2019 a a thawhhnihnan ȚKP, Co-ordination Committee, Aizawl buatsaihin thisen pe

Aizawl | May 25, 2019: Vawiin khan Ṭhalai Kristian Pawl (ȚKP) Co-ordination Committee,Aizawl  buatsaihin ȚKP, Luangmual Pastor Bial member-ten BCM Luangmual Kohhran Hall-ah thisen an pe a,unit 92 pein, hmeichhia 17 leh mipa 75 in an pe a ni. 

Civil Hospital,Aizawl Blood Bank-a thawkten a hmunah kalchilhin thisen hi an la a ni. 2010 ațang khan kumtin thisen pek programme hi an lo kalpui tawh a,uar zawk leh nasa zawka kalpui zel an tum bawk a ni.

Pu Lalinpuia Ralte,Bial TKP Secy in hunserh programme a kaihruai a, Pu Laldinsanga Hnamte, TKP Co-ordination Committee Chairman hnen ațangin thusawi tawi ngaihthlak a ni bawk. Thisen pek puala slogun inphuahsiak result puanna leh lawmman semna neih a ni a,lawmman pakhatna latu hi JH Lalhriathlui,Emmanuel Unit a ni a,citation a dawng a ni. Blood donation programme neih lai mek hian Biak In kawt zawlah Gospel Concert buatsaih a ni bawk.

Kumin chhungin thisen țum kua pe tura ruahmanna siam a ni a,Aizawl khawpui chhunga Pastor Bial pakhuaten a inchhawkin an pe dawn a, tunah hian bial hnihin an pe tawh a ni. Vawiin programme ah hian ȚKP, Co-ordination Committee,Aizawl hruaitute, khawpui chhunga Bial hrang hrang hruaitute leh Luangmual Pastor Biala TKP member-te an kalkhawm a ni.

*Tun țum thisen pek hi a thlengtu Luangmual Unit  kum 30 tlin lawmna  pakhat a ni nghal bawk a,an Pearl Jubilee pual hian thisen Unit 32 an pe a,Pearl Jubilee lawmna chi hrang hrang an kalpui mek a,Zaipawl Concert pui buatsaihte an la tum bawk a,lawmna pui ber September ni 2-3 chhungin an nei dawn bawk a ni.*