NORTHEAST FUTSAL LEAGUE BUATSAIH DAWN; TEL TUR MIZORAM TEAM MIZO FALCONS

Aizawl | June 29, 2019: Northeast India-a Mega Sports league hmasa ber  tur 'Northeast Futsal League' khelh hun a hnai zel a, Northeast state tina team-te pawh an inbuatsaih mek zel.

Mizoram aiawh tur, Mizo Falcons chuan vawiin khan Aizawl Press Club-ah chanchinbumite an kawm a, hetah hian Northeast Futsal League hotupa Ranajit Mahanta pawhin a rawn telpui.

Northeast Futsal League chu:

He league hi Northeast huap infiamna league  lian ber ni tura ngaih a ni a, khawvela futsal league lian ber Premier Futsal leh Indian Super League (ISL) kal dan phung anga kalpui tum a ni.

He league-a club tinte hian foreigner/international player pahnih theuh an nei thei dawn a, a bak zawng chu state chhung players vek an ni tur a ni.

League hi 'Prolivity Sports & Recreation Pvt. Ltd.' buatsaih tur niin, Northeast-a tihpui lian bera siam an tum a ni. League hian Spain rama futsal league sang ber (top division) player te a  chah lut dawn a, tin, hei bakah hian Futsal khawvela player tha ber pawl, Spanish, Diego Blanco pawh league director ni turin a be mek a ni.

He league leh club-te tlangzarhna hun hi June ni 12 khan Vivanta Taj Hotel, Guwahati ah neih a ni. He league hi TV leh YouTube lamahte LIVE-a en theih a ni dawn a, khelhna hmun atan hian  Premier Badminton League lo khelh tawhna Karambir Nabin Chandra AC Indoor Stadium chu hman a ni ang.

League technical lam hi Spanish company-in an khawih dawn a, match tinah half-time show ropui tak neih a ni ziah bawk ang. Tin, opening hi August ni 25-ah neih a ni dawn a, league match-a point hmu sang ber team pahnihten September ni 4-ah final an khel ang. 

Tel tur Mizoram team Mizo Falcons?

He league-a Mizoram aiawh tur chu Mizo Falcons club a ni ang. Mizo Falcons hi he league khel tur liau liaua din a ni. Mizo Falcons hian Spanish player pakhat an sign tawh a, foreigner dang sign leh tumin hma an la mek a ni.

Falcons hian July ni 6 khian player trial a buatsaih dawn a, mipa leh hmeichhia a duh apiang tan trial hi a hmachhawn theih dawn a ni. A hrechiang duhte chuan Mizo Falcons official Facebook page leh Instagram page lamah en mai tur a ni ang. 

Club hian players leh coaching staff te tlangzarhna hun July thla vek hian a nei dawn a, tin, Mizo team jersey tlangzarhna hi August thlaah Guwahati khawpuiah neih a ni bawk ang.

MIZOTE TAN FUTSAL:

Futsal hi tunlaia Mizorama game lar ber a tih theih awm e. Pumraw lian an tangkai bik lohna, ball thiam leh che rang an dinchan theihna game a nih avangin he game hi Mizote khelh chi tak a ni.

He Northeast Futsal League hian professional level-a Futsal khelh theihna hun remchang Mizo player-te a pe dawn a ni. Mumal taka futsal league kalpuina Europe ram thenkhat atanga scout an rawn kal dawn avangin Mizo player te tan he league hi mahni  inphochhuahna hun remchang tak a ni ngei ang. 

Khawvela football club ropui ber berte hian futsal club an nei thluah tawh a, a game hian khawvel a ngawr nghing mek a ni.

ENG NGE AN SAWI?:

Ranajit Mahanta, Administrative Manager, Northeast Futsal League

"He league hi India mai ni lo, India ram pawn thlenga nghawrnghing thei tura duan a ni. Spain, England leh France lama an Futsal team tha ber berte pawhin an rawn ngaihven nghal a, he league-a inhnimphum ve nih hi an duh a ni.

"Tin, Mizoram club hian India leh Northeast media-te a hip nghal hle  bawk. League launch program-a media atanga zawhna kan dawn tam ber pawh Mizoram chungchang a ni. A chhan chu he state-ah hian khawvel huap pawha futsaler tha ber ber ni thei tur talent a inphum vang a ni.

"Season hnihna chu Aizawl hian a thlen ngei ka beisei. A thlen ngei theihna tur pawhin hma kan la ang."

Dustin Lalkulhpuia, Owner, Mizo Falcons: "Hei hi hnam thil a ni. He league hi, eng sports-ah pawh Mizote hi kan tha ber a ni, tih lantirna hun remchang tak a ni. Sports hi national media-a kan thanthat theihna tura kan hmanraw neih that ve berte zinga mi a ni.

"He club hi Mizoram club bik a ni lo va, Mizo hnam club a ni. Chuvangin a hmingah pawh 'Mizo Falcons' tih a ni. Kan kawngpui dunga ball pet mai mai thinte hi eng ang taka tha nge an nih tih entir hi kan tum ber a ni a, a thlawna thlan titla thinte eizawnna siamsak hi kan tum ber ni leh bawka chu a ni.

"Guwahati leh Shillong lama Mizo awmte tawiawmna leh puihna kan ngen tak meuh meuh bawk a ni."