RUAHSUR NASA AVANGA CHHIATNA HRANG HRANG UPDATE

Aizawl | July 14, 2019: Tunlai ruah sur nasa avangin Aizawl khawpui leh zoram hmun hrang hrangah leimin avangin harsatna a thleng mek.

Bawngkawn Salom veng-a LBS Suzuki Show room chhaka leimin avangin a chhak lama buiding chu dinhmun hlauhawm takah a ding mek a, leimin hian LBS Suzuki dawr chung lam leh hnuai lam panna kawng a hnawh ping. Nimin zing khan Disaster management lama mithiam a hmunah thil awmdan an enfiah a, a tul anga hma lak chhoh a ni ang. 

SERCHHIP LAM - Tunhnaia ruahsur nasa avanga chhiatna thleng mekah Serchhip Saron Veng-a Pu R. Lalduhawma In sak lai leh a hnuaia Joseph Topno te In saklai te chu Inrinni zan dar 10:30 vel khan an tlu sawp a, mihring thi leh hliam an awm lo. 

*** I Hun awlah website a fakna hi lo click ve rawh le. ***

Heng In saklai te hi an tluksawp hnu hian Thumbawk lui-a tui luanna kawr chu a chhaklam atanga lei tawlh chuan chhilhin a bula H. Kaptluanga te In chhuahsan tawh chu nasa takin tuihawk leh chirh a lut a, mi tlawmngai te chuan thenfai hna thawkin an buaipui nasa hle a ni. 

Nimin Inrinni khan ruah nasa taka a sur leh avangin a bula In, F. Sawithanga te In pawh la tlu chiahlo mah se chhan ngaihna awm lovin a la awm zui ta zel a, F. Sawithanga te In hi a ban thlanglam zawng zawng inkhai tawh a, he In hi tun dinhmunah chuan thiah ngam a ni tawh lo niin khawtlang hruaitute chuan an sawi.

Serchhip Darnam Veng-a Chhuanmawia te In pawh luahzui ngam a nih loh avangin nimin zing khan an inthiar chhuak a, he In hi Darnam Veng atanga Dinthar Thlanmual panna kawnga awm niin an In bul min chuan a ban thenkhat a ti chhia a, a thlanglam hi min zui theia a awm bawk avangin nimin khan mi tlawmngai ten an bungrua te an thiarchhuah sak a ni.

Serchhip bialtu MLA, Pu Lalduhoma chuan nimin zing khan Aizawl atanga Serchhip thlengin vanduaina thlenna hmun a tlawh a, YMA hruaitute kawmin Serchhipin leimin vanga harsatna a tawh thin chunga hmalak ho dan turte a sawipui a ni. Serchhip bialtu MLA hian Zirtawpni lamah khan vanduaina thlenga hnatlangte'n mamawha an hman turin Saron Branch YMA hnenah Rs. 2000/- a lo pe tawh a, niminn khan Serchhip Dinthar Branch YMA hnenah Rs. 3000/- a hlan leh bawk a ni.

Hemi hnu hian tunhnaia ruahsur avanga mahni In chan te zawng zawng tlawhchhuakin leimin avanga mahni In luah ngam lova chhuak mekte pawh an awmnaah a tlawhkual vek bawk a ni.

KHAWTTHLANG TUIPUI - Khawthlang Tuipui lian avangin Tlabung leh a chhehvelah harsatna a thleng chho mek a, Lunglei lam atangin Tlabung kalpawh theih a ni rih lo.

Khawthlang Tuipui lian zel chuan Tlabung mai bakah a chhehvel khuate chu nasa takin a ti buai mek a, Tlabung khaw chhung bikah chhungkaw 150 vel chu an chenna in atangin an insawn chhuak tawh a, Tuikuk kai (Tiperaghat) atangin chhungkaw 130 vel an inthiar chhuak tawh bawk. Lamthai (Tablabaghj) ah chhungkaw 80 vel hmun him lamah suan chhuah an ni bawk.

LEIMIN - Sihphir leh tuichawng inkarah leimin vanga inkal pawhna kawng hnawh lian tham hmun 48 lai mai a awm a, Tuichawng leh tlabung inkarah hmun 50 velah lei min  a awm bawk. Lirthei kal tlang thei turin engtik hunah nge heng hi thenfai/siamthat a nih ang tih ngaihruat thiam theih rual a ni rih lo. 

POWER LINE - Lungsen to Tlabung Power main line, thingtlu in wire a delh chat nasa hle a, leimin vanga ban tlu a tam hle bawk. Leimin vangin kawng a ping a, Power line chhia siam tur pawhin a chhiatna lai hmanrua nen kal thlen hleihtheih a ni lo. Power line chhia avangin eng chen nge eng an neih theih dawn loh sawi theih a la ni lo.

Power supply a chhia avang hian mobile phone tamtak battery a down tawh a, inbiakpawhna a mumal lo hle bawk. Airtel, Jio leh BSNL-ten diesel generator hmangin khawl an tinung hram hram a, YMA ten mobile signal a that theih nan theihtawpin hna an thawhpui a ni.

EI LEH BAR -  Tuilian avangin ei leh bar kawngah harsatna a awm hriat a la ni rih lova. Nitin ei chawp man ti sang an awm hriat a ni lo hi thil lawmawm a va ni tehreng em! Ei leh bar mamawh zuartutten chhiatna thleng avangin an bungraw lak sate ti to lo turin SDO Civil chuan dawrkaite a hriatir a, he ngenna hi an la zawm tha viau niin thu kan dawng. Mizo nih a nuam thin teh e.

KUM DANG TUI LIAN NENA KHAIKHIN - Kum 2017 & 2018 tuilian nena khaikhinin kumin tui lian hi a muang deuh ruih a. Ruah a sur rei tawh em avangin kum 2018-a tuilian chimchin aiin 5 ft.velin tunah hian a la hniam a ni. Vawiin lam thlengin ruahtui tla hian ban zai a la rel lova, khuarel chhiatna thleng hian zual lam a la pan zel thei tura ngaih a ni.

HNAHTHIAL - Tun hnai ruah nasa tak sur avang khan Hnahthial khawpui-ah pawh hmun engemaw zatah leimin avanga harsatna tawk thleng a awm nual.

Pu J Lalchhuana kawmthlang National Highway kawng pui chhak chu a min a, Thil pawi lutuk erawh a thleng lova, a thlang IKK Biak in kawng erawh a hnawh ping a ni. Hnahthial Electric Venga Pu T. Roliana in pawh an kawmthlang min avangin min hlauhawmin a awm mek. He in hi chhungkaw hnih luah lai niin, an inthiar chhuak tan tawh a. Hnahthial Model Venga Pu Rochungnunga leh Pu J. Lalrokima te in pawh a thlang lam lei min avangin luah ngam lovin an inthiar chhuak bawk a, Pu Rochungnunga in phei chu thiah nghal a ni.

Hnahthial Peniel venga Pu MC Lalhmingliana in sak thar thlathara luah an tum chu a che a, a bang a khi nasa hle bawk. Peniel Veng Pu H. Tlangmawia (L) te in midang luah lai chu an kawmthlang min avangin an inthiar chhuak bawk a ni. 

Hnahthial khawpuia chhiatna thlenna hmunte hi SDO (Sadar) Pu C. Khamluaia chuan tlawhin a tul anga hman atan silpouline a pe nghal hlawm a ni. 

Hnahthial chhim lam atanga National Highway pawhna kawng chu leimin in a hnawh vek a, National Highway erawh a tlang hram hram rih a ni. Hetih lai hian Hnahthial leh Lunglei inkar National Highway No. 54 chu Bel-pui-lui bula leiminin kawng a hnawh a, leimin hian hmawng kung lian tak a minpui avangin thenfai a hautak hle niin PWD National Highway Sub Divsion SDO Pu H. Lalnunmawia chuan a sawi.

PU MAFAKA RUANG LA HMU LO - July ni 11, 2019 (Ningani)-a Tlawnglui Dialdawk kai chhaka chesual chu a ruang zawn mek a la ni a, tui lian hian kam lam a pan hleithei lova, ruang zawn a khirhkhan hle a ni. Pu Mafaka ruang zawn hna hi eng chen nge thawh ngai dawn hriat a nih loh avangin CYMA chuan hetiang hian ruahmanna leh ngenna a siam - 

Pu C Lalfakzuala (K-53) Govt. Complex Aizawl chu Ni 11.7.2019 khan Sairang Tlawng luiah a chesual a. A ruang hi la hmuh loh anih avangin khawpui chhung Branch YMA aṭangin member 10 (sawm) zel  tlawmngaia tui tla ruang zawng tur hian a inchhawk  a thawkchhuak turin ruahmanna siam ani a. Khawpui chhung Branch YMA te lo inring turin kan in hriattir a ni.

*** I Hun awlah website a fakna hi lo click ve rawh le. ***

Tun dinhmunah Tlawng lui hi a chim chin a sang zel a, fimkhur a ngaih em avangin Branch YMA thawk chhuak turte chuan kan Branch aiawha thawk chhuakte hming list nei vek turin kan in ngen a. Tin, Branch member thawkchhuak turte pawh hi, disaster management lama thiamna nei bik emaw hetiang lama thiamna nei bik inthlan hram nise.

A hnuaia tarlan Branch te hi Ni 14.7.2019 (chawlhni) hian tlawmngaia ruang zawnga thawk chhuak turin Central YMA chuan a ngen ani

1. Edenthar Branch YMA

2. Hunthar Branch YMA (Edenthar branch leh Hunthar Branch hi Buichali leihlawn a duty tur a ni ang) 

3. Vaivakawn Branch YMA

4. Zotlang Branch YMA (Vaivakawn Branch leh Zotlang Branch hi Sairang Balu kai a duty tur a ni ang) 

5. Kanan Branch YMA

6. Chanmari West Branch YMA (Kanan Branch leh Chanmari West Branch hi Sihhmui kai a duty tur a ni ang)

(Chawhma Dar 10:00-ah mahni RV - ah ṭheuh member thawkchhuak hming list hi thehluh hman nise) 

Sd/- (LALHMACHHUANA)

General Secretary, Central YMA

KAWLCHAWAH NAUPANG TUI TLA -  Nimin 13/7/2019 chawhnu 3:00 vel khan Kawlchaw 'W' naupang Lalengmawii (5) mi  Pu Vanlathanga fanu chu an inbul maia kawrte tuilianin lain Chhimtuipui-ah a len lut a, a ruang zawn mek a ni.

- Mizo Special Report



*** I Hun awlah website a fakna hi lo click ve rawh le. ***