Hun tiam chhungin Sawrkarin ramri chungchangah hma la lo; MZP in zirtawpni-ah 'Ram Chhan kawng zawh' huaihawt dawn

Aizawl | July 17, 2019: Mizo Zirlai Pawl (MZP) general headquarters chuan vawiin khan Aizawl Press Club ah an president L Ramdinliana Renthlei hovin thutharthehdarhtute kawmin, Ramri chungchanga sawrkar hmalakna duhkhawp lohna lantirnan Ram Chhan  kawng zawh an huaihawt tur thu an puang.

MZP hruaitute an president hovin

MZP president L Ramdinliana Renthlei chuan, "MZP chuan kan pi leh pu te luahchin ram humhalh a nih theih nan nasa takin hma a la thin a, hemi kawnga hma a lakna pakhat a tan tiin kum 2018 ni 20 February khan Zofate Chawlhbuk chu Mizoram Chief Minister hmasa ber Pu Ch. Chhunga(L) leilet Zophai Bairabi hmunah sak a ni a. Zofate Chawlbuk hi Assam Police leh Assam Forest Department ten zan dar 10:00 vel a lo thiatin Buk sakna hmanrua zawng zawng pawh an la bo nghal vek a ni. Ti chuan ni 8th March 2018-ah Zofate Chawlhbuk sa leh turin hnatlang koh a ni a mahse hnatlang a kal te chu Assam Police thahnem takin an lo dan avangin sak theih a ni ta lo a, ni 10 March 2018 chuan Zofate Chawlhbuk hi sak luih tum a ni a, Zofate Chawlhbuk sak tum a kal Mizo zirlaite leh Media mite chu Assam Police chuan dimna tel miah lo a lo vua in leh Silai hmanga lo kah an ni a. Hetah hian zirlai thahnem tak leh kan Media mite pawhin hliam an tuar a ni." a ti a. 

MZP chuan Bairabi Zophai hmun a Mizoram Chief Minister hmasa ber Pu Ch. Chhunga(L) leilet Mizoram chhung a lo sak tawh Assam Police leh Assam Forest Department ten reilote chhunga a thiah theih lai leh a hnu a sak leh tuma kal zirlaite leh Media mite nasa taka an vuak leh Silai a kah hial an tawh chung pawh a chhan tu leh thlavang hauh tu pawh an neih loh lai a, tun hnaia Vairengte khawdaia Sipai Cinema hall hlui Assam Forest ten sa tha a office-a tan an luah nghal thei mai kha pawi kan ti hle a. Sipai Cinema hall hlui a Assam Forest in, In an sak that an luah nghal hi ni 12th July 2019 ralhmaa chhuah tir turin Mizoram Sorkar kan ngen a. Tin, an chhuah tir lo a nih chuan ni 17th July 2019 ralhmaa Bairabi Zophai hmun a Zofate Chawlbuk sa ve ngei turin Mizoram Sorkar chu phut a ni a, ni 17th July 2019 ralhmaa Zofate Chawlhbuk sak a nih loh chuan ni 19th July 2019 ah "RAM CHHAN KAWNG ZAWH" neih ni se tih a nih angin vawiin thleng a kan thil phut ang te Sorkarin a tih hlawhtlin tak loh avangin MZP chu ni 19th July 2019(Zirtawpni) hian "RAM CHHAN KAWNG ZAWH" nei turin a inbuatsaih ta a ni.

MZP president chuan, "Nikum 2018 Zophai Bairabi hmun a MZP te hmalakna avang khan Central Sorkar auh ei a lo ni tawh a, Central Sorkar kaihhruaina hnuiah Mizoram leh Assam te nen meeting neih thin a ni a, Inner Line Reserve Forest Area 509 Sq. Miles chhunga dan lo a awm Building leh huan leh ram te enfiah nise tih a ni a, hmun engamawzat enfiah a ni tawh a, Phaisen area enfiah a nih dawnin kan duh dan a in an loh avangin chhunzawm theih a ni ta rih lo a. Central Sorkar hotute chuan Mizoram team lam chu in Sorkar hotute nen in ram china in pawm han sawifel ula min lo hrilh leh anga kan inbe leh dawn a nia an ti ta a ni. Hemi a nih avang hian Mizoram leh Assam ramri chungchang a inbiakna chu Mizoram Sorkar kutah a tang ta rih a ni." a ti a.

Tun Sorkar thar MNF Ministry ah pawh hian Sorkar thuneitute Chief Minister, Home Minister leh Bairabi Zophai bialtu Minister pawh vawi tam an sawipui tawh a, Mizoram-Assam ramri chungchang ngaihtuahtu tur committee sang "Core Committee" pawh din thar leh a ni a, meeting pawh neih tawh niin chanvo te pawh insem a ni a, MZP chu ramri chungchang a document  lo la khawm tura tih an nih angin an document lakkhawm te chu ni 16th April 2019  khan Chairman Core Committee hnenah an thehlut tawh a, an thehluh atang khan hmalakna engmah hmuh tur a awm zui ta lo niin a sawi bawk.

"MZP chuan Mizoram kan chan belh zel loh nan leh kan Pi leh Pute luahchin ram Mizoram chin humhalh a, kan neih let leh ngei theih nan hma kan la chhunzawm zel dawn a, Mizoram leh Assam ramri buai chungchang a hmalak a buaina siam ngawr ngawr hi MZP duhdan a ni bik lo a, kan hmalakna hmang hian Mizoram Sorkar auh ei kan tum mai zawk a ni. MZP hmalakna avanga harsatna lo tawk an lo awm a nih chuan hriatthiamna kan ngen a, Mizoram leh Assam ramri chungchang a hmalakna hi mimal hamthatna tur atan leh Political advantage a lo lakna chi a ni lo a Mizo mipuite kan zavaia kan tanrualna tur a nih angin Mizo mipuite tangrual vek turin MZP chuan kan sawm a ni," a ti.

Hetiang hian "RAM CHHAN KAWNG ZAWH" dan tur pawh ruahmanna siam a ni.

1. Khatla kawn atangin:

i) Pachhunga University College ii) Govt. Aizawl College iii) Govt. T. Romana College

iv) Govt. Jonhson College v) Aizawl City College vi) Mizoram Law College

vii) MBSA  viii) LSA ix) MSO x) PZP

2. Zarkawt kawn atangin:

i) Govt. Hrangbana College ii) Govt. Aizawl West College iii) Govt. Aizawl North Collge iv) Govt. J. Thankima College v) Govt. Zirtiri Residential Science College vi) ICFAI

vii) Women Polytechnic Aizawl viii) HSA ix) SSPP x)  RSU

"RAM CHHAN KAWNG ZAWH" hi Khatla kawn atangin leh Zarkawt kawn atangin dar 11:00AM atanga tan tur a ni a, Vanapa hall kawt-ah intawhkhawm tur a ni ang. "RAM CHHAN KAWNG ZAWH" neihna a lo kal tur hian MZP chuan ram hmangaih tu zawng zawng te thinlung takin an sawm nghal a. Mizo mipui zawng zawng "RAM CHHAN KAWNG ZAWH" na a  tel vek turin mipui an sawm.