Aizawl | May 7, 2019: Mizo Zirlai Pawl chuan nimin khan Mizoram Chief Minister hmasa ber Pu Ch Chhunga (L) leilet Mizoram chhung a, a nupui Pi Lalrothangi'n Zofate Chawlhbuk sakna tur ram a pek na hmun Zophai Bairabi chu an tlawh a. MZP General Headquarters hruaitute hi Pu L. Ramdinliana Renthlei President leh Pu B. Vanlaltana Vice President hoin hruaitu engamawzat an kal a, Pu Zosangliana Rokhum Kolasib Headquarters President leh MZP Sub-Headquarters Bairabi hruaitu ten an tawiawm bawk a ni. MZP hruaitute hian Zofate Chawlhbuk sakna tur hmun ah hian a chhinchhiah nan ‘’Site Banner” an tar nghal bawk a, Zofate Chawlbuk sakna tur hmuna ‘’Site Banner” tar hi lak thlak a nih loh nana venpui turin MZP chuan Mizoram Sorkar thuneitute a ngen nghal.
"MZP in Zofate Chawlhbuk sak a tum na hmun Zophai Bairabi hi Mizoram chhung ngei a ni tih Mizoram mipui hriatah MZP chuan kan sawi nawn leh a, helai hmun hi Mizoram Chief Minister hmasa ber Pu Ch. Chhunga(L) leilet a ni a, Assam hian min chuhpui mai zawk a ni. MZP chuan kan Pi leh Pu te luahchin ram Mizoram chin humhalh a, kan neih letleh ngei theih nan hma a lak chhunzawm zel dawn a, MZP chuan Mizo mipuite chu kan hmalakna ti thuanawp zawnga lo awm lo tur leh MZP hmalakna tawiawm zel turin leh MZP hmalakna pui bawm zel turin Mizoram mipuite MZP chuan thinlung takin a sawm tak meuh a ni." tiin an pawl thuchhuah chuan a tarlang.
MZP General Headquarters chuan Bairabi Villege Council(VC) te thuchhuak 'Bairabi Zophai hmuna hmathar la tawh lo tura MZP te a hriattir chu' zahawm a ti hle a, amaherawh chu he lai Bairabi Zophai hmun hi Mizoram chhung ngei a ni a, kan ramri chinfelna tura hmanraw pawimawh tak a nih avangin MZP chuan Zofate Chawlhbuk sak kan tum hi chawlhsan thei a kan in ngai lo a, Bairabi VC te pawh min lo hrethiam hram tur leh a tul ang apianga MZP te ram leh hnam tan min lo thawhpui thin tawh angin MZP te min thawhpui chhunzawm zel turin thinlung takin kan ngen a ni. MZP chu a dinna ngaiah a la ding reng a, Bairabi Zophai hmuna Zofate Chawlhbuk sak a nih theih nan hma a lak chhunzawm zel dawn a ni. Mizram Sorkar kaihhruaina hnuaiah Assam-Mizoram ramri ngaihtuah tu tur Core Committee siam a ni a, Core Committee hian hma la ve zelin tunah hian hmachhawp thahnem tak la neih a ni a, Core Committee in chak lehzuala hma a lak theih nan tan la lehzual turin Mizoram Sorkar chu MZP chuan a ngen nawn leh a ni.
MZP hruaitute hian IR Post Zophai hmun an tlawh nghal a, IR Post Zophai ah hian tun dinhmun ah Sipai 21 an awm a, a pan na kawng a chhe hle a, Zophai Post IR hian Motor eng chi mah kawl an nei lo a, IR Post Zophai hi thuamthat a ngai hle in MZP chuan a hria a ni. Mizoram Sorkar thuneitute chu ramri hrul a kan police te hei aia thuamthat an nih theih nana hma la turin an ngen nghal bawk a ni.
Post a Comment
He post chungchanga i ngaihdan lo sawi ve rawh: