Kolasib 7th May, 2019: Aizawl lam aṭanga kala Kolasib thlen hma chiahah hian Thingdawl khua a awm a. He khua hi mak tak maiin lirthei lakah an vanduai thei em em a. Motor chesual a awm fo a, an in, motor leh thil dang dang accident vangin an chan fo a, nunna chan hial te pawh an awm leh ṭhin a, a makin a pawi khawp mai.
Vawiin lam pawh khan Thingdawl khuaa in pakhat chu tlum hmawk khawpin 407 in a su leh pek a, a in neitu te leh a motor neitu te pawh an khawngaihthlak hle a, vawiin line chiang lo lutuk vangin hliam tuar an awm leh awm loh erawh ka hre fuh thei lo thung.
Hetih lai hian vawiina he accident na hmuna kal zingah hian hmanni lawka a chanchin kan post tawh Nula Chhuanawm Daisy kha a lo han tel ve leh a, an sawi danin khatia mi nun chhan tura a inpekna vanga Aizawl lam aṭanga chawimawina sumfai a dawn, a petu te pawh tute nge nia insawi lova an dah luih chu, an pek ang angin hemi te chhungkaw ṭanpuina atan hian a hlan vek niin an sawi a, a zat erawh an sawi ri lo.
A in neitu te lam leh amah Daisy hi chin chiang leh zual turin ka be pawp thei lo na a, ka rilru chuan '05 Low Riderz' ho inzirtirna 'Midang tana malsawmna nih' hi engtiang takin nge an inzirtir bik ang le aw tih ngawt rilruah a awm. Tv. Isaac-a lah Zoram dung tluanin hmun hran hranah midang tan malsawmna a lo nih tawh avangin mi tam tak hriat hlawh a lo ni tawh a. Tunah an member hetia a chanchin ngaihnawm tak tak awm chho leh ta nak nak hian an pawl hi hriatchian min tichak zual a. Chutih rualin hei hian kan ram hi nuam zawk leh him zawkin inzirtirna ṭha nen chuan kan la siam thei a ni tih a tichiang hlein ka hria..
NANG MALSAWMNA NI ANG CHE!
#Respect05LowRiderz #SaluteDaisy
- Kenny Muankima
Post a Comment
He post chungchanga i ngaihdan lo sawi ve rawh: