MZP in hna lakah ram leilungfa duhsak phut

Aizawl | August 1, 2019: MZP chuan nimin khan Mizoram University (MZU) hnuaia Teaching leh Non-Teaching post  hrang hrang lak chungchangah Mizoram University (MZU) thuneitute an dawr a, Vice Chancellor a zin avangin Registrar Prof. Nundanga chu a Pisa-ah kawmin MZU hna lakah ram leilungfa Zofate tling an awm chuan duhsak an phut thu an sawi.

 

 Mizoram University (MZU) hnuaia hna hrang hrang Teaching leh Non-Teaching post lak thin ah hian a thiam leh tling an awm a nih chuan a ram leilungfa Mizo te duhsak an nih theih nana hma la turin MZP chuan Mizoram University (MZU) thuneitute an ngen a, Vice Chancellor hi lehkha an pe nghal bawk.

MZP in Mizoram University (MZU) Vice Chancellor lehkhaan pekah chuan "MZP hi Mizoram chhunga zirlai pawl lian ber leh Mizoram chhunga pressure group lian ber a ni a. MZP chu Mizo zirlaite tana ding a nih angin Mizo zirlaite tan chuan theihtawp chhuahin hma a la thin a. Mizo zirlaite leh Mizo thalaite chanvo nasa taka humhalhin hma nasa takin a la thin a ni. Tin, Mizoram leh hnam tan chuan theihtawp chhuahin hma a la thin a, Mizo hnam tan chuan a thikthu pawh a ti chhe hle thin a ni.

Mizoram University (MZU) hnuaiah hian Teaching & Non-Teaching post thahnem tak lak a ni thin a, tun hma chuan a thiam leh tling awmna ah chuan Mizo duhsak bik an ni thin a. Hun a lo kal deuh a Mizoram University (MZU) ah hian Mizo ni lo hnamdang thawktu an lo thahnem tial tial a, a thuneitu sang lam pawh an lo awm ve ta zel a, kan hriat danin thiamna in ang leh nihna in ang ah pawh Mizo thalaiten Mizoram University (MZU) hnuaiah hian hna kan hmu lo ta fo mai a, hei hi MZP chuan tha lo a ti hle a ni. Thiamna in ang leh nihna in ang ah chuan Mizo a ram leilung fa lo duhsak turin kan ngen che a, Non-Teaching Staff ah phei chuan Mizo a ram leilung fa nilo chu Mizoram University (MZU) hnuaia hna lo pe tawh lo turin kan ngen che a ni.

MZP duh dan anga hnalak hi a kal lo a nih chuan MZP chuan hma a la nghal zel dawn a, a ram leilung fa Mizo nilo lak an nih chuan an hna an zawm theih loh nan hma kan la dawn a ni." tiin ziahlan a ni.

MZP in Mizoram University (MZU) Vice Chancellor hnena an lehkha thehluh copy hi Registrar Mizoram University (MZU), School hrang hrang dean leh department head te copy pek vek an ni bawk.