sorkar in mipuite himna (Safety) a ngai pawimawh tawk lo - MBJP GS Vanlalhmuaka

Aizawl | July 5, 2019: Bharatiya Janata Party Mizoram Pradesh (MBJP) general secretary Vanlalhmuaka chuan thuthar thehdarhtute kawmin, BSUP Housing complex a chhiatna thleng chungchanga a hmuh dan sawiin, "sorkar in mipuite himna (Safety) a ngai pawimawh tawk lo," a ti.

BJP Mizoram Pradesh chuan Mi 3 nunna hlu tak chan ta te ralna atan Rs.2000/ theuh leh mi 9 hliam tuarte kanna atan Rs 1000/- theuh chu YMA Durtlang Leitan Branch kaltlangin an hlan a, a tul anga an lo hman atan YMA Durtlang Leitan Branch kutah Rs 3000/-  an hlan bawk. 


 

A sawi zel danin Hmuaka chuan, "Durtlang Leitan Veng a Basic Services to Urban Poor (BSUP)Housing Complex, mirethei zawkte chenna in tia kan hriat a chhiat tawhna hmun 4th July, 2019 zing dar 6:30 khan BJP Mizoram Pradesh te chuan State President Charge la mektu Pu Hiphei Ex-MP, Dr B.D Chakma MLA, Pu Vanlalhmuaka, State General Secretary i/c Organization leh Party Workers mi engemaw zatin a hmunah kan han tlawh a. BJP Mizoram Pradesh chuan he chhiat tawhna avanga mi 3 nunna hlu tak chan ta te leh mi 9 hliam tuarte bakah chenna in chhuahsan ngai khawpa harsatna tawkte chu thinlung takin pawi kan tiin, kan tawrhpui tak zet a. Kan Pathian engkim ti thei chuan heng chhiatna thleng avanga harsatna tawkte hi thlamuanin  awmpui se tih hi kan tawngtaina a ni." a ti a.

Pu Hmuaka chuan, "BJP Mizoram Pradesh chuan he lai BSUP Housing Complex a chhiatna thlenna chhan – A in sak dan a that tawk leh tawk loh thu ah te, a insakna hmun a him leh him loh dan te, rinthu a insawi siak mai ni lova, he chhiattawhna chungchang chhui chiang tur hian State Sorkar hian a rang thei ang berin Independent Judicial Inquiry Committee dinin chhui nghal rawh se tiin BJP Mizoram Pradesh chuan state sorkar an phut  thu a sawi bawk.


"He chhiatna a a mawhphurtu chu danin a phut angin a Nodal Department lam an ni emaw, a in satu Contractor te an ni emaw, tupawh ni rawh se, dik tak leh fel taka chhui chhuah a, hrem ngei ni  se tih hi BJP Mizoram Pradesh te duh dan a ni.  Kan Chief Minister zahawm takin Inquiry Committee kan din ang a tih hi a lawmawm rualin, sorkar hmaiphih faina mai leh mipui thinrim tur tihdaihna mai ni lovin, Independent Judicial Inquiry Committee dik leh mipui rin ngam din ngei se tih hi keini BJP Mizoram Pradesh te chuan kan duh tak zet a ni." a ti a. 

"Tukin a BJP Mizoram Pradesh in he chhiat tawhna hmun kan tlawh lai hian he housing complex an sak laia hre chiang awm deuhte tawngkam kan hriat hian sorkar lam Department leh Contractor/ in satute hi an fimkhur tawk lo, sorkar in mipuite himna (Safety) a ngai pawimawh tawk lo niin a lang a. A hmun an laih lai hian Geletine hmanga he insakna hmun lung-pialtlep hi an bomb nasa niin an sawi a. Chu geletine a an bomb chuan he Housing complex pialtlep hi a ti nghet lo thei mai a an rin thu te an sawi a. Chu mai pawh chu ni lovin, tuna building pathum leitawlhin a delh tak zawnah hian retaining wall nghet leh leimin tur danna tha siam a nih loh thu mita hmutute atangin dawn a ni bawk.  Hemi avang tak hian Independent Judicial Inquiry Committee din hi BJP chuan a phut tlat a ni. He chhiat tawhna hi Sorkar tawngkam thiam a sawi mam chi leh zut mam chi a ni lo a, nunna hlu tak kan chan chhan leh hetiang chhiat tawhna hi a awm tawhna lohna turin Sorkarin awmze neiin, tih tak zetin hma la rawh se tiin BJP Mizoram Pradesh chuan kan CM zahawm tak hi Media kaltlangin thu kan thawn a ni." tiin a sawi bawk.

State sorkarin nunna hlu tak chan ta te zangnadawmna atana a Rs.4,00,000/- theuh pek a lo  tiam leh State in zangdawmna atana limit a lo neih  hi BJP Mizoram Pradesh chuan beitham an tih thu sawiin.  Tun a chhiattawk ten an chhawr hman turin kan State sorkar hian tun aia tam zawk hian zangnadawmna hi ti sangin, harsatna tawkte chhawmdawlna hi awmze nei thamin ruahmanna siam se tiin BJP Mizoram Pradesh chuan kan State Sorkar chu an phut a ni.

*** I Hun awlah website a fakna hi lo click ve rawh le. ***