REMNA RAH HMASAWNNA

- Vidpuia Hrahsel

Contributing Editor,

Exploremizoram.com

June 30 hi kum 1986-a Mizo National Front (MNF) leh India sorkarin inremna thuthlung an ziah champha a ni a, Mizoram hun tawnah, MNF leh India sorkarin inremna an ziah ní hi Mizo mipui zawng zawngte lâwm ber ní a ni hial mai thei e.

Rambuai avangin hrehawm tam tak kan tuar a, mi tam tak ramtuileilo in an awm a, chhungkua kan in chan a, in leh lo kan chan a, kan duh vang reng nilovin, india sawrkar in a ram mipui zing a, a  bomb awmchhun ni turin a ramchhung a cheng Mizo mipuite jet fighter in min bomb a, nu nau in an tuar nasa em em a, kan mizo hmeichhia te vai sipaiin an pawngsual a nih kha, hruaikhawm kan ni a,  he kan tawrhna avang hian tun thlengin kan hliam hi a dam theilo a, kan thinlung ah ser nung min hnutchhiah a, rambuai vang hian kan retheih a zual em em a, he kan tawrhna zawng zawng hi mizo thinlung ah hian a reh thei tawh lovang, kan tawrhna nasatzia hi thu hian a ziak fiah kher awm lo ve.

Pu Suakliana khan he rambuai hrehawmna leh hruaikhawm an nih avanga an chenna in leh lo, hrehawm ti tak leh lungchhe tak a, an tawrhna kha hla in a lo phuah hial a nih kha :

'Kan hun tawn zingah khawkhawm a pawi ber mai,

Zoram hmuntin khawtlang puan ang a chul zo ta;

Tlangtina mi hruaikhawm nunau mipuiten,

Chhunrawl an van, riakmaw iang in an vai e.

He hla atang hian an hun tawn kha mitthla hian a suangtuah a, an natna leh hrehawm an tawrhna te kha thu hian a ziak fiah zo lo, he hla phuahtu hian rambuai avangin an in leh lo an chan leh, an duh vang reng ni lova, hruaikhawm an nih te kha na a ti in hrehawm a ti em em a,  kan ram lungngaihna leh hrehawm tawrhna avangin, remna leh muanna a awm theihnan chunglam Pathian malsawmna leh ṭanpuina dil chungin hrehawm an tuar a ni.

Remna leh Muanna a awm theih nan mizo mipuite kan ṭawngtai a, remna kan neih theih nan a thawhhlawk tak tak te pawh an awm, remna hlutzia leh lawmawmzia hi tunlai ṭhangthar te hian kan hre loin kan ngaihven lo em em a, remna hi kan zavaia ta a ni a, kan ṭanrualna leh Pathian malsawmna rah a ni.

Rambuai avanga kan tawrhna te, remna awm theihna tura kan beihna te hmang hian political party te hian inbeih nan leh inchirhtheh nan a kan hman chhung chuan kan ram hian remna hlutzia hi kan hrethiam kher lovang.Thangthar ten he remna thuthlung hi ngaihven in, a hlutzia hi i hrechiang tulh tulh ang u.

Remna hi thisen hmanga kan hmuh a ni a, rambuai avangin kum 20 chhung zet kan rethei a, hrehawm tinreng kan tuar a, remna kan hmuh aṭangin rambuai a tawp a, zalen takin kan awm ta, he kan remna thuthlung hian kan hrehawm tawrhna te kha thawi dam mawlh rawh se. Remna kan hmuh hnuah mitinin kan dikna leh chanvo kan hria a, dan hmangin dan lo  kan do a, ram a thang a, he remna kan neih theihnan a tha thawhtu te, rambuai hrehawm tuar tu te   thawhrimna rah kan seng hi eng sum mahin a lei zo lo, he remna hi kan inlungrualna leh kan ṭanrualna rah a ni a, tawrhna tinreng kan tawrh hnuah chhelna nen a kan beih rah a ni a, mitinin he remna hi kan chhawr a ni.

Mizoram chu 'most peaceful state',  state ralmuang ber tiin kan thang a, Pathian malsawmna in hma kan sawn zel a, rambuai tuar pha tan chuan he remna thuthlung hi a lawmawm tur zia hi kan hre mai awm e. He remna hian zofate inpumkhatna thlen se, kan hliam leh kan rilru natna te hi dam se, he remna avang hian hmasawn duhna thinlung pu in kan ram tan hian inrem takin ke i pen ho zel ang u.