Aizawl | July 13, 2019: FCS&CA Minister Pu K. Lalrinliana chuan vawiin khan kolasib St. Joseph's Parish Hall-ah Nepali Literature a mi chhuanawm Adivaki Bhanubhakta Acharya piancham vawi 205-na lawmna hun a hmanpui.
Khuallian chuan Gorkha te chu khawvel pumah Hnam huaisen leh Hnam rinawm ti a hriatlar an ni a, khawi hmunah pawh awm se midang tana hnawksak nilovin; thiantha siamtu an ni zel thei chu fakawm a tih thu a sawi a. Gorkha hnam nunze mawi entawn tlak tam tak te chu chhawm nung zelin, midang tan malsawmna nih chhunzawm zel turin duhsakna a hlan a ni.
He hun hi Mizoram Gorkha Youth Association (MGYA), kolasib branch huaihawt niin khawvel hmun hrang hrang ah pawh hman a ni a. HSLC leh HSSLC exam a titha te bakah zirna kawng hrang hranga titha te chawimawina hun hman niin, lam leh zai chi hrang hrang entir bawk a ni.
Central Mizoram Gorkha Youth Association (Central MGYA) huaihawtin, Vawiin vek khan Gorkha hnam zinga thu leh hla lama puipa bera ngaih, Adikavi Bhanubhakta Acharya piancham vawi 205-na ‘Bhanu Jayanti’ chu urhsun takin Vanapa Hall-ah lawm a ni.
‘Bhanu Jayanti’ lawmna pui ber Aizawl Vanapa Hall-a neihah Adikavi Bhanubhakta Acharya thuziak zirho a nih bakah Zai leh Gorkha hnam lam chi hrang hrang te entir a ni a; zirlai tithate chawimawina hun hman a ni bawk. He hunah hian Lunglei Zohnuai nula, Rashmi Poudel lehkhabu ziah, vantlang nun thlirna thu lawrkhawm, "ASHAKTA ANKHAHARU" chu tlangzarh nghal a ni.
He ni lawmna hi Aizawl bakah Kolasib, Lunglei, Siaha leh Bualpui-ah te MGYA Branch ten anmahni remchan ang in an hmang ve bawk a ni.
Post a Comment
He post chungchanga i ngaihdan lo sawi ve rawh: