Mizorama Kohhran lian pahnih PCI leh BCM a ṭhalaiten joint service hmang

Aizawl | June 18, 2019: Mizoram a kohhran lian pahnih; Presbyterian Church of India Mizoram Synod hnuaia ṭhalai pawl, Kristian Ṭhalai Pawl (KṬP) Kulikawn West Branch leh Baptist Church of Mizoram hnuaia ṭhalai pawl, Ṭhalai Kristian Pawl (ṬKP) Central Church Unit te chuan nizan khan PCI Kulikawn West Kohhran Biak Inah Joint Service hun hmangin hun hlimawm tak an hmang.

He hun hi KṬP Kulikawn West Branch Leader K Lalrinkima'n a kaihruai a. ṬKP Central Church Unit ECM H Zonunpuii'n ṭanna hun a hmang a. KṬP leh ṬKP secretary ve ve in report an pek zawhin KṬP leh ṬKP aṭangin Zaipawl ngaihthlak ve ve a nih hnuah KṬP Kulikawn West Branch Committee member Tv. Calvin Lalremsiama in bible chhiar rualna hun a kaihruai a. ṬKP Central Church unit vice president Pu F Lalramchhana hnen aṭangin Pathian thuchah ngaihthlak a ni.

Thusawitu chuan, "Mihring mahni inkhawngaihna leh mahni indahpawimawhna avanga rawngbawlnaa kan vui ṭhinna te hi Kristain min dah chhan leh rawngbawlna kan kova a nghah kan hriatchian hunah chuan vuina tur a lo awm lova, luite min dai kaipuitu Krista nen chuan engkim hi a lo hahdam a ni," tiin a sawi.

KṬP Kulikawn West Branch leh ṬKP Central Church Unit hruaitute
Pic: ṬKP Central Church Unit Documentation Committee

Inkhawm banah PCI Kulikawn West Kohhran Hall-ah  Tv . Lalnunpuia, Br. Treasurer leh NI. Mary Lalrinsangi, ECM TKP te kaihhruaina hnuaiah fellowship hlimawm tak an nei a. Drama,  group zai, Band zai, Worship dance leh group recitation te ngaihthlak a ni.

He hunah hian KṬP member 103 leh ṬKP member 61 an inkhawm a. Member kal ten hlawkthlak an ti hle.

Hetiang hun hi ṬKP Central Church Unit rorelin, 'kohhran dang ṭhalaite nena rawngbawlnaa inpawhna ṭha neih' tura an lo rel bawhzuina a ni a. Kum dangah pawh ṬKP central Church Unit te hi  KṬP Venghlui, KṬP Tuikhuahtlang leh KṬP Zarkawt branch bakah SAY Temple Corps te nen hun an lo hmangho tawh ṭhin niin kan thu dawnna chuan a sawi.