SAIHAPUI-AH LEI KHIK BELH, CHHUNGKAW 12 THIARCHHUAK

Kolasib | May 27, 2019:  Saihapui 'K' leitawlhna ah Inrinni khan khi a awm thar leh avangin leimin leh mai theih dinhmunah a ding a, hei vang hian chhungkaw 12 chu an chenna in aṭanga riahchhuah tir an ni. Hetih lai hian district magistrate thupekin helai leitawlh chhan chhuitu tur 'Enquiry Committee' din a ni tawh.

Saihapui 'K' a leikhi thar awm leh hi 50mtrs vela thui niin in pakhat a tan tlang a, tla leh mai thei a nih vangin mihring nunna chan an awm belh lohna turin a hnuai zawn highway kama a awm chhungkaw 12 te chu Inrinni zan aṭang khan riahchhuah tir an ni. Hemi hma hian leiminna chhak lama awm chhungkaw pahnih chu an riahchhuah tir an lo tawh bawk. He thil avang hian Inrinni zan khan District Administration office aṭangin Zoengsanga, DC, Samuel Zodinsanga SDC, Lalnunfela, District Organizer DM&R te an chhuk thla a, Sub Hqrs YMA aṭangin C. Liankunga, President, Lalnunmawia, Treasurer leh Disaster Management Sub Committee-a secretary Lalthianghlima te bakah PHE aṭangin SDO R Ronghaka leh JE te an kal a, Saihapui 'K' khawtlang hruaitute nen hmalak dan tur an sawiho a ni.

Kolasib AW palai thudawn danin nimin Pathianni pawh khan tui a la put reng a, leiminna chhak lama awm PHE tanky chu leimin chhan âwm khân ber a ni hrih avangin tanky-a overflow pipe pawh sawnin a ral lehlama kawr kamah luan tir tura tih an ni a, tui pawh pump luh belh tawh lovin darkar 24 chhung en thlithlai a nih bakah a ṭul dan a zirin tanky pawh ṭhiah a ngai mai thei niin an sawi. District Organiser Lalnunfela chuan tanky chu PHE department siam ni mahse a enkawltu chu khawtlang 'Village Water & Sanitation Committee' a ni a, an in enkawlna tur tui bill khawn thlengin an kutah vek a awm a ni. Lei a chet leh avang hian nimin Pathianni vek khan enfiah turin Geology & Mining department lama mithiam H Lalbiakkima, Jt Director chuan a hmun hi a enfiah bawk.

Tarlan tawh angin kar kalta Ningani zanlai ruahsur avang khan NH-154 ko chhak, Saihapui 'K' khawchhunga mi chu a min a, hei vang hian VCP Benjamin-a te nupa chuan hliam an tawrh bakah an fanu kum 8 mi Mary Lalhmangaihzuali chu a boral phah a ni. District bawrhsap chuan leimin chhan chhuifiahtu tur Enquiry Committee dinin member atan C Lalmalsawma, SDPO, Lalnunkimi, SDC leh PWD SDO H Lalfakzuala te a ruat a, anni hian Inrinni khan an tlawh tawh niin thudawn a ni.

- Kolasib AW