Tlangval inkhel zo boral

Lunglei | July 25, 2019: Vawiin chawhnu khan Bazarveng, Lunglei tlangval C. Lalropuia (Lalmama) chu a inkhelh hnu deuhah tlu thutin a boral.

Lalmama te hi Inter Club Badminton Tournament, Serkawn Indoor Stadium-a khelhah Bazarveng Badminton Club hminga telin First Doubles-ah Mission Lalramdina nen tang dunin Zotlang BC nen an inkhel a.

An inkhelh zawh darkar chanve hnu velah Thingpui inin, Serkawn Indoor Stadium hmaa dawr kawt step-ah an ṭhu hahchawl a. Step-a a ṭhut lai hian tlu thutin a hnarkawn lam a sawh a, a Ka leh Hnar atangin thisen a chhuak a.

Chawhnu dar 02:30 vel khan Christian Hospital Serkawn panpui nghal niin a dinhmun a that loh avangin Outdoor atangin ICU-ah lakluh a ni a, tlai lam dar 04:00 vel khan doctor-in a boral tih a nemnghet a ni.

Mi inthlahrung leh mi pawi sawi lo; Lalmama hian a kum 34-na hmang mekin Gorisora P/S a SSA Teacher nilai a ni a, infiamna ngaina tak niin Bazarveng defender pawimawh a ni thin.

Tunah pawh hian Bazarveng FC (Lunglei), Assistant Coach a ni mek a, tukin pawh khan player te training a la neihpui. Vawiin khan Bazarveng FC U14 & U17 team te chu LDFA buatsaih Age Group Festival-a an inlan hun niin amah pawh hian kal ngei tum mah se, nghahchhuah tur a awm ta lo a ni.

Zanin hian lumenpui a ni ang a, naktuk chhun dar 12:00-ah vui a ni ang.

- Lunglei Chanchinthar