Mabiaki Pachuau Music Video “Lunglen Hnemtu” tlangzarh; MDM Library ah dah dawn

Aizawl | June 14, 2019: Traditional Singer of the Year Award te pawh lo dawng tawh, Mabiaki Pachuau (Lalbiakhlui Pachuau) Music Video Album thar, hla pakua awmna “Lunglen Hnemtu” chu 13th June 2019 (Ningani) zan dar 7:30 khan David’s Kitchen, Chanmari-ah Pu L. Thangmawia, MLA-in a tlangzarh.

Tlangzarh inkhawm hi Te-a Boitlung-in hnehsawh takin a kaihruai a. Pu K. Lalmuansanga, ASEP President-in hunserh a hmang.

Pu Lalremtluanga, Finance Secretary, Saihnuna Memorial Society (SAMSO)-in Music Video Album thirlawkna (Preview) hun a hmang a. He album-a hlate hi Audio/Visual quality a tha-in ngaihthlak leh thlir a manhla dawn thu te, Mizote tan rohlu a nih tur thu leh hetiang lam hla thangtharte-ah a bo mai loh nana ngaihthlak nuam, thlir ninawm loh a nih a rin thu leh Mizote tan vawn nun reng a pawimawh thu a sawi.

He Music Video album Producer hi Pu David Lalhmamgaiha, David's Kitchen neitupa niin Release Function pawh ama Sponsored a ni. He Album-a hlate hi a vaia belhkhawmin 39 Minutes leh 42 Seconds a ni a. Music hi Thangbawiha kutchhuak niin Video hi Zova Video Production kutchhuak a ni.

Tlangzarhtu, Pu L. Thangmawia, MLA chuan Mizote rohlu, engtik ni-ah emaw tal Mizote’na kan duh zual hun nei fo thin hla, famngaite leh lungleng mite tana pawimawh em em, a satu-in thiam taka a sak tlangzarhtu a ni thei chu lawmawm a tih thu sawiin Mizo zawng zawngte’n thinlung taka an ngaihthlak theih tur leh en theih tur, famngai leh lunglengte tana hnemtu tak tak a nih theih ngei a beisei thu a sawi a ni.

He tlangzarh inkhawmah hian Mizo Cultural Organisation (MCO) aiawhin Pu John Saikhuma, Vice President-in thu a sawi a. Mabiaki seilenna khua, Tlangpui Welfare Association aiawhin thu an sawi bawk. Zaithiam lar tak tak Sawmtea Chhangte, Rachel Lalnunkimi, Zorinzuali Khiangte, H. Vanlalhlana leh Ticos Darhmingliana te’n zaiin mipui kalkhawmte an awi a. Pu B. Lalthlengliana (Thangkura Drama Party)-in lawmthu sawina hun a hmang bawk a ni.

Thudawnnain a sawi danin he music video hi Music Domain Mizoram (MDM) Library ah dah luh a ni dawn a ni.