HSA Sinlung Hills Joint Headquarters in Aizawl District hnuaia awm duh

Aizawl | May 25, 2019: Hmar Students' Association (HSA) Sinlung Hills Joint Headquarters chuan thuchhuah siamin, Mizoram a district tar tihpuitlin tura hmalak mek Saitual district leh district din tuma hma lak mekna Darlawn district a awm an duh lo thu leh Aizawl district chhunga awm an la duh zawk thu an tarlang.

HSA thuchhuah chuan, "Kan hmuh le hriat angin, Kum tam tak mipuiin an lo dîl tawh, Saitual District chu tih-puitlin niin function mai tawh tur  ni te pawn a lang a. He district thar function tur chungchang hi  Hmar Students' Association(HSA), Sinlung Hills Joint Headquarters chuan ngun takin a lo thlir ve a. Tun dinhmunah chuan Saitual District hnuaiah Sinlung Hills Area chhunga khaw ṭhenkhat rinluh an tum hi ṭha kan ti lo hle a. Tin, Darlawn District Demand Committee in an District Demand huam chhunga min rinluh an tum pawh hi kan duhlo hle a ni." tiin a tarlang a.

"Khaw ṭhenkhatin, District thar hnuaia awm hi, hamṭhatna leh remchan zawkna tam tak nei thei dawna inhria a, lawm leh nghakhlel tak a lo thlirtu te rilru hi kan hriatthiam puiin, kan lawmpui a. Amaherawhchu, District thar hnuaia awm ve duh lo leh Aizawl District chhunga la awm duh Sinlung Hills Area mipui te hi District thar hnuaiah min  awmluih tir lo hram turin sorkar thuneitute kan ngen a ni.

Kan hriat angin, Sinlung Hills Area hi State ralmuang ber hnuaia awm reng si a; rambuai kar a lêng fo ṭhin kan ni a. Kan rilru sukthlêk leh ngaihtuahna te pawh hi min hriatthiampui a, kan duh dan hi min ngaihpawimawh sak hram turin thuneitute kan ngen nawn bawk. Tin, khaw ṭhenkhatin an duh a an dîl a, an hlawhtling a nih chuan a lawmawm a. Mahse, a duh ve lo Sinlung Hills Area mipuite hi chu min barhlui lo hram turin HSA Sinlung Hills Joint Headquarters chuan kan duh takzet a ni. He District-a min barh-lui a nih chuan a tawp thlengin kan dodal ang." tiin an pawl thuchhuah chuan a sawi.