Aizawl | August 16, 2019: Jewel Lalthasangzeli Fanai chuan August 13, 2019 khan Zohnahthlak zinga a hmasa pawl leh hriat theih chinah pahnihna ni turin Chartered Accountant tha takin a zova. A ni hi ICAI (The Institute of Chartered Accountants of India) atanga zir chhuak a ni a. Jewel hma hian RS Roneihpuii D/o RS Rosangluaia chuan a lo zo tawh a ni.
Explore Mizoram chuan a lawmpui a chhuang tak zet a ni.
Explore Mizoram chuan a lawmpui a chhuang tak zet a ni.
Jewel Lalthasangzeli Fanai hi Albert Zohmangaiha Fanai leh Prof. Zokaitluangi te fanu niin, Unau pali (Mipa pahnih leh Hmeichhe pahnih) zinga a upa ber dawttu a ni.
Jewel emaw Nupui emaw tia an koh thin Jewel Lalthasangzeli Fanai hi 6 July, 1993 khan a lo piang a. Lower Chanmari, Aizawl ah khawsain, Presbyterian Kohhran, Chanmari, Aizawl-ah an lawi bawk.
Jewel Nupuii hian Zirna lamah a hniam lam chu MICE School, Aizawl atangin a zova, Middle School chin hi Doon International School, Dehradun leh NEUHOF School, Aizawl ah te zir leh a. Pawl 10 leh 12 hi Govt. Mizo High/Higher Secondary School ah a zo thung. Kum 2008 khan pawl 10 hi Govt Mizo High School, Aizawl atangin distinction-ah a pass a, Class XII hi commerce ah topper niin 2010 khan Govt Mizo Higher Secondary School, Aizawl atangin a pass bawk.
Zirna chhunzawm zelin, B.Com hi Indraprastha College For Women, Delhi University atangin 2013 khan a zo leh.
#Chartered Accountant ni tura i inbuatsaih dan? Zirna in leh i zir kum te nen?
- Common Proficiency Test/Foundation Course hi 2010 college ka luh kum hian ka in register a, chumi kum vek chuan ka pass nghal a(2010). IPCC/Intermediate Course hi College ka zawh hnuah beiin kum 2013 ah ka pass leh a. Articleship /Internship hi kum thum chhung CA practice mek hnuaiah tih a ngai a chu chu Akas & Associates, Tuikhuahtlang, Aizawl ah 2014 to 2017 ka ti leh a; Final hi 2019 ah ka rawn pass ve a ni. India ramah CA zirna hi institute pakhat chauh a awm a, chu chu Institute of Chartered Accountants of India hi a ni.
# Kum engzat nge i beih, coaching i kal em?
- Pawl 12 zawh ah college kal pah in ka zir tan a. Kum 8 vel ka zir. Delhi University hnuaia B. Com ka zir zawhin Delhi ah subject a zirin zirtirtu hrang hrang hnen atangin coaching ka kal chhunzawm.
# I lehkha zir dan?:
- Ka lehkha zir dan ah hian a tir atangin zirlai bu zawng zawng thiam turin plan ka siam a. Thiam deuh vek a, ka zir mai bakah, Exam hmain vawi khat tal ka thiam tawh hnu revise (ennnawn) hman turin hun ka siam a, exam hun hi chuan ka zir vak tawh ngai lo.
CA atan bik a ka inbuatsaih dan han sawi leh lawk ila. Lehkhabu CA a tan a tul hi ka chhiar thin a. Kan thil zir kha thil dangah hman thiam (apply) a ngaih zel a vangin, chutiang hre zel tur chuan lehkhabu hrang hrang ah chiar zau zel a ngai bawk a, CA lo ni tawh te hlawhchhamna leh hlawhtlinna chi hrang hrangte pawh kan hriat a ngai ve bawk. Lehkhabu tam tak chhiara, hriat chian hle a ngaih bawk avangin hun hi ka duh tam khawp a, chawhrualin ni khat ah darkar 14 vel te ka zir thinin ka hria.
#CA atan Qualification:
- Ka zir ve lai chuan Class XII pass phawt a ngai a. Chuta tang chuan Common Proficiency Test/Foundation Course (entrance test a ni ber ang chu) atan in register theih a ni a. CPT pass hnu ah hian IPCC/Intermediate Course hi in register a exam leh a ngai a. Chumi zawh hnu chuan Articleship kan tih mai, mi nawl puiin an hriathiam zawng chuan internship, CA practice mek hnuai ah in register a kum 3 chhung training neih ve a ngai a. Final exam tur hian articleship kum 2.5 tal zawh a ngai a, chumi hriatpuina chu kan thawhna CA te’n min pe in Final exam form kan fill up ve thei a. Final hi Group hnih- Group 1 & Group 2 ah then a ni a. Group khat ah hian paper 4 ve ve awm in paper a zavaiin paper 8 a awm a ni; Chung paper te chu 40% kan hmuh vek a, average a 50% hmu chin chauh kha pass ah chhiar an ni .
#CA Pass leh hemi atana inbuatsaihna hi a harsa em?:
- CA hna ah hian Finance Act thar ber te, case laws leh dan hrang hrang chhuak thar te hman nghal zel a ngaih avangin, lo intuaithar ve zel a ngaih bakah a hmanna tur chiang taka hriat a ngaih avangin a awlsam thei lo a ni. Chung zawng zawng hrethiam tur chuan English/Hindi tawng thiam a ngaih bakah, lehkhabu hrang hrang rawn kual angaih avangin taihmak leh thawhrim a ngai hle a ni.
Zirlai zawng zawng hriatthiam, hriatbelh zel, hriat reng ngai leh hman thiam a ngaih avangin, rilru zawng zawnga zir a ngai a ni ber mai. Taima takin hreawm theihnghilh thak khawp a in concentrate te, tihduh leh chakte tilo a lehkha zirnan a hun hman zawh vek te, entawn (mentor) tur leh thurawn min pe tur an awm loh pawhin, mahni a beih ngar ngar te a ngai a.
Tin, zirlai a tam tham avangin a hreawm leh hahthlak zawngin thlir duh loin thilthar hriatbelh nuam tih leh chakna zawng a thlir thiam te pawh a ngaiin ka hria. Mahni pawh kan inngaihtuah that hman loh avangin, chhungte, hmangaih taka mamwh zawng zawng min pe/enkawltu tha neih a ngai bawk.
#CA atana fee leh pawisa ngai zat?:
- Kan institute a registration leh exam fee hi chu a tam lo a, professional course ah chuan a tlawm ber a ngaih a ni a. Amaherawh chu, coaching (private tutor) kal duhna hmun zirin senso a dang a, zir hun chhung a rei a, mahni in enkawlna, zin leh vahvelna te erawh chu a ngai ve tih hriat a tha. A zat chiah erawh chu sawi thiam a har khawp mai.
# CA zir tur hian loan i la nge nangmahni sumin i zir/exam?
- Loan ka la lo a, ka nu leh pa ten an tum a ni.
#I lehkha zir chhungin harsatna i tawk thin em? I hmachhawn dan?:
- Lehkha te ka zir ve nasat avangin hriselna tlak hniam deuh te chu ka nei a, mahse harsatna lian tham lutuk chu ka tawk lo e. Zan thim hnu ah Coaching ka kal haw misual/mi a pakhatin min nem thlu a, kut phei chu min thlak lem lo a. Chubak chu sawi tur dang ka nei lem lo. Harsatna tenau eng eng emaw hi chu hmachhawn reng a ngai a, zinkual te a ngai zinga, mahni a inkeng zo tak nih chu a ngai a ni.
A duhzawng leh ngainat zawngte:
Rawng – Rawng larlo lam, eng rawng pawh, hmanna leh awmna tur a zirin rawng hrang hrang mawi ka ti thei zel. Rawng duh bik ka nei lo e.
Chawhmeh - Eitheihloh leh duhloh tawp hi chu ka neilo a. Thil chi khat rau rau ah siam tui leh tui loh dan azirte a ni mai a.
Incheina -: Simple leh comfortable hi a ni mai. A hmun leh a hun a zirin incheidan tur ni a ka hriatin ka inchei ve ṭhin
Rimawi : Rimawi hi ka ngaina ve hle a. Hun awl ka neih in. relax nan ka ngaithla ve thin.
Mizo Ziaktu zingah –Mizo ṭawng a ziah hi ka chhiar tlem a hun ka neihloh vangin, Hunawl ah Mizo Bible leh JF Laldailova Dictionary hi (ka tetlaiin) ka chhiar ve a, chu a ni mai ang a.
Hla: ‘Aw nang kan Lal kan Pathian / Ro min relsak ang che ..…’
Hla phuahtu – Pu Rokunga hi ‘Aw nang kan Lal kan Pathian / Ro min relsak ang che ..…’ tih a phuah vangin ka ngaisang.
Mizia : Mi hlim thei leh mi pawi sawi lo te.
Hobby- Family leh thiante nena hlim taka awmho, lehkhabu chhiar, tui tih zawng ei tur siam.
Zawhna dang:
1. A tel lova i awm theih loh: Chu tiang ang engmah ka neih ka hre lo.
2. I nun kaihruaitu: Pathian bak ah chuan ka nu, pa leh unaute.
3. Hringnuna i hlauh ber: Mi laktlakloh, tangkailo, leh thatchhia nih.
4. I tih ngai miah loh tur: Mi hmuhsit leh tihduhdah.
5. Mizo Tualzal nuna ṭha i tih: Induhsak leh intanpui tawnna.
6. Quote i duh ber:
“Nang, thatchhepa, fanghmir tihdantechhutla, fing rawh’
- (Thufingte 6:6)
leh
“ Be humble. Be hungry. And always be the hardest worker in the room”
- Dwayne Johnson
7. Mizoram leh Mizo tualzal nuna Mizo hmeichhiate dinhmun:
- Sakhaw dang leh culture dang thlirin Mizo hmeichhiate dinhmun hi a tha ka ti.
8. Hnam hmingṭhat leh hmingchhiat kawngah Hmeichhiate'n mawhphurhna:
- Hmingthat theihna- Taimak, thawhrim, eng hna pawh thawh thiam, ngainatawm, mi puih, hlim thei nih.
Hmingchhiat theihna: Hnam dang zinga mahni hnam ṭha lo ni a hriat lai sawi, inchei duh dah, intodelh loh, dawt sawi, nun uluk loh te.
9. Hnam ziarang chawinun kawnga Hmeichhiate mawhphurna:
- Hnam incheina ngaihsan, hnam nun leh tihdan hriat leh zawm, mizo puite ngaihsak.
10. Mizote tan 'Fa neih tlem' inzirtir hi a ṭulin i hria em? :
- Khawsak harsat dan leh fa neitu in a enkawl theih/thiam dan a zir a ni a, chuvangin a nawlpui ang chuan zirtir a tul ka ti lem lo.
11. Mizo hnam ṭhanmawh bawk nia i hriat?:
- Nu leh Pa in fate enkawl thiam loh, naupangin hma thlir nei lo a hun hman ral, hma lam thlir na chang hriat loh, mi tangkailo, thatchhiatna. Hunawl ngah leh hnathawh nachang hrelo/peihlo te.
12. Mizo hnam damna atana kawng awm nia i hriatte?;
- Naupang tet atanga taimak leh hnathawh ngaih san in zirtir, nungchang leh taksa ah thianghlimna ngaih pawimawh inzirtir a zawm.
13. Hnam chhan nana Hmeichhiate ṭangkaina leh mawhphurna?
- Chhungkua enkawl that, hnam nun leh dan te vawn nun, hnam zahawmna vawn him.
14. Zirna, Khawtlang leh Kohhran I ngaih pawimawh dan:
- Eizawnna tlak ni thei turin zirlai nasa taka zir, khawtlang ṭhat nan a theih ang ang a tan ve, Kohhran chu Pathian thil anih ang a zah leh ngaih pawimawh hi a tha ka ti.
15. Khawtlang, Kohhran leh nangmah:
- Lehkha zirnan hun ka mamawh hnem avangin khawtlang leh kohhran ah hian ka duh angin ka inhmang hman lo a. Mahse, khawtlang thil hi ka ngai hlu a, Kohhran hi Pathian lam thil a ni avangin ka zah a, ka dam chhungin ka ṭangkai theihna hmun apiang ah ṭangkai ve ka duh.
16. Social Media leh Nangmah:
- TV, internet, leh Mobile hi thil pawimawh hriat nan ka hmang tang kai a, mahse, a tul lo eg. game khel, film en etc hun ka neih loh vangin ka ti ngailo. Social media bik ah hi chuan hun awl hnawh khah nan ka hmang ve a, thiltihtur thulh khawpin ka ti lo.
17. Mizoram ṭhalai tam tak tlakchham:
- Ham thatna an neih an hrelo, hun hlut zia an hrelo, tangkai tur an nih an hre lo, nun zahawm neih tulna an hre lo, thatchhia an nih an inhre lo.
18. Mizo ṭhalaite hian ngaihsan tur dik an ngaisangin i hria em?:
- Mi hlawhtlingte, midangte tan a in pe zo te ngaihsan kawng ah chuan kan titha viau a, mahse nih ve tum a, an tih dan zir ve tumna lam kan la tlachham deuhin ka hria.
19. Ngaihsan tur dik nia i hriat:
- Pathian leh a kohhran, Nunphung lam ah chuan mahni eizawnna a mi hlawhtlingte.
20. Hlawhtlinna tura pawimawh:
- Mahni thiam zawng thlan, tum neih, tum lam pan a tha hnem ngai tak a ke pen, hreawm leh harsatna aia hmachhawp lam thlir, Pathian malsawm tlaka theih tawpa thawh.
21. Hloh i hlauh ber: Mahni nihna hloh.
I thalaipuite tan fuihna:
- Mizo thalaiten mahni phak tawkah mahni tana tha ber tur carreer thlan thiam, chumi ni ngei tura theih tawp a thawh a hlawhtlinna neih. Chumi atan ni tin hun leh theihna zawng zawng awm ze nei taka an nun hmang turin ka duhsak a ni.
(Hun chep tak karah Explore Mizoram chuan kawmna hun kan nei a, a hun hlu tak min hlantu Jewel Lalthasangzeli Fanai chungah lawmthu kan sawi a. Chhiartuten in hlawkpui ngei kan beisei.)
(A hnuaia fakna hi lo hmet ve rawh.)
_________________
TT Arts, Chanmari Aizawl-ah T Shirt print hrang hrang an ti thei a, Explore Mizoram T Shirt lei tur a awm.
TT Arts, Chanmari Aizawl-ah T Shirt print hrang hrang an ti thei a, Explore Mizoram T Shirt lei tur a awm.
Call/ WhatsApp +919615332721
(A hnuaia fakna hi lo hmet ve rawh.)
Jewel-i leh Adeline-i te tunlai thalaite zingah chuan in chhuanawmin in entawntlak ka va ti em! In thawhrim rah hlim tak a seng turin Pathianin alsawm zel che u rawh se.In tawngkam leh in chanchin chhiar nuam ka ti khawp mai.
ReplyDeleteA turu buru hle mai. A tumah a chiang a nih hi.
ReplyDeleteBawn khawp mai, chhiar a nuam thin e
ReplyDeleteManhla hle mai. Chhuanawm lutuk..
ReplyDeleteLps thalaiin Jewel an kawmna kha ka hmuzo miahlo ... Ka en duh khawpmai
ReplyDeleteA tha hle mai.. kan prof.fanu..ngaihsanawm lutuk👏👏
ReplyDeletePost a Comment
He post chungchanga i ngaihdan lo sawi ve rawh: