MMA Gym Challenge boruak a sang zel; Gym Challenge 4 in mipui ngaihhlut a hlawh

Aizawl | August 9, 2019: MMA Gym Challenge 4 chu nizan khan SPES Gym, Dawrpui, Aizawl-ah  MISMA (Mizoram State Mixed Martial Arts Association) leh Zonet Cable huaihawtna hnuaiah neih zawh a ni leh ta a, he event hi Zo Fight Promotion sponsor a ni a, Explore Mizore chu media partner a ni.

Meghalaya atangin fighter rothap  tak tak an inlan nual. He event hi world champion pawh lo ni tawh 4th dan BJJ black belt John Michael Gorman chuan khuallian niin a hmanpui a; amah mai bakah foreign atangin  martial arts lama tawnhriat lo nei hrep tawh Bryan-an a hmanpui bawk a, ani bakah hian Asian khawmualpuia MMA organisation lian ber ang hiala chhal ngam, One FC-a contract sign thar Deepak Harpal Singh-an a hmanpui bawk. Technical chairman Samuel Lalrozama chuan Gym Challenge hi thla tina neih tur a nih thu a sawi a, October thla phei chu Lungleiah nghah a nih tur thu a sawi. Tin, fight apiangin fighter-te hnenah incentive cash award pek ziah an ni a, chu chu ZFP sponsor a ni, a ti. Season kharna hi pui taka cage chhung ngeia December thlaa neih tur a nih thu a sawi bawk.

*Result

1. Vanlalngaiha, Ramhlun N def. Hmingmuanawma, Armed Veng S.(By Decision)

2. Joseph Vanlalhruaia, Hunthar def. Vicky Paul, Lunglei Bazar Veng (By Decision)

3. Darren, Meghalaya def. Lalawmpuia, Lengpui (By Decision)

4. Gary Lyndah, Meghalaya def. Sangthanhlira, S.Lungpher (By TKO)

5. RB Lallianzova, Salem Veng def. George Lalmuanawma, Luangmual (By Decision)

6. Rosanga, Model Veng def. Echwa Phawa, Meghalaya (By Decision)

7. Lalthasanga, Venghlui def. Balayied Ryntathiang, Meghalaya (By TKO)

8. Lalnunpuia, Seling def. Lalrinsanga, Falkland (First round KO)

Bout hmasa berah Vanlalngaiha leh Hmingmuanawma an insual a, round tan phat atangin Hmingmuanawma hian striking game a khel nasa angreng a, inpawmchilh lama luhpui a tumlo bur a ni ber. Hetih lai hian Vanlalngaiha hian a hnek fuh chhunah a hnar a hnek thi sak hlauh maia, round hnihna atangin round thumna thleng a nawrtu zawkah a trang chho. Unanimous decision hmangin Vanlalngaiha chakah puan a ni zui ta nghe nghe. 

Hemi zawha insual Joseph leh Vicky Paul  pawh a hmuhnawm angreng viau. Referee-in insual tura thu a pek veleh Meghalaya fighter Vicky Paul-an a paih thlu nghal maia, hemi hnu rei vak lovah Joseph-a hian a bawhbet leh ta zawk si. Mipui lam an phur a, insual boruak a sosang viau. First round chu Joseph-a a chungnung hret a tih theih ang. Second round-ah Vicky Paul a chau tan tih a hriat theih a, hetih lai hian tlawm mai a tumlo hle tih a hriat. Third round an thleng, round tawpna berah erawh Vicky Paul a che tha deuh thung a, round tawp dawnah phei chuan bawhbet zawkah trangin a hnek mawp mawp a, round a tawp. Judge te thuthlukna ah  decision-in Joseph-a chakah puan a ni zui.

Darren leh Lalawmpuia insual bawkin Meghalaya fighter Darren-an hnehna a chang. Hemi dawt chiah hian Meghalaya fighter  Gary Lyndah leh Sangthanhlira an insual thung a, round hmasa ber atangin Gary a che tha viau a, technical knockout-in a chak zui ta nghe nghe. 

RB Lallianzova leh George Lalmuanawma insual an nghakhlel tawh. Round tir lamah George-a che tha viau mahse, round a rei tak hnuin Lianzova a chungnung hret a tih theih awm e.  Chak zawka puan a ni zui ta nghe nghe. Meghalaya fighter Echwa Phawa leh Lalrosanga insual a hmuhnawm hle bawk a, an insual chhung zawngin Echwa Phawa-a hian paihthluk tumin a nawr char char a, hetih lai hian Rosanga a inveng thiam nasa si. Meghalaya fighter Phawa-an paihthlu thin mahse, rang takin Rosanga a tho leh zung zung a, remchang a hmuh veleh a hnek veleh thin a, decision hmangin hnehna a chang ta nghe nghe.

Lalthasanga chuan technical knockout-in Balayied Ryntathiang a hneh bawk. Mipui lamin bout hnuhnung ber an nghakhlel tawh viau a, insual hmuhnawm tak ni tura beiseina a sang viau.  Round khatna an tan  atangin an indimlo hle a, striking range-a an awm laiin chiang zetin Nunpuia'n a kut dinglam hmangin a hnek a, hetah zet zawng Rinsanga a luhai ngang aniang, a tlusawp zuia, knockout hmangin Nunpuia chakah puan a ni zui.