BJP Missionary Cell hawng; BJP chu Bringing Jesus to People - Prof JV Hluna

Aizawl | July 24, 2019: Bharatiya Janata Party Mizoram Pradesh ( MBJP) president Porf JV Hluna  chuan vawiin khan MBJP Office-ah BJP Missionary Cell hawngin Missionary Cell a tlangzarh nghal.

 Er. Lalhriatrenga Chhangte (Hriata Chhangte) chu Missionary Cell  chairman atan ruat a ni a,  secretary atan Pi Julie Vanpari bakah member eng emaw zat an awm bawk.

Hriata Chhangte chuan, "Mizo kristian Missionary ten buaina an tawh thulha puitu atana din a ni a, Missionary tirh lam kan tum a ni lo," a ti a. "Miin kan puihna a mamawh a, puih a duh chuan kan inhawng a, an tan kan ding ang. Mahse, miin puih a duh tlat loh chuan puih ngaihna a awm lo" tiin thenkhatin Missionary te tana hlauhawm zawk emaw Missionary te pawh he cell thlawp lo tur zawnga thu lo thehdarhtute chunga a ngaihdan a sawi.

Missionary Cell lo din dan:

Mizoram BJP aiawha president Prof JV Hluna, General Secretary ( Admin) leh Pu Lalhriatrenga Chhangte te’n  ni 25 June 2019 zana Guwahati hmuna BJP North East Zonal General secretary Ajay Jamwala an kawmna ah Pu Hriata Chhangte chuan Mizoram BJP hnuaiah MISSIONARY CELL din min phalsak chuan BJP ka zawm duh e, a tih chu rei tak sawiho a nih hnuah Missionary Cell din chu a phalsak tak avangin Pu Hriata Chhangte chuan ni 12 July 2019 khan Atal Bhawan, Upper Republic, Aizawl ah  BJP chu zawmin,  a hmalam a Guwahati a sawiho a remtih tlan a lo nih tawh angin Mizoram BJP President-in thuchhuah siamin ni 17  July 2019 khan BJP Mizoram hnuai a Missionary Cell din thu chu a puang ta a. Chumi bawhzui chuan Missionary Cell hmalakna te lo buaipui zawm turin Committee chu din fel a ni ta bawk a.

MBJP Missionary Cell tum:

BJP Mizoram Missionary Cell hian a tum bulpui ber chu Mizo Kristian Missionary te India ram khawi hmunah pawh an rawngbawlna hmuna Local mi te’n diklo taka diriam emaw harsatna siamsak an nih changa Mizo Kristian kan nihna anga a theih dan kawng kawnga an thlavang hauh thin tur ani.  India danpui Article 24(1) in mitin ( Indian Citizen ni satliah lo, Mi tupawh) te hnenah Religious Freedom chu Fundamental Right anga a pek angin Mizo Kristian te pawh hian zalen taka kan Pathian thu ( Chanchin Tha) chu India ram khawi hmunah pawh nunpui a ( practice) , hrilh zau ( propagate)  tura kan vah chhuah min phalsak nasa a ni tih hi kan hrechiang lo palh ang tih an hlau a. Chuvangin Mizo Kristian tak a hma la turin BJP Mizoram chuan he Missionary Cell hi an din ta niin an pawl thuchhuah chuan a tarlang.

Engtin nge an puih ang?

He Missionary Cell hian Mizo Kristian Missionary te harsatna buaipui turin Dedicated Team siamin a tul angin report mumal tak, phone in emaw text / message emaw mail ang te pawha an dawn ang angin an lo buaipui thin dawn a. Chuvangin, 24 x7 Help Line te siamin Missionary te’n an awmna hmun atanga an biak pawh theih turin siam an tum bawk. Tun atan chuan heng number te hi Help Line a hman rih tur a ni.  Landline : 0389-2301792/ leh Cell Phones 8902057606/ 9437038976/ 9366454360.