A bialpa hmaah nula pakhat a inphelhruak a, a bialpa chuan duhtawkin a thla a la a, mahse, a darh ta si!
(He website kal zel theih nan hian fakna lo langte hi i lo hmet ve thin dawn nia.)
[News update awlsam taka i dawn theih nan telegram channel hi lo join ve ta che https://t.me/exploremizoramchannel ]
"Ka rilru a dam thei lo... Rilru chu a na duh khawp mai. Ka ngaihtuah chhuah chang hian ka mittui a tla thin," tiin chu nula chuan a dinhmun Zozam Weekly a hrilh.
He nula hian "teen ka la ni" a ti a, kum 19 aiin a la upa lo tihna a ni. Mahse, tleirawl te ni mah se khawvel hmaah saruak leh inhawng sain a lang ta a, a mang a ang hle.
"A....inngaihzawn lai thil a nia, kan lo inringtawk bawk a ni ang..." a ti a, "Thlalak hi ka ngaina lo a, lak pawh ka la ngai mang lo. Tawngkam an thiam te pawh a ni ang, a... ka at vang a ni ang. Ka in-pose a, kan ti ve a ni mai," a ti bawk.
He nula dinhmun anga ding hi Mizo zingah sawi tur an awm ta nual mai. Mahse, ani chu a vannei hlauh; a thlalak darh ta hi mipat hmeichhiatna an hmang lai a ni lo a, inphelhruak 'naran' mai a ni. (Tunlai khawvelah chuan, hetianga vanduai rau rau-ah mipat hmeichhiatna hmang lai ni lote chu "saruak thlalak naran" tiin an sawi theih ta der mai!)
NGO pakhat- New Life Home Society chuan nawhchizuar 300 vel zet nun kawng dika hruai tumin an enkawl a, an zinga thenkhat chu anmahni dawrtute'n thla an lo lak thin avangin an mangang thin.
"Anmahni dawrtute hian an hriat miah lohvin mipat hmeichhiatna an hmanpui laiin thla an lo la a, a hun laia an ruih avang te'n an lo hre lo a, an hriatchhuah hnu-ah chuan an mangang thei khawp mai," tiin New Life Home Society project manager N Samuel-a'n Zozam Weekly a hrilh.
Nikum lamah khan he NGO te'n an enkawl mek nawhchizuar pakhat chuan tiang thilah hian harsatna a tawk a, police te hnenah a tlanlut ta tawp mai a ni. Police te'n an lo pui a, chu nawhchizuar kawmtu chu hrechhuakin, a mobile phone handset-a video chu an paihsak ta a ni. Chu nu chu a lawm teh asin!
Nawhchizuar dawrtute zingah chutianga thla la ru chu an awm thin a, mahni ngaihzawngte nena an khawsa lai ngei la ru thin pawh an awm. La ru mai ni lo, a tu ve ve pawhina an remtih dunna ngeia video-a la thin pawh an awm. Chung chu research tih ngai lo khawpin a chiang awm e.
Mi tam takin mipat hmeichhiatna hmang lai video an nei a, saruak thlalak ve hrim hrim a tam hle bawk. Mi hriat hlawh takte pawh an awm nghe nghe. Hemi chungchang hi tun hnai kum hnih/3 vel kal taa Mizoram titi ber pakhat pawh a ni.
YWCA Family Councelling Centre-a councellor Lalhriatpuii chuan: "Blue film lei tur a tam em em a, internet atangin duhtawkin a download theih bawk. Chumi hnu-ah thiante nena titi-na ber a ni zui a, hei vang hian seks hi kan pawisa lo hle a, thla han lak te pawh kan hreh ta lo a ni thei ang," tiin a ngaihdan Zozam Weekly a hrilh.
"IT khawvel ken tel a ni a, internet atanga blue film download tur a tam bakah camera ni se a tam tawh em em a, inkhuahkhirh hleih theih a ni lo. 'Ti suh' tih ringawt theih a ni lo. An film enah te hetiang a tam chuan, sawi tawh angin, pawisak lohna a lo piang a, camera a tam si, mobile phone hmang pawhin duhtawkin thla a lak theih a, miin seks an hmang duh a nih chuan thla han lak mai pawh a awlsam em em a ni. Sap kan ngaisang a, an awm dan kan copy a, mipat hmeichhiatna hman khawloh pawisa miah lote film en tur a tam si," a ti bawk.
"Hmeichhiate hian mipa hi heti lamah hi chuan ring lo se a dik ka ring. An insum thei lo a, seks an lo hmang a nih pawhin thlalak hi chu duh lo tawp rawh se, miin an lo la ru a nih chuan thudang a ni. Hmeichhiate hi mipa bumin an awm tur a ni lo," tiin thurawn a pe a ni.
"Mobile phone te a awm tawh a, awlsam takin thlalak leh video te kan inthawn thei a," tiin psychiatrist Dr C Lalhrekima chuan a ngaihdan a sawi.
"A thuhrimah tun hma kha chuan hetiang hi a tih theih loh. Thlala tur chuan photo house-a kal a ngai a, a inphelhruah theih loh tluk a ni. Tuma'n hmelhriat lohte hmaah an inphelhruak duh lo ang. Tunlaiah erawh chutiang a ni tawh lo a, mahni room chhungah bialpa te nen chauh te an awm a, tawngkam thiam deuhva mipain an han thlem chuan an tlu ta mai thin ni tein a lang," a ti bawk.
seks video chhuichiangtu Synod Social Front lam chuan 95% chu mahni duhthu ngeia lak niin an sawi.
October ni 27, 2008-ah khan Mizo seks video chungchang zirchian an rel a, chumi bawhzui chuan Social Front hian an zir ta a ni. August ni 26-ah khan Synod Social Front hian Seminar-cum-Workshop huaihawtin an thil zirchhuah hi an thet a ni.
"Heng film-a 95% hi chu anmahni duhthu ngeia mobile phone camera-a an lak, midang an entirte'n an copy-sak atanga darhzau ta niin a lang ber a. Camera pangngaia midangin an laksak hi chu hmuh theih chinah video clip pahnih a awm a. Pakhatah hian hmeichhia hi hrai ruih niin a lang a, pakhat zawkah hian hmeichhia hi Manipur lam nula (Mizo hnahthlak) niin a hriat a, ani hi chu mihur kan tih ang hi niin a lang," tiin research titute chuan an ziak.
Social Front hian seks video clip 50 an zir a, "seks video clip-te hi hmeichhe remtihnaa lak ni ngeiin a lang bawk," an ti.
"seks video-ah hian nupaa khawsa lai hi pahnih a awm a, hei hi chu midang en atana ti lovin anmahniin a hnua an en atana lak niin a hriat a. Mahse, an lakna camera a chhiat avangin a cassete a tang a, siam tura an dahnaah a siamtuin a tih leak-out a ni," an ti bawk.
Synod Social Front buatsaih, Seminar - cum - Workshop-ah hian Vanlalrema Vantawl leh Laltlansangi Fanai te'n '9ornography and seks Video: The Present Scenario' tih paper an buatsaih a, anni hian seks video an hmuh theih ang ang 70 lakhawmin an zir a, chuta an thil hmuh chu paper-ah hian an tarlang a ni.
"seks video hi eng zat chiah nge awm tih finfiah a har hle a, Mizo telna ni ngeia hriat hmuh theih ang ang 70 lakkhawm a ni. Heng atanga a lan dan chuan mahni duhthu renga la hi 62.85% an ni a. A bak 37.14% (a bikin hmeichhia) chuan mipain camera/mobile phone-in an la tih an hre lo," tiin paper-ah hian an ziak.
"Hmeichhe thenkhat chu rui chatthla an nih loh pawhin rui, tang hlei thei tawh lo an ni a, pawngsuala chhal ngam video 6 aia tlem lo a awm bawk," an ti.
"Mipa leh hmeichhia pakhat, a ruala inpawlna leh mipa 1 leh hmeichhia 2 a ruala inpawlna video pakhat ve ve a awm bawk a ni," an ti bawk.
"Mizo thalaite hi seks lamah kan inthlahdah sawt hle niina lang, anmahni bakah zirtirtute lam pawhin an pawm," an ti a, "seks video-a a lan danah thenkhat hi chu hmeichhe tihmualpho tumna rawngkai ni theiin a lang a, fimkhur loh vanga putru a awm bawk. Hmeichhe rui, che thei lo, remchanga mipain a lakna video emaw lo ruahman lawkte pawh niin a lang," an ti bawk.
Synod Social Front lam chuan: "Heng saruak thlalak leh seks video-te hi a tam ber chu mobile phone hmanga inthawndarh niin a lang," an ti.
New Life Home Society project director N Samuel-a chuan tiang hian a ngaihdan Zozam Weekly a hrilh:
"Mizo seks video-a langte hian mipat hmeichhiatna hi an vawi khat hmanna a ni lo tlangpuiin a lang a, seks an hmanpuite nen vawi 2/3 an hman hnu-ah thlalak an ngam ta thin niin a lang," a ti.
"Intihtheihna te a ni thei a, mawl vang a ni thei bawk a, saruaka thla la lo tur leh seks hmang lai video-a la lo tur hian inzirtir kan ngai khawp mai," a ti bawk.
- Zozam Weekly
(He thu hi Zozam Weekly September 10, 2010 a mi lak a ni a. Kum fe a liam hnu hian mamawh an la awm takin tiin kan han herlum a ni. )
(He website kal zel theih nan hian fakna lo langte hi i lo hmet ve thin dawn nia.)
[News update awlsam taka i dawn theih nan telegram channel hi lo join ve ta che https://t.me/exploremizoramchannel ]
PawimWh tak a ni. Mizo society nena in persan em em ṭhin khan, kan in chhung leh kan kawtkai an rawn rap ve ta riap riap mai. Pawimawh ta ber zawka ka hriat chu. Seks hi kan hmang chho dawn choha, kan hmang mek bawka. Khawvel a ni miau mai si a, kan ṭhalai te leh pa valai, nu valai te hian, nupa inkara seks kan hmang lo a nih chuan, HIV/ STI laka kan him theihnan CONDOM hi ngaipawimawh hram hram thei ila a va duhawm em kan ti deuh daih duh a ni.Kan hnam a changkang tawlh tawlh anga, heng kan boruak tawn mek te hian kiam lam aiin nasat lam a pan dawn choh. Pathian ngaihsakna hi tlachham tak tak kan pung dawn choh ni te pawn alang. Zirtirna ṭha leh dik hi kan mamawh chho tawlh tawlh dawn a ni. Ka lawme.
ReplyDeleteA dik khawp mai. Kan nula te erawh fimkhur leh zual se a duhawm ka ti. Mipa te pawh kan kawppuite tana rin ngam tura kan awm a pawimawh viau. In tihtheih nana lo hmang duh tawk lah kan bang lo. Buaithlaaak.
DeletePost a Comment
He post chungchanga i ngaihdan lo sawi ve rawh: