Lalremsiami lo haw, a nuin tap chungin lo chhawn

Aizawl | June 25, 2019: India Hockey Player, Kolasib Fa chuam, Mizoram fanu rangkachak, India rohlu; a pa ruang hmuh aia ram tana a theihna hlan thlang a, a pa ruang thlah anih lai pawha chhel taka ram tana a theihtawpa chhuaha kheltu Nula Lalremsiami chuan vawiin khan an in a thleng a, mi tam tak hmuaktu zingah a nuin tam chunga a lo hmuak chuan mi rilru a khawihin thinlung a dek hle.

Kan hriat theuh angin Lalremsiami pa Lalthansanga Zote chu June 21, 2019 zirtawpni khan a boral a. Mahse, FIH Series khelh mekah Lalremsiami telna India Hockey team chuan Japan nen Hiroshima khawpuiah Final an khelh dawn vangin haw thei a ni lo. Ni e, duh nise, a haw thei. mahse, he fanu rangkachak hian 'Pasaltha ram chhuak sa hawn lova haw a tum lo". A pa ruang uma haw ai chuan hmaa inkhelh pawimawh tak mai chu a thiante zinga khelh a, a inkhelh chu a pa tana hlan a thlang ta zawk a ni.

A pa boral thu a hriat tirh chuan a tah nasat thu leh ina haw mai te a duh rum rum thu a sawi a. mahse, a inngaihtuah chiang a, thutlukna a siam ta niin a sawi. 

A thlang sual lo!

Lalremsiami'n a pa tana ropui taka khelh a tum chu a thlang sual lo. India in semi final ah Chile 4-2 an hneh a, Final-ah Japan chu 3-1 in a hneh a, FIH Olympic Qualifiers 2019 atan India chu a qualify tawh. 

Ram leh hnam thlangtu a ramin a chhuang!

Ram leh hnam tana thawkchhuak a nih zia hrechianga a thutlukna siam chuan Union Sports minister Kiren Rijiju beng athleng a, a chhuan zia tweeter-ah post a siam hial a ni. 

 “Indian women hockey player Lalremsiami’s father expired when India was to play a crucial semifinal at Hiroshima that would determine if India’s Olympics dream would be alive. She told coach, ‘I want to make my father proud. I want to stay, play and make sure India qualifies”.

“I salute Lalremsiami and Congratulations to Indian Women Hockey Team,” 

Kum 19 mi Lalremsiami telna India Hockey team chuan Semi Final-ah  June 22 khan Chile tumin 4 -2 in an hneh a, Finalah June 23 khan Japan tumin an hneh a, Hnehna ropui nen a lo haw ta a ni. Lalremsiai chuan vawiin chhun dar khat khan Lengpui-ah rawn tumin, he hunah hian Mizoram Hockey hruaitu, Journalist leh amah ngainatu mi tam tak ten lo hmuakin, Hmar Students' Association Joint Headquarters Aizawl in puan an bahtir bawk.

Ropui mahse, a riang si!

Lalremsiami chu ropui takin an veng, Kolasib College veng panpui a  ni a. Thlahtu bakah in lama lo chhawntu pawh an tam, a ropui tak zet. Mahse, Mizoram fanu rangkachak hi a va riang si em! A hlawhtlinna lawmpui thintu a pa chu tunhma anga lo lawmpui turin a awm tawh lo. 'Pa' tia a koh thin kha a hmel chu sawi loh a thawm pawh a awm tawh lo. A thinlungin a zawng a, a tawng si lo. "ni e, bawihte, i zuapa an zalh ta, piallei thuahriat hnuaiah.." A nuin tap chungin a  lo pan a, an inkuah  a, tap chungin in chhung an lut ta a. A pa zawng awm se an nufa tah hi a phal ngai awm si lo!

Tap rawh, insum suh. Mahse, i insum si!

In chhung an luh hnuin an in kawtah hun tawi hman a ni a. Chutah chuan Lalremsiami chuan thutawi a sawi a, hlim hmel pu chungin lawmthu a sawi a, amah tawiawmtu leh tawrhpuitute chungah lawmthu a sawi a ni. Chu thil chuan a bula awmte leh a video lo thlirtute a vel a, tap hawm hawm mahse, an hriatthiam tehlul nen nui sanga a chhawn khan Lalremsiami insum theih zia leh puitlin zia a tilang chiang a, Video entu pakhat chuan , Tap rawh, insum suh. Mahse, i insum si! tiin a khawngaih em vanga tap hawm hawm tura a duh zawk thu Social media-ah a comment hial. 

He hunah hian Kolasib district DC Zoengsanga chuan remsiami puala ram ngaihtuahsak a nih tur thu sawiin, ralna sum cheng 10,000 a hlan bawk.

- H. Zate

Founder/Editor

Lalremsiami Kolasib a hmuahna (October 2018)