BLOOD RAIN AND THE TEN PLAGUES OF EGYPT

(Hmun Thenkhata Tui Chu Thisenah a chang!)

★Opeey-a Khiangte

-------------------------------------------------------

Tun tum chu, Thisen anga Ruah sur vak thin leh Mosia-in Israel-te hruaichhuah nana Egypt rama Thilmak 10 a thlentir leh, Tun hnaia Khawvel hmun hrang hranga, Tui Thisena chang tate chanchin kan sawizau dawn nia.

Blood rain hi Red rain tite pawhin sawi a ni thin a. Thinsen ang maia sen phut chu ruah angin a sur a ni. Engtia chutianga sen ta phut mai nge maw a nih chu le! a va mak ngai ve le! a chhan dik tak hre ve tur chuan chhiar thla zel ang u hmiang..

Hetianga Thisen anga Ruah sur thu record hi 8th century BC-a Homer-a thuziak Iliad-ah khan a lo awm daih tawh a, a lar hle bawk a ni. 17th century hma lam kha chuan, khatianga Ruah sen ta phut mai kha Thisen ni ngeiin an lo ngai thin a.  Literature mirrors cult practice atang phei chuan, Thisen rawng leh thisen anga ruah a awm a nih chuan, thil tha lo leh vanduaina lam hawi (bad omen) rawn thleng turah an ngai hial thin a ni.

Amaherawhchu, Blood rain sur thinna hmun hrang hrang Record-ah chuan, a surna hmun huam chin hi a zau lo thin hle a ni. A sur rei zawng pawh a inanglo ve thluah a, a chang chuan, rei lo te a sur laiin, a chang chuan ni engemaw chen chhungte a sur thin bawk.

17th century a lo herchhuah chuan, A chhan ni a an sawi leh ngaihdan Thlarau thiltih anga an rin thin chu, a lo danglam ta deuh a, Khawvel awmphung vanga thilthleng niin an lo ngai tan leh ta a ni. 19th century a lo inherchhuah meuh chuan, blood rains chu  scientific taka endikin an chhui a, Vaivut nawi (dust)-in ruah a pawlh vangin, ruah rawng chu a lo lang sen ta phut mai a ni tiin an sawi ta a ni.

Tun lai hrilhfiahna tlanglawn ber chu, Khatianga Ruah sen chhan chu Vaivut nawi leh Thilnung te tak te te (micro-organism), algae-te chu ruahah an tam luattuk vang a ni. chu chu tun laia an rin dan ber a ni.

Blood rain history hi ancient time atangin tun lai hun thleng hian hmuh tur a awm a. Literature lama record upa ber chu, kan sawi tak Homer's Iliad-a inziak kha a ni. chu thuziakah chuan, pathian Zeus chuan indonaa hmelma a thahte thisen chu vawi hnih lai blood rain-ah a surtir a ni.

Chutiang chiah chu poet Hesiod-a'n a thuziak 700 BC-ah a lo record tawh nghe nghe a ni. Mahse, author John Tatlock chuan Hesiod-a thuziak kha chu Illiad behchhana ziah mai a ni e a rawn ti ve leh tlat thung a ni.

Northern leh western Europe-ah pawh, blood rain a lo awm tawh thin a, chu chu contemporary writers-te'n an thuziakah thil tha lo thleng tiin an lo record thlap hlawm a ni. Anglo-Saxon Chronicle-ah pawh Britain-ah Thisen Ruah sur ni a record a awm nual bawk a.

Bawnghnute leh butter te chu Thisenah a chang a tihte an lo ziak a ni. Tatlock-a phei chuan khang thil record te kha thilthleng tak tak vek an ni a, a thlen atanga hun rei tak liam taa record an ni a ti. Gregory of Tours pawhin Paris-ah Thisen ang maia sen a sur vak a, mipui kawr te chu thisenin a bual a, an rap em em hlawm a ni tih a record bawk.

Blood rain lo sur thu record hi a tam tawh hle a, sawi kim vek lo phawt mai ila, tun hnai mai kum 2012 thleng khan record a la ni cheu zel reng a ni.

Sri Lanka-a Sewanagala district,  Monaragala, Manampitiya leh Polonnaruwa-ahte pawh November 14/15, 2012 khan, minute 15 chhung Blood rain a sur a. Department of Meteorology-a senior official pakhat sawi dan chuan, Ruah sen phut lo sur chu Khawvela awmphung ve hrim hrim ni lovin, Factory hrang hrang atanga chemicals chhuakte chu chhumah an chho va, chhum nen a inpawlh ta pawh a ni thei a.

Mahse, a lehlamah chuan, Sri Lanka Department of Meteorology atanga thu hriat leh danin, Sri Lanka-ah chutianga ruah tisen vek thei tur khawpa tam factory a awm tlat bawk si lo a ni. Khawi hmunah emaw Tornado tlehin leinawi chu chung lamah a chhem chho va, ruahah an lo sur leh pawh a ni thei tho bawk. Kerala, India-ah pawh kum hmasa lam khan red rain a sur a.

Indian scientists-te chuan chung ruah sample-te chu lain an endik ta a. chutah zet chuan micro organisms tam tak an hmuchhuak ta a ni. micro organisms chuan DNA an neih tak si lovah chuan, thil mak tak chu a ni ta tho mai a ni.  Medical Research Institute (MRI) Director Dr Anil Samaranayake-a chu zirchianna nei turin Health Ministry Secretary chuan a tir ta a.

Ministry of Health chuan red rain-ahte chuan bacteria-ina a siam, Patek chi (algae) a hmu tih a report ta a ni. Thenkhat chuan ruaha bacteria awmte chu alien bug an ni maithei tiin an sawi a. Kerala-a red rain a sur hma chiah khan, Ri ring lutuk a rawn awm hmasa phawt a, Simeikhu (comet) puak ni awm tak a ni a. chuta tang chuan red cell a perdarh ta chum chum a, ruahtui nen a inpawlh ta ni a ring an awm bawk.

Ruahtui thisen ang maia a sen phut chhan ber kha bacteria (natna hrik chi khat) vang mah nise, khang bacteria te kha khawvel pawn lam atanga lo lut niin an ring a. UFO nena inlaichinna nei thilthleng ni a ngaite pawh an tam hle a ni.

Ruah thisen anga sen phut mai thin chu THISEN a ni ti a sawi an awm thin a. Mahse, Science lam atanga chhui chuan, thil belhchian dawl lo tak a ni a, Pathianin khawvel finna a pek chuan Thisen a nih lohzia a finfiah ta a ni.

Tun hnai mai khan, Tui Thisenah a chang a, a Sen phut tih a tam em em a, chu chu ram hrang hrangah a thleng a, Video en tur pawh a awm nual bawk. Thisenah a chang tak tak ni lovin, Thisen angin tui rawng (color) chu a lo sen zawk a ni. Chongqing, China- Yangtze River, canada chhak lama lui tui,, Ohio, Bolivia, Utah, spain, Slovakia, Sydney’s beaches-a tui leh hmun dang danga tuite chu a lo sen vek a. Wichita, Kansas-ah pawh February 18 2014 khan tui thisen ang sen phut hmuh a ni bawk a.

Hmun dang dangah pawh lui tui leh dil tui thisen ang a lo sen thut a tam hle a. Mi tam tak chiaiin an thlabar hle a ni. Mahse, thisena chang ni lovin Tuiah te chuan Patek (Algae) siamtu natna hrik awm vanga tui rawng lo sen ta zawk niin mithiam-te'n an sawi a ni.

Eng thil vang bera lo sen pawh chu ni tehreng se, Lalpa lo kal lehna (Second Coming) hnaih tawhzia tilangtu a ni thei ang em?

Tui Thisen anga sen phut hi tun laia thilthleng mak em em a nih rualin, Bible History-ah pawh a lo awm ve tawh tlat mai! Bible-a Tui Thisena chang chungchang inziak pawh kha, Thisen tak tak a ni meuh ang maw? scientist-te finfiah dan han chhui thla chhin dawn teh ang u..

MOSIA (Moses)

(Exodus 7:20-24)

20. Tin, Mosia leh Arona chuan LALPA thupek ang chuan an han ti a; tin, tiang chu a han lek a, Pharaoa mithmuhah leh a chhiahhlawhte mithmuhah chuan luia tui chu a han vua a; tichuan luia tui zawng zawngte chu thisenah a chang ta vek a.

21. Tin, luia sanghate chu an thi ta vek a; tin, lui chu a uih ta hluah hluah a, tichuan Aigupta mite chuan luia tui chu an in thei ta lo a; tin, thisen chu Aigupta ram chhung zawng zawngah chuan a awm zo ta vek a.

22. Tin, Aigupta rama mitlak dawithiamte pawh chuan an dawi hmangin chutiang bawk chuan an han ti ve a: tin, Pharaoa thinlung chu tihkhauhin a awm a, tichuan an thu chu a ngaithla duh ta lo a; LALPA'n a sawi tawh ang khan.

23. Tin, Pharaoa chu a in lamah chuan a hawng ta a, chung pawh chu a thinlungah a lungkham chuang hauh lo mai a.

24. Tin, Aigupta mi zawng zawngte chuan tui in atan lui kam velte chu an lai chiam a; lui tui chu an in thei si lo a.Tin, LALPA'n lui a vuak achin chu ni sarih zet a tling a ni.

Aw le, a ngial a ngana Lui tui thisen tak taka chang ni ta sela zawng, Luikam maia tui haichhuah chu a in filter fim thei dawn reng reng si lo a ni.

__________________________________________

♦ (Red Algae and Other Explanations)

Pathianin Mosia hmanga Nile lui thisena a chantir kha, A ngial a ngana Thisen tak taka chantir ni lovin Khawvela thil awmsa, tui tisen thei tur natna hrik chi khat a hmang zawk niin a lang. Chutiang chu lo ni ta se, chu chu hypernatural miracle tih a ni ang.

Pathianin a thilsiam awmsa hmangin thil awm dan a tidanglam kual zawk a ni. A duh dan tihpuitlin nan, a thilsiam kalphung (natural law) leh natural phenomena a hmang tangkai ta mai zawk a ni.

Chu chu Thlarau lam thiltihtheihna ni lovin, Hmun, Hun, matter leh thahrui inpekchaw tawnna (laws of physics) zulzuia a thiltih a ni zawk. Chuvangin, Hypernaturalism atanga hrilhfiahnaah chuan, Pathian thilmak tih tam takte hi chu, amaha thiltihtheihna (divine power) leh khawvela a thilsiam kalphung (natural law) mila a pholan an ni.

Mosia-in a tiang hmanga Nile lui Thisena a chantir chungchangah hian,  scientific explanations hrang hrang pawh a tam hle a. Kum 1957 khan, scholar Greta Hort chuan khatia tui a sen vek chhan chu, chhim lama Nile lui fintu lui dangte'n hnawl (silt) a rawn lenkhawm a.

chung silh-ahte chuan natna hrik chi khat flagellate protozoa a awm niin a sawi.

Marr leh Curtis D. Malloy-te pawhin, Tuiah khan toxic red algae awm vang niin an sawi bawk a ni.

__________________________________________

♠ The Ten Plagues of Egypt

(Scientist prove the Ten Plagues of Egypt really did happen)

Mosia-in Israel fate, Aigupta sal ata hruaichhuah a tum khan, Pharoah-a chuan luhlul chhuahin a lo phallo bur mai a. Chuvangchuan, Pathian thiltihtheihna hmangin Mosia chuan, Pharoah-a thinlung hmin tumin thilmak 10 a thlentir a. chung thilmak 10-te chu "Ten Plague of Egypt" tih a ni a. chung thilmakte chu a hnuaiah hian i belchiang ve teh ang u:

1) The River Nile turned to blood

2) Frogs

3) Lice and mosquitoes

4) Flies

5) Diseased livestock

6) Boils

7) Thunder and hail

8) Locusts

9) Darkness

10) Death of the first born

Mosia khan Egypt (Aigupta) sal ata Israel (Juda/Jew)-ho hruaichhuah a tum a,  Mahse, Aigupta Lal Pharoah - Ramses chuan a phal ta lo bur mai a ni. Chuvangchuan, Pathianin a thinurna rapthlak tak mai chu Egypt ramah a leihbaw ta a ni. Tui thisenah a chantir a, Chungû/Utawk (frog) a tipuang vak a, Hrik, Tho, Khawihlipui te lengin, Thim (darkness) leh Thihna hial a thleng ta chuah chuah mai a ni.

Scientists leh archeologist-te'n khang thil thlen dan kha mumal deuh leh ril zawkin an chhui chiang ta a. Chutianga an chhui dan chu kan en dawn a ni.

Archeologist-te rin dan chuan, khang Hripui 10-te kha Nile Lui bula Pi-Ramses khawpuiah a leng a nih an ring ber a. Pharoah Ramses II (1279BC-1213BC) lal laiin, Pi-Ramses khawpui chu Egyptian khawpui ber pawh a ni an ti bawk.

Chulai hmun vela finfiahna (evidence) an hmuhchhuah atang chuan, Archeologist-te'n, kum 3000 liam taa Khawpui hausa tak ni thin kha a lo ram ta a ni tih an hrechhuak thei ta a ni. Hripui 10 leng kha khawpui ram chhan pawh ni ngei turah an ngai bawk.

Mahse, zawhna awm thei ta chu, engvang tak chuan maw khawpui an lo rauhsan ngawt tih hi a ni. A bul berah chuan, Pathianin israel fate chhanchhuak turin Pharoah Ramses-a rilru hmin a tum vangin, Hripui a lentir kha a ni. scientists tam takin an chhui nasa thin hle a.

A bik takin, Climatologists-te'n khatih hun laia sik leh sa (ancient climate) kha an zir ngun hle a, Ramses II hun tawp lamah Sik leh sa inthlak danglam nasa tak a awm ngei a ni tih an hrechhuak ta a ni. Egypt ram puk tam taka Stalagmite hrang hrangte chu an zirchiang zel a.

Tichuan, Lunga Radioactive element awm dan atangte chuan Pharoah hun laia sik leh sa kha chiang takin an hre thei ta a ni. Ramses-a Lal lai khan, khua a lum hnawng a, mahse, sik leh sa (climate) chu a ro ta ruai ruai a ni.

Heidelberg University's institute for environmental physics-a thawk paleoclimatologist, Professor Augusto Magini sawi dan chuan, "Pharaoh Ramses II lal lai kha boruak nawm hun lai tak a ni a. Ruahtui a tam a, a ram leh khawpuite pawh a thang chak hle a ni.

Amaherawhchu, khatia boruak hnawn hun kha kum tam a ni ta lo va. Ramses-a lalna a tawp hnu atang phei chuan, boruak a danglam nasa hle tawh a ni. Boruak hnawng chu boruak ro takin a thlak chho zel a, chu chuan nghawng na tak a nei ta a ni.

Scientists-te chuan khatia boruak inlumlet lai tak kha Hripui hmasa ber, Tui Thisena a chan chhan kha niin an sawi a. Boruak temperatures lo sang ta vak chuan Nile lui luang a timuang ta hle a, ancient Egypt lui luang chu a lo dum (muddy) deuh tan ta a ni. 

Thisen anga a lan sen phut chhan ber chu,  Oscillatoria emaw, Burgundy Blood Algae, toxic fresh water algae te hi tui dum awmnaah chuan an awm thin hrim hrim a. khatih hun laia Nile lui luang muang ta lutukah khan hnawl leh dum a tam hle dawn a, khangahte pawh khan natna hrik algae te chu an awm dawn tihna a ni.

Algae vangin tui chu thisen ang maiin a sen tlat zel si a, khatih hun laia Nile lui thisena chang tih Bible-a kan hmuh pawh kha, thisen ni lovin tui sen mai niin a ngaih theih ta a ni. Hmun khatah a awm tawh chuan, Thosi, tho leh rannung tam takin Algae siamtu natna hrik chu pudarhin, tuikhur leh bela tuite pawh a tihsen phah thei bawk.

Scientists-te chuan, Chungû/utawk, lice leh Tho, Thosi puang vak te chu Tuiluang muang lutuk leh dum hmun chuan a awmtir thin hrim hrim bawk a ni. Chu chu Pathianina a lo duan dan pawh a ni a, chu method chu a hmang ta niin a lang.

Ulawng atanga Utawk/Uchang puitling ni turin Ulawng taksaa hormones chhuah danin a hril hle a, chutia a induan chho dan process chu, a awmna hmun environment-ah a innghat em em bawk a ni. Utawk puitlin chakna kawngah chuan patek (Algae) chu kawngro su hletu a ni leh bawk.

Tui tling leh luang muang taka patek awm chu Utawk leh Uchangte inthlahpun chak em emna hmun a ni tlat si a ni. Utawk hi an tam luattuk chuan, riltam vangin rei lo te chhung lek an thi phawk phawk zel thin a, a maka maka tam an thi hman ta thin a ni.

Luia Algae awm leh Utawk thi tawih awmte chu Tho leh Lice tan chuan pian zawih zawih theih khawpa hmun remchang leh an tana vitamin tha ber a ni leh tlat a ni.

Leibniz Institute-a thawk Biologist Professor Werner Kloas-a sawi dan chuan, rannung insects tam lutuk chuan natna chi hrang hrang an thehdarh thin a, chu chu mihring tan damlohna thlentu a ni a, Hri mak tak tak lentir theitu a ni bawk.

_______________________________________

♣ (Rial, Khaukhuap puang leh Thim)

History-a Tlangkang rapthlak tak tak zinga pakhat chu Tlangkang pakhat Thera volcano chu tun hmain Mediterranean-a Santorini islands peng pakhat a ni a, chulai hmun chu Crete hmar lama awm a ni. chu tlang chu kum 3,500 liam ta khan a puak dur mai a, chirh sa leh nawi leh khu Ton maktaduai tela tam a phuhchhuah ta sung sung mai a ni.

Germany rama Institute for Atmospheric Physics-a thawk Nadine von Blohm chuan, engtin nge Pharoah hun laia Rial kha a lo sur ni tih hrechhuak turin experiments a han nei ta a.

Tlangkangin khu nasa tak a vawrhchhuahte chu Egype chungah thlipui nen a inpawlhsawp ta vek a. chu chuan Rial a siam ta a ni a ti. Canadian biologist Dr Siro Trevisanato pawhin, a lehkhabu ziahah, Tlangkangin vap leh khu nasa taka a phuhchhuah khan, boruak a danglam ta hle a. chuvangchuan, ruahpui a sur ta vak a, khua a hnawng ta churh mai a.

Chu boruak tak chu Khaukhuap chi (species) tana inthlahpunna tha ber a ni ta a ni. Tlangkang khu nasa lutuk chuan ni a hliah thim khup thin a, chu chu Bible-a thim (darkness) tih inziak kha a ni leh thei bawk a ni.

Scientists-te chuan pumice leh Volcanic lava atanga siam thil dang dangte chu, Egyptian ruins excavation neih laiin an chhar a ni. chungte chu tun hmaa tlangkang a lo awm ngei tawhzia tichiang em emtu a ni ta a ni.

__________________________________________

♥ (The Death of the first Born)

Pharoah Ramses luhlulna vanga Hripui tawp ber lo thleng leh ta chu Egypt rama fapa upa ber thihna a ni. Hei hi rin dan leh chhui dan chuan Natna hrik Fungi vang a ni.

An chaw ei tur thlai leh thil dangahte chuan Fungi natna hrik a awm a, Egypt rama Eiin leh chaw kilho chuan fapa upa berin a ei hmasa tura ngaih a ni. A ei hmasa ber theuhtute chu an thi hmasa ta hlawm niin an ngai.

Fapa upa ber thih thu kha Bible-in a tinzawn ber a ni a, a hnu lawkah, midang an thi ve leh ta chuah chuah pawh a ni thei. Bible chuan a thil thlurbing lai lo chu, hun inhnaih tak pawh nise, a sawilang ngai tlat lo fo a ni.

A tawp kharna atan chuan, Pathian thilmak tih tam zawk hi chu supernatural ni lovin, ama siam sa natural law mila a tih leh thlentir niin a lang. Chu chu thil ni thei tak pawh a ni miau si a ni.

(opeey1khiangte7@gmail.com)

★★★