Marina V Varte 'Ka hmangaih che a sin' ruahman lawk aia hmaah tichhuak

Aizawl | May 17, 2019: Mizo Zaithiam lar leh mite ngainat hlawh em em, Marina V Varte chuan  a hla thar, 'Ka hmangaih che a sin' chu ruahman lawk aia hmain May 16, 2019 khan a tichhuak.

A hla a mawi a, a satuin a thiam bawka ngaihthlak a nuam tak zet.

He hla hi LMa Ralte phuah a ni a. Recording hi Zonun recording kutchhuak a ni bawk.

Ruahman lawk ang chuan June Thla tira tihchhuah tum a buatsaih a ni a. Mahse, remchan zawkna vangin nimin khan Youtube a Marina V Varte Channel-ah dah a ni ta a ni.


Exploremizoram.com chuan a channel kan subscribe tawh, lo subsribe ve rawh.

 

He hla 'Ka hmangaih che a sin' hi H Lalmuankimi'n lo sa tawhin, Mizo Film 'Hling Zinga Rose Par' -ah khan hman a lo ni tawh a. Hla nalh, hla lungkuai leh ngaihthlak hlawh tak a ni.

 

He music video ah hian Miss Mizoram 2017 Top 10 C Vanlalhlupuii hmel kan hmu a. Mipa lamah chuan Govt Aizawl North College Mister 2017 Malsawmdawngzuala kan hmu  bawk.

C Vanlalhlupuii, Marina V Varte leh Maldawmdawngzuala

Kan zaithiam ten Youtube channel an nei fur tawh a, an hmang tangkai chho zel a, a lawmawm takzet. Chutihlai chuan, Copyright reserve  ti thei an la awm lova, Mahse, hengah hian channel danga lo upload sak mai lovin, mahni kutkawih ni lo rah seng tum ngai lo Mizo hnam kan nih angin Mizo Mizo-na nen kan kutkawih lo chu a rah seng tum lo ila, rim tak leh sum tam tak senga an thawhchhuah an music video -ah te hian hlawkna an hmuh ve theihnan tan lakpuiin, a en, subscribe, Like leh share lamah tan lakpui thiam ila, Zaithiamten hma an sawn anga, Mipuiin hla thar kan hmuh belh zel phah bawk ang a, kan vai a tan a that tlanna  a ni dawn a ni.