MALIN KAL ANG CHE

- Dustin Lalkulhpuia

(Vawiin hi Bengali poet ropui, Nobel Prize for Literature hlan ni tawh, Rabindranath Tagore-a piancham a ni a, a piancham pualin a hla phuah ka duh em em mai ka rawn tarlang ve teh ang.)

Duh thlan ngai mihring kan ni miau si a le... pai chawn chawna kan kawng sah en sa chu kan zawh a ngaih chang a awm fo thin. Vawiinah mi hlawhtlingah ka inngai a, a tuk maiah mi hlawhchham pan lam tur nei lo ni-ah ka inngai leh thin.

.

Ngaihdan a tam a, thlir dan a tam a, sawi dan a hrang a, hmuh dan a tam thin. Mahse, mi ropuite chu mahni thinlung ngaithlaa huaisen taka dik nia an hriat, kawng, zawh ngat ngat thinte hi an ni. Mahse, chu kawng chu a awlsam lo va, sa leh vawt a tam a, zum leh hriam a tam thin.

.

Kei ngei pawh hian chu kawng bumboh leh titoh tak chu ka zawh fo mai. Mittui a far a, thlan fim a luang a, zan tam khawhara awm chang a awm fo thin. Mahse, chuti ang hunah chuan mahni infuih thar thei turin Rabindranath Tagore-a Bengali hla "Ekla Chalo Re" (Walk Alone) hi ka ngaithla fo thin.

.

Philosophy leh rinna nghet tak mai pai thin pu Gandhiji-a ngei pawh kha he hlaa chakna zawng thin hi a ni a, Dandi March/Great Salt March of 1930-a a hnung zuitu pungkhawmte, chau leh thlabar taka awmte kha he hla hi a saktir thin a ni.

.

In tangkaipui ve kei ngei pawh hian ka ring. Ka theih anga mawi leh fiahin Mizo tawnga rawn dah ka han tum chhin ange:

.

MALIN KAL ANG CHE:

---------------------------

I kohna aw an chhan loh chuan malin kal ang che;

Hlau leh timte aw rawlin a tihreh ni chuan,

Aw nang mi rethei,

I thinlung hawng la malin au chhuak ang che.

Hnung an hawi a, thlalera an hlamchhiah che chuan

Aw nang mi rethei,

Hling hmun chu chil phut la,

Thisen luan ram chu malin zawh ang che.

Thlipuite tih-tihbaiawm zan thima an eng hmet hluma kawng an khar chang chuan,

Aw nang thlarau rethei,

I thinlung chu natna khawpui ri chher chuan tieng zawk la,

Malin entir zel ang che.