmasawnna atana hmalatu ber niin India hmarchhakah pawh nasa takin hma a la mek a, Mizoram University leh tualchhung entrepreneur-te nen kum 4 kalta atang khan hma an lo la ho tawh a ni.  Mizoram Kailawn 2017 leh Mizoram Kailawn 2018 ah diltu mi 620 chuang an awm a, chung zinga mi 83 te chu boot-camp a tel tura thlanchhuah an ni.