Lal Isua chaknaa innghatin

Kristian Hla Bu Number 149-na kan keu chuan khawvela Pathian hla ropui ber pawl; Edgar Lewis leh William W. Rock te phuah 'Lal Isua chaknaa innghatin' (Just lean upon the arms of Jesus) tih kan hmu a. He hla hi Mizotawngin Ch. Pasena leh Zakunga te'n min lehlin sak a, Zofate zingah he hla hi sam thiamlo kan awm awmlo e. 

He hla phuahtu zinga pakhat William W. Rock-a chanchin hi han hriat zui em em tur a awmlo a. Edgar Lewis-a erawh hi chu  February ni 8, 1865 ah Yates City,  Illinois ah a piangin a laiah hming chu Lewis Edgar Jones a ni a. Hla thluk a siam emaw, a phuah emaw hian Edgar Lewis, Lewis Edgar tih emaw Mary Slater ti te in hming lem a hmang thin. Moody Bible Institute-ah Pathian thu a zirzawh hnuin Young Men’s Christian Association, Davenport, Iowa; Fort Worth, Texas ah leh Santa Barbara, California ah te a thawk thin. September 1, 1936 khan Santa Barbara, California ah a boral a; Santa Barbara Cemetery, Santa Barbara, California ah an phumin a dam chhung hian hla 200 chuang a phuah niin an sawi.

Kan sawi tak angin he hla hian khawvel a deng chhuak a. Mizo te pawhin kan sak zin pawl leh khawhar inah pawh kan sak nasat pawl tak a ni awm e. He hlaah hian Lal Isua chu min vengtu leh hruaitu, harsatna leh lungngaihna vawrtawp - thihna kan tawh mek lai pawhin innghahna tlak a nih zia kan hmu chiang hle awm e. 

Harsatna leh manganna, lungngaihna leh thihna pumpelh theilo mihring kan ni a. He khawvelah hian kan lo piang chhuak ve a nih si chuan harsatna leh lungngaihna, manganna leh vanduaina, thihna te hi kan tawk vek a. Chuti ang hun harsa leh khirh khan tak mai, mihring mihrinna a tawrh zawh rualloh kan tawh hunah pawh chuan Lal Isua chu innghahna tlak leh kan innghahna tur dik tak a nih zia he hlaah hian kan hmu a ni. 

Kan buaina te, kan phurrit zawng zawng te, kan lungngaihna vawrtawp tawrh te chu Lal Isua hnenah  tawngtaia thlenin Amahah innghat tawp mai ila; chung zawng zawngah chuan khawngaihna leh hmangaihnaa khat Lal Isua chuan min ensanin min phatsan dawn hauhloh zia he hla atang hian kan hmu a. Lal Isua chakna leh Van lam chu hmua thlir tlatin; he khawvel piahlamah pawh chatuana nunna tur chu min pek dawn zia hi he hla hmang hian i hrechiang nawn fo ang u. 

Lal Isua chaknaa innghatin

Phuahtute: Edgar Lewis & William W. Rock

Lettute: Ch.Pasena/Zakunga

Lal Isua chaknaa innghatin,

A tanpui ang che, a pui ang che;

A hmangaih thlawn lo i rin tlat chuan,

A zai hlimtir ang che.

A chakna leh a hmangaih ring la,

A chakna leh a hmangaih a lang;

A chakna leh van in khi en la,

Chhandamtu chu i hmu ang.

Lal Isua chaknaa innghatin,

Kawng a tieng ang, a tieng ang;

A hruainaah che lawma zuiin,

A aw nem awih zel la.

Lal Isua chaknaa innghatin,

I buaina pe rawh, amah pe rawh;

I phur chu rit em mah selangin,

Lal hnenah tawngtai rawh.

Lal Isua chaknaah innghat la,

I engkim pe la, engkim pe la;

Hmangaih leh khawngaihin a khat e,

A ensan lo vang che.