MI ANG LO KA NI A!

- Lalvansanga Pautu

Nikumah ka Nu in min han boralsan a, a hmangaihna aw nem dawng tawh ngai lo turin kan han thlah a. A thu min chah leh fahte, ka duhzawng ka sawi thinte kha a reh ta tlawk tlawk hian ka hria a. A thlahna hun hmang turin kan khua pan turin Aizawl atangin kan insiam a, chutah chuan ka thiante an lo lang sap sap a, kal thei lo turte thleng pawhin min lo vailiam an tum a, Mizo nih kha nuam ka ti em em mai a. Sawi dan ka thiam lo a, thlamuanna sawi hleitheih loh khan min chenchilh a ni ber.

Kartawp mai kha a la ni. Ka thianpa Andrew Fanai, ka nupui neih pawha min dinpuitu chu a pa in a boralsan thut a. Inrinlawkna engmah a awm lo. Lungphuchawl a ni. A nat dan tur hi mihring tawng hian a sawifiah thiam awm lo e. Dam reng chunga mu, dam tawh lo tur han kaihthawh tum chu a mi den a na viau ang. Thiante hoin a pa ruang thlahpui turin an zui leh sap sap a, hmana min zuitute tho kha an lo inpeih leh ap a. Mahse, dam reng chungin ka kal thei lo a! Ni e, Mizo chu ka ni si. Ka mi an lohna, mi ang lo ka nihna chu a lo chhuak leh a. Rual ka pawl lohzia a lo lang a, inthlahrunna nasa tak hian min tuam nawn awn awn a. Min va tuam rei dawn tehreng em.

I chenpui tuemaw ber kha lo awm ta lo nise, hrehawm i ti ve ngawt ang tiraw.? Ngaihtuah chhuah i duh miah lote pawh i ngaihtuah chhuah hun a la awm ngei ang. Mahse, tunah chuan engkim neitute chu engkimah thlamuantu Lalpa chuan a kalsang ngai lo tih ka hre ta thung a. Hla siamtuin, "Buaina tinreng tuara ka then takte kha, Van ropuina hain an hmel ka hmu ang," a lo tih angin, nakinah chuan lungduh kan then takte chu Van ropuina hain an hmel kan la hmu ngei dawn si a.

"Nakinah lawm takin,

Luipui kam mawi takah kan tawk ang."