Aizawl | July 9, 2019: Mizorama Zirlai pawl lian ber, Mizo Zirlai Pawl (MZP) General Headquarters-ah Executive meeting an pawl president L Ramdinliana Renthlei kaihhruaina hnuaia nimina neih chuan The Mizoram (Selection of Candidate for Higher Technical Courses), Rules chungchang, Mizoram leh Assam ramri chungchang leh Durtlang Mi rethei chenna Basic Services for Urban Poor Programme(BSUP) chungchang te an rel.
Tun hnaia NEET, JEE leh SMATEE result chhuaka Mizo zirlaiten result ṭha tak an nei chu MZP chuan lawmawm a ti hle a. NEET, JEE leh SMATEE result chhuaka hnam dang ti ṭha zualin ram leilung fate chanvo rawn chuh buai an awm ve chu MZP chuan a duh lo hle a, ram leilung faten an chanvo dik tak an chan theih nana MZP a inpuahchah mek laiin, Ni 8th July, 2019 (Thawhṭanni) zingkara Mizoram sawrkar Cabinet Meeting-in The Mizoram (Selection of Candidate for Higher Technical Courses), Rules 2016 hnuaia Mizoram Quota, Category 1-a dil theite, Indigenous People tia inziak chu Zo-Ethnic bak Indegenous an ni lo tia thutlukna an siam chu lawmawm a ti hle a. MZP chuan Mizoram Sorkar chungah thinlung takin lawm thu a sawi tak meuh meuh a ni. MZP chuan Cabinet Meeting-in a rel anga The Mizoram (Selection of Candidate for Higher Technical Courses), Rules 2016 hmanga Technical Courses hrang hrang zir tur thlang (Select) turin thuneitute kan ngen nghal bawk a ni. Hun lo kal leh zel turah hnam dang ram leilung fa ni loin Zofate chanvo chuh buai an tum leh a nih pawhin huaisen taka ding zel turin MZP chuan Mizoram sawrkar an ngen nghal bawk ani' tiin an pawl thuchhuah chuan a tarlang.
Mizoram leh Assam ramri buai en zuia, bawhzui tura a din committee sang ''Core Committee'' Mizoram Chief Secretary kaihhruainaa MZP leh Sawrkar official ṭhenkhat nena din chu meeting neih ni ṭhin mah se MZP chuan Core committee-in a vei dan chu a beitham hle niin a hria a, Committee-in MZP-te ramri chungchanga document ṭul leh pawimawh la khawm tura a tih angin, ni 16th April, 2019 (Thawhlehni)-a document a lo thehluh tawh tun thlenga bawhzuina awm lo chu MZP chuan hriatthiam har an tih thu an sawichhuak a.
"Bairabi Zophai hmuna Mizoram Chief Minister hmasa ber Pu Ch. Chhunga (L) leilet Mizoram chhunga Zofate chawlhbuk a lo sak tawh, Assam Police leh Assam Forest department-in rei lo te chhunga a ṭhiah lai leh a hnua sak leh tuma kal zirlaiten nasa taka vuak leh kah hial an tawh pawha chhantu leh thlavang hauhtu pawh an neih loh laia, tun hnaia Vairengte khaw daia Sipai Cinema Hall hlui, Assam Forest-ten sa ṭhaa, office atan an luah nghal thei mai hi pawi kan ti hle a. Sipai Cinema hall hluia Assam Forest-in an sak ṭhat an luah nghal hi Ni 12 July, 2019 ral hmaa an chhuahsan theih nana hma la turin MZP chuan Mizoram sawrkar an ngen.
Sipai Cinema hall hluia Assam Forest awmho hi Mizoram Sawrkarin a chhuahtir lo a nih chuan, ni 17th July 2019 ral hma hian Bairabi Zophai hmuna Mizoram Chief Minister hmasa ber Pu Ch. Chhunga (L) leilet, Mizoram chhungah hian Zofate Chawlhbuk hi Mizoram Sawrkarin sa ve ngei rawh se. Ni 17th July 2019 ral hmaa Zofate Chawlhbuk hi Mizoram Sawrkarin a sa thei dawn lo a nih chuan MZP chuan ni 19th July 2019 hian ''Ram chhan kawngzawh'' an nei dawn a ni.
MZP chuan, Durtlang khuaa mi harsa chenna, BSUP hmuna chengte chhiat tawhna leh nunna chan tate chu an tawrhpui thu sawiin, Mizoram sawrkarin he chhiatnaa mawhphurtu chhui chhuak tura enquiry committee a din chu lawmawm a tiin, mawhphurtu chhui chhuaka an phu tawk hremna pe ngei turin Mizoram sawrkar an phut a. He chhiat tawhna avanga awm hmun sawn ngai leh zirna in thlenga insawn ngai zirlaite chu an zirna senso tur a remchan dan angin tumsak an tum bawk a ni.
Post a Comment
He post chungchanga i ngaihdan lo sawi ve rawh: