Ni tla tur chu kawlkilah a sen phut a, lui tui fim taka luang kawi ngiai ngiai chu a chhun tle set set a. Hnim hring hlap kara ram pangpar pawl vul riai leh lui kam lungpui chunga hnahthel ro tla darh niai karah thingzarah sava an hram chiah chiah a. Chulai hmunah chuan khuarel rimawi chauh lo chu thawm dang reng reng hriattur a awm lo. Luikamah chuan nula pakhat a thu a, kawlkila ni liam tur chu ngawi rengin a thlir a, a chang leh a thutna bula hnahthel tla ro chu a khawih niap niap a, chu chu a nitin hun hman dan a ni. Chu khawpui daifema luite kam atang chuan nitla tur a thlirliam nitin a, luite tui luang ri her her leh thliin a chhem changa thinghnah inkhawng ri seng seng te chu ngaihnawm ti awm tak hian a ngaithla a, a chang chuan chauh hmel takin lungpui chungah chuan a mu thluang leh diai a, khaw thim dawnah ngawirengin a haw leh mai thin.
Nikhat chu amah chauha luikama a lo thut veng veng lai chuan a hnung lamah aw thian kharh kharh ri a hria a. A hnung lawka tlangval hmeltha tak lo ding reng a hmuh chuan a phu zawk a, tlangval chuan nui sang chung hian, "I tha em?" a lo ti a, nula chuan " Lo thu ve rawh" tih ngawtin a lo chhang a. Nula thutna lungpui sira lung chunga thuthmun rem chung chuan chu nula thutna bul vela pangpar vul chek leh hnahthel tla ro leng der der te chu hmuhnawm ti awm tak hian a thlir kual a. Rei fe an ngawih dun hnu chuan tlangval bawk chu a rawn tawngchhuak hmasa leh a, "Helaiah hian nithum lai ka hmu tawh che a...eng nge i tih thin?" "Helamah eng nge i tih thin zawk?" tiin aw dam dep si hian nula chuan a lo zawt let fak a. "Khu lai lawkah khuan huan kan nei a, thei eng eng emaw kan ching ve a. A chang changin ka rawn tlawh thin a. Ka haw turin nithum lai chu ka rawn hmu tawh che, nitla tur hi hmuhnawm i tih theih hmel khawp mai" nui seih chungin tlangval chuan a han ti leh a.
Nula chuan, "He lai boruak hi a nuam reuh riau asin, khawchhung atanga hnaite ni si hian khawpui thawm engmah a hriat phak loh a. A hmun hi a dai nuamin, a ngainatawm reuh bawk si a.Ka leng khaw thawng thin a..." tiin nitla tur bawk chu hmuhnawm tih hmel tak hian a thlirsan leh veng veng a. A mitmengah chuan lunglenna leh khawharna, lungawina leh lungngaihna a inzam pawlh chiat a. Kawlkila ni liam ruai ruai a thlir lai chuan a bul vela thawm awm te chu hre awm pawhin a lang lo. Tlangval chuan, "hetah hian nitin i kal thin em ni? tiin a han zawt leh a, nula chuan " Aw, a chang chuan hma deuh hlekah te, tlai ni tlak dawnah te, ka hman hun hunah a ni mai. Kawng bul hnaia awm a ni bawk si lo a, tumah an kal ve ngai lo emaw ka ti a..."tiin tlangval chu a han en a. Tlangval chuan, "Keipawh tuma awm lohna hmun tura ngaihah nula pakhat ka rawn hmu fo che kha mak deuh asin. I rawn tawng hma phei kha chuan lasi nula emaw ka ti hman tep che a lawm" a han tih chuan, nula chu hlim hmel tak hian a nui hak hak a. "Chu ramhuai emaw min ti a ni maw? Min hlau deuh em?" tiin tlangval chu a han melh ralh a. Tlangval chuan, "Ramhuai tih lêmah ramhuai tha chi a nia...i hming ka la zawt miah lo che a, Muanpuia ka nia, engtin nge ka koh ve ang che"
"Jacinta min ti mai rawh" nui seih chung hian nula chuan a lo ti a,
"Jacinta, hming mawi tak anih chu...anih, Jacinta...haw tawh ila, hei ni pawh a liam der tawh a nia"
"Min lo han hawsan mai rawh, keipawh ka haw tep...kan in a hnai a lawm"
"Ka thlah ang che" a tih ngial pawhin Jacinta-i chuan a duh tlat loh avangin, Muanpuia chuan hreh tak chungin a haw san ta a. Chu ta tang chuan Muanpuia chu nitin huan tlawh tur leh Jacinta-i tlawh tur chuan a kal ta fo a. A ofis ban veleh nidanga a thil tih thin pawh ngaihtuah lovin Jacinta-i luite lam pan chuan a tlan nghal vang vang thin. Chutia luikam hmun reh, tuma chim buai phak lohna hmuna nula leh tlangval inhmu ta fo chu an inkawmngeih ta viau a, a chang chuan fiamthua han inkah bawrh bawrh te, nui hawk hawk chunga lui kama han inum kual vel chang te pawh an nei ve ta fo mai.Lui ikamah chuan kal kualin khawchhunga awm ve lo ram hnim leh thing rah te chu a hming an inhriatsiak a. A chang chuan nghakuai leh lensuah hmangin sangha te pawh an man dun thin. Tih tham man ngai lo mah se, chutianga ramhnuaia hun hlimawm tak han hman vel chu nuam an ti ve em em tho a ni.
Chutiang chuan nitin thla engemaw zat chhung hun hmang dun fo mah se, tlangval fing fel Muanpuia meuh pawhin Jacinta-i nungchang chu mak tih deuh chang a ngah hle. A chanchin thui tak a sawipui theih ngai loh a, a chhungte emaw a nitin hun hman dan luite tui leh a chhehvel huam chhung bak chu engmah a sawi ngai lo. A titi atangin lehkhabu a chhiar nasa hle tih a hriat theih a, nula vakrawlai leh tih tur hre lo luikama tei kual mai mai chu a ang lo tlat a ni. Jacinta-i'n sawi nuam a tih ber chu nature(khuarel) chanchin a ni. Nature hlutzia leh ropuizia te, materialism khawvela naturalist ho retheihzia te, Pathian leh khuarel inkungkaihna tih vel chu a sawi tui thei hliam hliam hle. A chang chuan romantic english poetry leh poet te hming pawh lam chhuah nawk nawk chang a nei thin. Ramhnuaia a khawsazia hlei hlei chu a la mak leh zual a, pangpar te chu duat taka chulin, "In va mawi tak em..." ti hian a be mawlh mawlh a. Chutia a tih zawh chuan, Muanpuia lam hawiin "Khawvelah hian pangpar aia mawi i hria em? Kei chu ka hre miah lo, tiin a zawt ziah bawk. Muanpuia chuan, "A awm teuh ang chu, thil mawi mawina te chu a thlirtu thlirna mit azira mawi mai mai chauh a lawm" tiin Muanpuia chuan a lo chhang mai thin.
Ramhnuai, luikam leh a chhehvelah chuan lungawi hliah hliah hmel hi a pu reng a. Lui tui fim kaka sangha lim kual zek zek leh hnahthel tla ro thliim a chhem len der der chu nitin a hmuh than fo ni mah se, thil thar hmu ang mai hian a hlimpui reng thei a. Nidanga a la hmuh ngai loh pangpar lo vul thar a hmuh chang phei chuan, "Awi, ka pangpar an lo vul leh ta...!" tiin a au chul thin.Muanpuia chuan" ramhnuai i ngaina si a, pangpar i lawm bawk si, "Ram pangpar-i" ni mai ta che..." nui ver ver chung hian a han ti a. Jacinta-i chuan pangpar pakhat chu a thliak a,a benga zeh pahin..."Ka inhmeh ngawt ang, ti phei hi chuan tiraw?" tiin luite tui luang ri her her karah chuan a nui râwi râwi a, Thil hote avanga a hmela hlimna leh lungawina lo lang chu Muanpuia tan chuan Jacinta-i lawm em em ram pangpar te ai pawhin a hmuhnawm zawk ve ta hial zawk awm e.
Khawpui nula ten incheina leh tlereuh manto ngawt an buaipui laiin, Jacinta-i mitah chuan pangpar leh hnahthel tla ro mai mai te chu a mawi zawk a, nula dang ten tlangval hausa lehkhathiam leh hna nei tha ngawt an buaipui laiin, ani chuan khuarel nun mawlmang te thinlung taka a tawmpui theih Muanpuia chu a ngaina em em thung,atan chuan a ni ai a hlu an awm bik kher lovang.. Chu tak chu Muanpuia'n Jacinta-i mak a tih thinna chu a ni. Nitla tur a thlir chang erawh chuan a hmela khawharna leh malna lo lang chhuak chu hmuh hmaih rual a ni ngai lo. A mit chauh ni lo a suangtuahna chuan ram hla tak a thlir a ni tih hriat tak hian kawlkil lam enin a ngawi vang vang a. Nitla tur a thlir lai chuan a tawng ngai lo va, Muanpuia pawhin a lo be buai ngai lo. A bulah chuan ngawi rengin a lo thu ve mai thin.
Tlai khat Muanpuia'n lui a rawn thleng chu a ngui nghiai a, nui miah lovin Jacinta-i bulah chuan ngawi reng hian a rawn thu a. Jacinta-i chuan "Enga tinge vawiin chu, i va chauh hmel ve...i damlo em ni?" tiin ngaih that loh hmel tak hian a lo zawt a. Lei lam biha a ngawih vang vang hnu chuan, a rawn dakchhuak a,"Jacinta, ka zinbo a ngai dawn a, rei deuh pawh a ni mai thei, ka hre chiah lo. Hetah hian tlai tin i la kal ziah awm si a,, hmeichhia i ni bawk si. Mipa kalpui i neih loh chuan helai ram reha hmeichhia thim thlenga mahni a awm ziah hi a tha lo..." A sawi zawh hmain Jacinta-i chuan a lo pawt chat a..."Ka hlau hleinem, bakah Pathianin min veng anga, engmah ka tawk lovang. Mahse, i lo haw hunah luiah hian i lo kal leh angem?" tiin Muanpuia chu a han zawt a, ani chuan, "Tehreng mai, ka lo haw veleh hetah hian ka lo kal anga, ka rawn zawng ngei ngei ang che. Kal lo tawp chuan i awm thei dawn lo tih ka hria a. Mahse, ka awm loh chhung tal chu hetah hian lo kal tlem la ka duh a ni...haw hma thin bawk la..." a tih chuan Jacinta-i pawh chuan "Awle, ka lo kal tlem ang, ka haw hma bawk ang...min ngaihtuah lo la aw. I lo kal thin hma pawh khan keimahin ka kal ziah tho a lawm" a ti ve thei ta a. Chumi tlai chuan nidang angin an hlim viau thei lo, hun rei tak chhung inhmu lo tur an ni a. Nitin hun hlimawm tak hmang dun thin kha, an tlatna mual ve veah khawhar takin enge maw chen chu hun an hman dun a ngai dawn tlat a ni.Khaw thim dawn ruaiah chuan Muanpuia chuan Jacinta-i chu a han thlah a.An haw kawngah chuan kawngchhak kopang-ah hian pangpar var te reuh te te hi a lo vul chiat a, Muanpuia chuan, "Jacinta, hei hi eng pangpar nge i hria em?"
A va mawi ve, ka lo la hmu ngai miah lo a. Eng nge i hming?
Daisy anih hi, ram pangpar chi khat a nia.
A mawi hle mai, ka la hre ngai miah lo. A hming pawh chu a mawi hle mai...Daisy...
Muanpuia chuan pangpar mal khat chu a han thliak a, Jacinta-i pek pahin" I hming thar chu Daisy ni leh mai rawh se aw..."
Hming ka ngah tawh e...tiin Jacinta-i chu a lo nui a,
I inhmeh zel tho a lawm...
Hlim taka nui dun hak hak chungin Jacinta-i te in chu an han thleng a. Chumi zan chuan Muanpuia pawh rei fe chu a leng ve nghe nghe...
Ni a liam a, thla a ral a, kum meuh a lo vei leh chuan Muanpuia pawh a hnathawhna hmun atanga rawn hawin anmahni in lum ngeiah a lo let veleh ta a. A lo thlen ni chuan hah pawh sawi lovin, a intifai sawk sawk a, ram hla tak atanga nitin a mitthla thin luite lam pan chuan a inkhalh chhuak nghal a. Mahse, a va thlen chuan a beisei ber luite kam nghaktu Jacinta-i chu a lo awm hauh lo mai. "Vawiin chu a buai deuh a ni anga, a rawn kal tlai dawn a ni ang. Nge a kal ngai tawh lo zawk? Kal tam suh...ti khan ka chah nasa si a" tiin a ngaihtuah nep nep a. Eng pawh nise, vawiin tlai chu chawlh hahdam pahin nitlak thleng ka nghak tho ang. Khawpui chhunga motor tlan bengchheng thawm hriat ai chuan a hahdam zawk a lawm...tiin luikama phulah chuan thlifim dawngin, thing ngheng chung hian a thu awn diai a.
Rei fe a thut hnu chuan a sir deuh atang hian mipa puitling aw "Muanpuia i ni em?" tih ri a han hria a, mak ti takin a hawi ha a. Chu tlangval chuan a bulah ngampa taka rawn thut pah hian, "Jacinta-i u ka nia" tiin a rawn inhmelhriat tir nghal a. Muanpuia chuan mak tih hmel taka en chung hian, "A ni maw? Khaw'nge Jacinta-i?" tiin a lo zawt nghal var a. Jacinta-i chanchin a zawh veleh chu tlangval hmelah chuan lungngaihna a lo lang chhuak a, beidawng hmel taka Muanpuia en chung hian..."A awm tawh lo...!" Muanpuia chu a bing chuk chuk a, han sawi zawm leh mai tur pawh a hre tawh lo. Tlangval chuan a sawi chhunzawm zel a, "Ka nau khan leukaemia a vei a, khawpui boruak hi a ning em em a. Khawchhunga a awm chuan a natna leh treatment nen, a ngaihtuahna a buai nuai nuai a. Helai lui kama a awm hian a hahdamin a hlim em em thung si. Nitin ka kalpui thin a...amah chauha awm a châk thin avangin kawngpuiah khian motorah ka lo nghak a. A haw duh hunah ka hawpui leh mai thin. Nang i lo kal ve tak fo hnu kha chuan ngaihtha takin hla tak taka lensan chang pawh ka nei fo mai. Nitin i lo haw hun tur a lo nghak thin a. Thla hmasa ni 10 khan min kalsan ta a, a nghak chhuak zo ta lo che a ni.Ka nau khan a ngaina takzet che a...a ngaizawng che niin ka hria..." Muanpuia chuan mak tih hmel tak hian a lo en a.
Tlangval bawk chuan, " Mak ti duh suh, in chanchin chu ka hre vek a lawm. I tan poetry a ziak thin a, a chhiar tir ngam lo che a. He lehkhabu ka chhiar atang hian a nia, a ngaina sathliah mai che ni lovin a ngaizawng che a, a hmangaih takzet che tih ka hriat tak chu...tiin note book, hlai zet a kawm pawl hi a bag atang chuan a rawn phawrh a. "A thih dawn khan..."Ka u, ka thih hunah Muanpuia lo kal hma chu luiah khan lo zu nghak thin la, ka lehkhabu hi lo pe ang che aw. Ka thlanah ram pangpar rawn dah bawk rawh se" tiin min chah a. "Naute, Muanpuia chu a rawn kal ngei ngei dawn em ni? Nupui te hi a lo nei tawh mai lovang maw?" Ka tih ngial pawhin, "A lo kal ang, tlangval fel leh hmeltha tak a ni a, nupui pawh a nei tawh mai thei. Mahse, lui kamah khan lo kal leh a intiam a, a lo kal ngei ngei ang. Muanpuia chu ka hrechiang a lawm" a tih tlat avangin a thih ni tlai atang khan he luikamah hian nitin i lo lan hun tur ka lo thlir thin a...Nangmah vangin a damchhung hun hrehawm tak natna nena a hmang liam tur kha a ziaawm phah a. I chungah hian ka lawm takzet a ni" a han ti charh charh a.
Muanpuia chuan uluk taka lo ngaithla chungin lehkhabu chu a han keu a, Jacinta_i hla hmasa lamah chuan Muanpuia nena an hlimlaini leh an hun hman dan te chu hla thu mawi leh lungkuai tak hian a lo inziak a. A keu zel a, a tawp lamah chuan a lunglenna leh khawharna te. A hmangaih ber tan a awm theih loh avanga hrehawm a tihzia a tarlanna hla deuh hlir a ni. Lehkhabu chu a khup a, tlangval puitling thankin tawh mah ni se, a insum thei lo. A biangah chuan mittui a lo sur zung zung a. A bul ami pawh chuan a rilru tawmpui takin a lo insut ve faih faih bawk..."Jacinta..." tiin Muanpuia chu mittui karah a rawn rum chhuak nghat a. A u chuan hnukulh teuh chung hian "Ka nau kha khawvela hmeichhe fel leh duhawm ber chu a ni lovang. Mahse, a rilru a thianghlim em em a, a bula awm te chu thinlung takin a hmangaih thin asin" a ti a.
Nitla tur chu kawlkilah a pil riai riai a. Luite tui luang ri her her karah ram pangpar lal fanu Jacinta-i tana hlamawi remsak thintu, sava te chu thingzarah an hram chiah chiah a. Anmahni hmangaih leh duat taka enkawl thintu kha a awm ta si lo...Jacinta-i thlarau khan rawn thlir ve ţhin tak ang maw...?
Post a Comment
He post chungchanga i ngaihdan lo sawi ve rawh: