CM Zorama'n SRS Ruihhlo man halral

Aizawl | July 20, 2019: Central Young Mizo Association (Central YMA) hnuaia ruihhlo do pawl, Supply Reduction Service (SRS) batch 9-na ten ruihhlo chi hrang hrang an mante chu tukin dar 7:30 khan Tuikhuahtlang a Central YMA Office Complex ah halralna hun hman a ni a, Chief Minister Pu Zoramthanga’n hmanpuiin a halral.

- exploremizoram.com

Ruihhlo halralna inkhawm hi Central YMA General Secretary Tv. Lalhmachhuana’n kaihruaiin SRS Asst. Convener Pu K. Lalthanmawia’n hunserh a hmang a, SRS Convener Pu K. Lalthlantuma’n report pein, Central YMA President Pu Vanlalruata, Home Minister Pu Lalchamliana, Excise & Narcotics Minister Dr. K. Beichhua leh CM Pu Zoramthanga ten thu an sawi.

Thusawitu Chief minister Zoramthanga chuan, Zoram leh ṭhalaite runtu, nu leh pa tam tak ṭahna thlentu ruihhlo do turin theihtawp chhuah a hmalak a ṭul thu a sawi a.  Ruihhlo do tur hian Supply tih tlem bakah demend tih tlem a ṭul thu sawiin, hemi atan hian Mizoram sawrkar chuan Ruihhlo ngaite enkawlna tur ṭha tak din turin hma a la a, Karleh nilaini khian Seṭhawn Thingdawl a a sakna hmun tur en turin sawrkar hotute an kal tur thu a sawi bawi.

CM chuan, sawrkar hmalaknaa kut rawlh duh mi ṭhehnemngai an tam tih sawiin, an chhungte hriatrengna atana in sak inhuam pawh an awm nual tawh niin a sawi bawk.


Vawiin a ruihhlo halral hi cheng 25,02,000 man hu a ni.

SRS Batch 9na te hmalakna hi April 4 aṭanga July 20 thleng niin, hemi chhung hian Ruihhlo chi hrang hrang cheng 82,17,625 man hu an man a. Mihring 47 home ah dahi, 66 Excise kutah hlanin, Police kutah 19 an hlan bawk a. Mihring man zawng zawng hi 852 an ni bawk.

SRS batch 9na in an hmalakna atana sum an hmanral zawng zawng hi cheng 6,19,000 a ni bawk.