MI FA TE

- Ṭana Vandir

Exploremizoram.com Columnist

Comedian Lalnunsanga khan tlangval pakhat zu in chak tawh lutuk, pawisa nei silovin a nu pawisa a dil a, "Mi fa te chu an rui sup sup tawh a nia!" tia a sawi lai khan kan nui dur dur a. 'Mi fa te' kan tih chuan kan entawn tur, kan tluklohna lai kan sawi thin. Chutiang ni silova, entawn atana tha lo, "Mi fa te" a tih khan a nuihzatthlak zual ta em em a ni. 

Zing dar 5-ah thil tul tih a ngaih avangin kan tho a. Mi fate chu an thawhna a rei tawh. Khawlaiah mi fate an tei sup sup a, hna an lo thawk a. Pawisa an la lut a, keinin ti tha viaua kan inngaih lai khan sum hmuh nan min hmang!

Keinin zing dar 8 vela kan lo mut burh burh lai khan mi fa te chuan hna an lo thawk fe hman tawh thin. Mi fa te chuan class kal pahin an lo inchawm a. Eng emaw tal thawhchhuah tumin an hmanhlel a. He khawvel hausakna, mitin tana ban phaka awm kha haichhuah an tum thin. 

Mi fa te chuan thil an tih reng reng hi an ti tak tak a. An teirei peih a. Hlau chung chungin a tul avangin an ti a. Hreh chung chungin a tih tur an hlen a. Peih lo chung chugin phur takin an thawk mai thin. Keinin, 'ka peih lo, zahthlak, ka duh teuh lo' tia kan ngaihtuah a, kan hmachhawn ngam loh lai khan mi fate chuan an sutlang lui a. Keinin kan chán a, mi fate chuan kan hloh hlepah an lo chhiar reng thin a lo ni!

Lehkha thiamlo an nih pawhin ngaihsanawm takin a lo nun theih a. Lehkhathiam tan phei chuan a nun theih leh zual. Lehkha thiam lo, mi mawlte pawh hi a lo chapo viau theih a. Lehkhathiam tan phei chuan chuti hlauh! Lehkhathiam that zia kan hria a, lehkhathiam nih lem loh pawhin lehkhathiam nazawng aiin thil tamtak a tih theih. Mi fa te, lehkhathiam ni silo te hian an ti nasa tawh em mai! 

A chang chuan mi fate nih hi a châkawm thin.