NUNGCHANG

 — Centenary C. Lalzahawma

 
Pathianin thil engkim mai hi thlir dân chi hnih, a ṭha zawng leh ṭha lo zawnga thlir thei turin chhia leh ṭha hriatna min pe ṭheuhva. Duhthlan tur pahnih min siamsak ṭheuh bawk. Chu duhthlan tur pahnih chu mi tinten loh theih lovin a pakhat zâwk zâwk chu kan thlang ta ṭhin a ni. 'Nungchang' tih kan sawi lan pawh hian thil pahnih lo lang a awm, chu chu, 'nungchang ṭha leh nungchang ṭha lo' a ni. Eng zâwk nge kan thlan tak ang le?

          He khawvêla kan châm chhunga thil pawimawh ber chu nungchang ṭha neih hi a ni hial awm e. Federal Bureau of Investigation (FBI), United States-a Director hmasa ber John Edgar Hoover-a chuan, "Nu leh pate an fate entawn tura nung lo chu an hlawhchham a ni," a lo ti hial mai! Nungchang ṭha nei turin chhungkua aṭânga zirtirna ṭha an dawn a ngaihzia leh nu leh pa mawhphurhna a sanzia a sawi lang chiang hle awm e.

          Mahni fate zial, kuhva, etc., lei tura tirh te hi sual bul inṭanna a ni. An mit hmuha zu in te hi chin miah loh a ṭha. Thu aiin thiltih a au ring zâwk tih a nih kha. Mi nun hniam tete te mi zahawma lantirtu, mi hausate mi chapo anga lantirtu, mi inzir sâng lote mi inzir sâng anga lantirtu, thiamna sâng pui pui nei mi mâwl tak tak anga lantirtu chu 'Nungchang' hi a ni. 

          New York-a Kristian Boys School, Stony Brook School Seal-ah chuan, "Nungchang hi eizawnna aiin a pawimawh hmasa zâwk," tiin an tar. A hming chauha kan hriat naktuk kan tih fo ṭhin khua a vâr vêl leha vawiin ni leh mai ṭhin naktuka i awm dãn tur hi vawiin ni a i hun hman dân hian a hril thui hle tih theihnghilh ngai suh ang che. "Thil ṭha tih aiin thil sual tih a awlsam zâwk a, thil ṭha tih bansan aiin thilsual tih bansan a har zâwk fo ṭhin."

          Sydney Brenner-a chuan, "Khawvêla retheihna ṭha lo ber chu nungchang retheihna a ni," a lo ti nghe nghe. Mi tam tak engvângin nge sual kawng an zawh? kan tih chuan an tet te aṭãngin an nu leh pate'n an enkawl dân a dik lo a, an mit hmuhah thil sual an ti a, chutih laiin an ṭhian kawm tur ṭhian ṭha leh fel thlansak nachang an hriat loh vâng a ni fo. Mahni hi kan pawimawh rualin kan ṭhian kawmte pawh an pawimawh hle. Ṭhian ṭha i kawm chuan mi ṭha i ni thei a, ṭhian sual i kawm chuan mi sual i ni thei. Chuvângin kan ṭhian kawm turte pawh kan thlan fimkhur a ngai fo ṭhin.

          American thuziak thiam hmingthang Horace Greeley-a chuan, "Hmingthanna hi tuihu ang a ni a, lârna pawh hi thil thleng palh ve mai a ni. Hausakna pawh hi bo thut thei a ni. Thil pakhat danglam ve ngai lo a awm chu chu nungchang a ni," tiin a sawi. Mi lehkha thiam hmingthang nungchang chhe tak nei ai chuan mi nun hniam te thiama sawi tur nei lo nungchang ṭha tak chu Siamtu Pathian leh a mihringpuite mithmuhah a ropui zãwk lo thei lo a ni. Thiamna ringawt hian zahawmna a keng tel si lo!

          "Nungchang ṭha neih hi nupui ṭha neih tluka hlu a ni." Chuvângin mi tinte'n kan ni tin hun hman dân ah leh kan khawsakzia ah fimkhur a ngai a. Mahni ngaihdân chauh ngaipawimawh lovin engtin nge midangte'n min ngaih ang tih hi kan ngaihtuah tel tur a ni. Nungchang ṭha nei tur chuan ṭawngkam ṭha hman a ngai fo bawk. Ṭawngkam ṭha chhakchhuak ngai lo nungchang ṭha tak a awm theih loh. Benjamin Franklin-a chuan, "Dam rei ringawt aiin nun ṭhat hi duhzâwk tur a ni," a ti hial mai. Hei aia fiah hian sawi leh tur a awm âwm chuang love. Entawntlak nungchang hi sermon tha ber a ni a, Pathian hmel lanna pakhat a ni.

          Samuel Pollard-a chu China ramah kum 28 chhûng Missionary hna thawkin a awm a. A inpekna ropui tak avãngin miten an ngaina hle a. A thawhna Miao ho chuan a thih hnu chuan, "Kan pate aiin kan hmangaih zâwk," an ti hial a ni. Pathian mite rêng rêng mi inngaitlâwm leh nungchang ṭha tak an ni ṭhin tih a tichiang hle awm e.

          "l thih hnua i chanchin thi ve hauh lova nung reng tur chanchin ṭha hnutchhiah i duh chuan i damlaiin i nungchang uluk rawh."