Creative Show 2019 buatsaih; mipui lawm leh hlut a hlawh

 

Aizawl | June 7, 2019: Ni thum awh tur Creative Show 2019 chu  nimin atang khan Aijal Club, Aizawl-ah buatsaih tan a ni. He show hi nimin leh vawiin bikah tlai dar 2 atanga zan dar 8 thleng hawn a ni a, naktuk khian zing dar 9 atangin zan dar 8 thleng an inhawng thung ang.

 

He Creative Show hi Mizo Tlangval, Nunmawia'n a kutchhuakte a phochhuah a niin, a kutchhuak mai tak tak 30 chuang a phochhuak a. Mipui lawm leh hlut a hlawh a, thalai an fuankhawm nasa hle.

 

Tunge Nunmawia chu?

Nunmawia hi K Malsawma leh H Sangkhumi te fa pathum zinga mi lai niin, 1995 Nov 14 khan a lo piang a,  u mipa pakhat leh nau hmeichhia a nei a, Tuikual North, Aizawl-ah an cheng mek.

Nunmawia a thilsiam hma-ah

Nunmawia hian Primary leh Middle School hi Lalmalsawma Memorial School-ah a zir a, High School hi Govt Mizo Hig School-ah a zir leh a, St Pauls Higher Secondaery School, Aizawl ah Pawl 11 - 12 zir lehin tunah hian NIT Jaipur ah Architecture a zir mek a ni.

Zawhna chhangin, Nunmawia chuan lemziah leh arts lamah a hranga inzirna a neih loh thu a sawi a. "Lemmziah leh fashion designing lam tui hrim hrim" a ti.

Lem ziah leh thil siam vel a peih vangin A4 lehkhapuan phei chu inah an hawn ngam ngai lova, a hmuh hmasak a piang thil ziahnan a hmang mai thin. Talent ngah tak mai a ni a, A nau sunday sikul inkhawmpui thawmhnaw tur pawh amahin a lo design sak vek thin a ni.

Talent a neih that vangin high school leh higher secondary school a kal laiin ama thil siam a hralh hmangin sum a lo tuak tawh thin a  ni.

Nunmawia chuan, "tuna MZU Miss varsity 2019 Ashley Lalremruati te hian ka thil siam min ngaihhlutsakin min leisak nasa thei khawp mai," tia sawiin, Ashley te chunga a lawmthu a sawi bawk.

Tuna show hi vawi thum a buatsaihna niin, 2016 leh 2017 khan a lo buatsaih tawh  a ni.