Lalrinnungi: Chawhmeh zuar atangin MBSE HSLC Topper

Mizoram Board of School Education chuan may 2, 2019 khan High School Leaving Certificate exam result a tichhuak a, Sihphir khaw naupang, St Joseph Higher Secondary School zirlai Lalrinnungi chu mark 500 ah mark 486 hmuin topper a ni a. English  Maths, Science, Social Studies leh Mizo ah te letter a hmu bawk.

"thiam thei tur chuan zir tam a ngai," - Lalrinnungi

Retheihna hneha Mizoram Board of School Education hnuaia pawl 10 topper ni thei Lalrinnungi chanchin bi lo chhiar ve rawh le.

Lalrinnungi, Pic credit: Zonet/ instagram

Lalrinnungi hi Zothantluanga leh Lalhlimpuii te fa pali zinga a naupang ber niin, 2004 march 23 khan a lo piang a. an unau hi Miap pahnih leh Hmeichhia pahnih an ni.

Pawl nga thleng chu Young Learners School, Sihphir-ah a kal a, Pawl 6 atanga pawl 8 thleng Presbyterian English School, Sihphir-ah a kal leh a. Pawl 9 leh pawl 10 in St Joseph Higher Secondary School, Aizawl-ah a kal ta ni.

A tihdan ngai bawkin Thakthing bazarah a nu a pui leh a. May 4, 2019

Vawk vulh leh thlai zuara ei zawng an ni a. Chu chu an chhungkaw ei zawnna a ni. An chhungkaw ei zawnna ber a nih miau a vangin a pian hma, a nuin a pai lai atang tawhin Thakthing Bazarah hian a kal fova, a lo pian hnuah pawh thla hnih a nih atangin a nuin a bazarpui a, chu chu chhunzawm zelin, a lo len hnu chuan inrinni bazar apiangin a nu bulah awmin a pui ta thin a ni.

  

Naupang dang ang lo takin inrinni hun awlah a infiam ve mai mai ngai lova, a nu leh pa a pui a, a nu chawhmeh zawrhna Thakthing bazar-ah puiin chawhmeh/thlai mi dangin an  zawrh chhawn tur sem leh a man ba khawnte chu ti ve zelin kawng tam takah a nu a chhawk hle thin a ni.

 

Lalrinnungi nu, Pi Mahlim chuan, "inriini leh sikul an chawlh apiangin min pui a, Min chhawk zangkhai em em a ni." a ti.

(exploremizoram.com ah hian thu tha tak tak kan dah zel theihnan fakna lo lang thin hi lo click ve ta che.)

Inrinni zingkar zing dar 5 a Thakthing bazara inpho hman tur chuan Sihphir atangin Zirtawpni zanah an men tlaivar a ngai a, Zan dar 1 vel atangin Motor in Aizawl an pan ta thin a. Zing dar 5 rik hmaa Thakthing Bazar thleng a, Dar 5 ah chuan inpho a, Thlai zawrh hman an ngaih avangin hah leh chauh sawi thiang an ni lo. Chutah, Inrinni ni lengin an thlai neih te zawrh leh sem a ngai a, ba khawn a lo ngai a, an hah thei hle thin a ni.

lalrinnungi a  nu leh pa nen

"Zan inkhawm hmana kan haw chang chuan a la inkhawm peih thin a." tiin a nu chuan a taimak leh chhel zia bakah Pathian a tih zia a sawi a, "a u kan hruai tel chang chuan in kan thleng hi a chau a, a mu tawp zel," tiin an fanu naupang ber Lalrinnungi chhel zia leh naupang danglam a nih thu a sawi bawk.

Lalrinnungi nu Pi Mahlimi hi mi biangbiak thiam tak mai a ni a. Sihphir Kohhran Hmeichhe secretary a ni a. "Central Hmeichhia lama kan hruaitute hnen atang pawhin lawmpuina kan dawng nasa" tiin Mizoram Presbyterian Kohhran hnuaia Hmeichhe pawl hruaitute atanga lawmpuina an dawn thu exploremizoram.com a hrilh.

A pa Zothantluanga chuan, "Kan khuain hetiang khawpa min lawmpui hi kan lawm a, lung a chhe zawk' tiin thiam lo takin an khawtlang mipuiin YMA Branch hmalaknaa May 2, 2019 tlaia a fanu pawl 10 topper tling lawmpuina hun siam a, an lo hmuah dan chungchanga a lawmthu a sawi.

May 2, 2019 result puan tlai khan Sihphir khawtlang Mipui chuan Lalrinnungi hi chawimawina famkim nen an hmuak a, a pualin lawmpuina hun an siam bawk a ni. "Icon/Idol vel ni lova Zirna avanga Mizoram a a thiam ber hmuak theia Sihphir khua kan awm hi ka lawm. Hei hi Zirlaite ah chona thar pe ngei se ka duh," tiin Sihphir khaw pa pakhat a hming tarlan duh lo chuan a sawi. 

Lalrinnungi hi Sihphir khua atanga MBSE HSLC Topper ni thei hmasa ber a ni a. Siphir khawtlang mipui pawhin an chhuangin an lawmpui hle a ni.

 

Retheihna leh harsatna hneh a, Mizoram Topper a nihnaah a pa chuan, "Mi neinung leh fate tana an amamawh zawng zawng pe theite chan tura ka lo dah thin ka fanuin a chang hi ka lawm takzet a ni" a ti a. Harsatna kara a thawhrimna Pathian in  mal a sawm a ni a tiin exploremizoram.com a hrilh.

A fee pek kawngah retheihna vangin harsatna an tawk a, mahse, an harsatna hrethiamtu St Joseph HSS principal leh a thawhpuite chungah an lawmthu a nu pi Mahlimi chuan a sawi a. "Kum khat chhunga a fee hi vawi thum chiah ka pe" tiin an neih remchan huna fee pek an phalsak leh an neih loh changa bat an phalsak chungchang chu exploremizoram.com a hrilh.

 (exploremizoram.com ah hian thu tha tak tak kan dah zel theihnan fakna lo lang thin hi lo click ve ta che.)

Lalrinnungi hian Science lak a tum thu a sawi a. "Politician nih ka chak ber a, mahse, chu chu hna neih hnu atan ka duh thung a. Civil services nih ka tum a, Doctor lam te pawh rilruah chuan awm a. mahse, ka la sawichiang thei lo, pawl 11 leh 12 hi han zir phawt ila ka kalna tur ka chiang thei ang" tiin a nih tchak, a nih tum leh a hmalam hun tur a a lo duan chhin chu exploremizoram.com a hrilh. An harsat avanga a tum zawng zawng thlen a harsat a rin thu a sawi zauh bawk.

A lehkha zir dan chungchangah, "Pawl 9 atangin St Joseph HSS-ah kalin hostelah ka awm a. Zirtirtu ten lehkha zir hun an siam zan dar 6 atanga dar 1 thleng hi ka zir ve thin a. mahse, a hnuah chuan zan dar 11 thleng chauh kan zir thin." a ti a. Chumi hnu chuan Zing lamah dar thum velah thovin lehkha a zir leh thin thu exploremizoram.com a hrilh bawk.

Lalrinnungi hi a zirnaah pakhatna a ni deuh zel a, Pahnihna dinhmun hi tum hnih khat chauh a ni. Amah lawmpuia chibai buktu zinga pakhatin, "i thiam thei ve hrim hrim a ni maw?" tia a zawhna chu, rang zetin, "thiam thei tur chuan zir tam a ngai," tiin a chhang a. Hei hian a zir tam zia a tilang chaing hlein a hriat.

Zan men a harsat thu sawiin, "Ka tetlai atangin zan men ka harsat a, dar 7 velah chuan ka mut a chhuak a mu mai thin ka nih vangin Hostel ka awm hnu pawhin zan dar 7 dar 8 velah chuan ka mut a chhuak a, ka muthlu lawp lawp thin" tiin exploremizoram.com a hrilh a.

"kan zirtirtuten ka mut a chhuah loh nan ding chung te'n min chhiartir thin," tiin an zirtirtuten a hma ngaia thahnem an lo ngaihpuina chu sawiin, a lawmthu a sawi a. "A chang phei chuan Bathroom-ah min inphihfai tir leh lawp lawp thin a, chuti ang chuan ka zir leh thin," tiin nui chungin zan men a theih loh vanga an zirtirtute a tihbuai thin zia a sawi.

Heng bakah hian an zirtirtuten zir tur pawimawh an khawnsak a, an pui nasa hle a. "a bikin sir peka phei chuan zawhna pawimawh tur min zawnsak a, chu chuan zirlaite min pui nasa hle a ni," a ti a.

Mizo Zirlai Pawl general headquarters Aizawl in Inter High School Quiz 2018 a an tel chu a hlawkpui thu sawiin, "ka telpui pawh pasarihna a ni a, chuan, kan sikul atangin mi pathum top 10 ah kan lang a ni" tiin exploremizoram.com a hrilh.

Lalrinnungi hi a sikul kalna St Joseph Higher Secondary School chuan a thlawnin admission leh thla tin fee zawng zawng an tihsak dawn niin thu kan dawng a.

 

_________________

TT Arts, Chanmari Aizawl-ah T Shirt print hrang hrang an ti thei a, Explore Mizoram T Shirt pawh cheng 450 in lei tur a awm bawk e.

Call/ WhatsApp +919615332721

(A hnuaia fakna hi i lo hmet kauh dawn nia.)