PIANSUALNA HNEHTU HMANGAIHNA AVANGA INNEIHNA CHU

- H . Zate

He khawvel, Nupui pasal chu sawi loh, ngaihzawng atan pawh 'nei ve tin ten lo chu' tia mi tam takin an zawn tawhna ramah leh makpa atan phei chuan mi neinung ngei an duh thinna ramah hian, tu hmeichhe kutke kim, pian ken dik, nu pangngai tak hian nge maw amah heltu Mipa hleitling leh neinung zawk hnawlin pian tirh ata zeng, mahni pawh inbawihsawm thei lo chu kumtluang kawppui atan thlang tehlul ang le?  Thil ni thei a ni dawn em ni?  Ama'n lo duh pawh nise, nuleh pa chuan an fanu pasal a tan an duh dawn em ni? Makpa che hlei thei lo neih chu an duh meuh ang maw?

 

Thlalak a darh a, miin mak an ti a, thenkhatin an awih loh hial laiin thenkhatin an lawmpuiin an fak tawn mawlh mawlh a. A hmeichhia fak mawlh mawlh an awm laiin, a mipa zawk lawmpui mawlh mawlh lah an tam.

He piansualna hnehtu hmangaihna chanchin hi thenkhatin an awih lova, rin har an ti a. Mahse, a tak a ni miau si. April 16, 2019 a  lo thleng a, chu thil chu a takin  BCM West Saizawh Biak In, W. Saizawh khua-ah kan tawh si.

A tak ngeiin a thleng ta.
Hruaia Vandiau Tlanglau (Emmanuel V Lalhruaizela) leh Zobiakremi Pautu (tebawihi) kum 2014 khan kum tawp lam-ah an inhre tan a. Chutih hunlai chuan thian mai an ni a, an inkarah inthian thatna a inkawmna bak engmah a leng lo. Mahse, chu inkawmna chuan inngainatna a siam a, kum 2019 a lo nih meuh chuan kum tluang atana kawppui ni turin an inkarah thu an thlung ta a ni. 

Zobiakremi Pautu (tebawihi) hi Hrangsavunga leh Zaihmingthangi te fanu niin, Khawzawl khua, Darngawn venga awm thin an ni.  kum 2003 pasal a nei a, 2014 October ah inthenin, a fa pathum te nen Bethlehem vengthlang Aizawl ah a hmeithaipui ta a ni.

Hruai Vandiau Tlanglau hi VL Piangenga leh Tuahpuii te fa pali zinga a naupang ber a ni. An upa ber hi hlamzuiin a boral a, a hnuaiah hian V Kungtea rairahtea tia hria thin hi a awm a, V Kungtea leh Hruaia inkarah hian pakhat awmin a ni chu 1995 khan a boral tawh bawk. Hruaia te unau hi zeng leh kut leh ke duh anga hmang thei lo ve ve an ni chungin thu leh hla-ah chuan an ril hle a. Mite ngainat leh ngaihsan rawn an ni.

Hruaia hi 1992 December 18 khan lo piangin, pawl hnih thlenga a zir hnuin a taksa harsatna vangin zirna a chawlhsan a. AIR Lunglei Drama inziahsiak-ah te chhuak thinin, Kum 2017 khan a lehklhabu ziah 'Hrignun Hling Bawm' chu a tichhuak a. 2018 khan second edition tihchhuah leh a ni.

 

Hruaia Vandiau Tlanglau hian a lehkhabu-ah hian Kristian Drama ngaihnawm tak tak panga; “Kristian Chhungkua i din ang u”; “Krismas kawr mawi”; “Vanram”; “Krismas danglam” leh “Ranthleng” tih te chu lehkhabu pakhatah a rawn khung khawm a. A lehkhabu hi Van lal nau phena hmangaihna leh phuba lakna chanchin a ni. Heng a lehkhabu chhutna man hi ama thawhchhuah liau liau a ni.

A hmaa inkawm thin chu Pianphunga rual ban lo a nihna, zun leh ek thiar ngai a nihna zawng zawng a hriat hnu-ah a khawngaih lehzual a, chu khawngaihna chu hmangaihnaah a rawn inlet ta a. Hmangaihna chuan dam chhunga cheng dun zai rel turin a urin a ur tlu dun ta a ni.

"Duhthu pawh ka sâm ngam ngai loh, Mihring nuna pawimawh leh ngaih hlutawm ber, dam chhûnga ka kawppui âwm mi ka tawng hi ka phu loh, Lalpa malsâwmna chu a ni chiangbâng. Chutah pawh, Kristian ṭhalai ka nih angin, 'biak in hawng ngeiin' kohhran hmaah inneih thu tiam ka chham tur hi keia tân chuan a ropuiin mite tih tur chauha ka ngaih ṭhin chu keimah ngeiin ka han ti ve dâwn a ni a, mumang te pawh a ng rum rum mai. Ka nuna thil thlengah hei aia ropui leh lâwmawm hi ka la tawng ngai lo va, ka tawng leh tawh kher lo vang." tiin Hruaia chuan a sawi a. 


facebook lama sawmna card a post ah chuan heti hian a ziak bawk, "He, ka tâna hun ropui min hriatpuia min lâwmpui turin ka ṭhenrual ṭha zawng zawng ka sâwm che u a, sâwmna (card) hranpa kan siam loh avangin he post hi “Inneih Sâwmna” puitlinga min lo ngaihsak ṭheuh turin ka ngên a che u."

"Kum 2017 December khan Hruaia lehkhabu  'Hringnun hling Bawm' a release a. Chung lai chuan a zawrh leh hralhna lamah ka pui nasa em em a. 2018 March khan W. Saizawh-ah ka fa te ber nen kan zuk zin a. Amah ka hmuh khan a tuarchhelh zia, a tum ruh zia te ka hmuhin ka rilru a hneh a, khatiang chunga lehkhabu a ziak hi ropui ka ti a.  2018 khan 2nd edition tihchhuah niin, chutah chuan a lehkhabu ah thuhmahruai ziakin, 'Hringnun Hling Bawm Ngei Mai Chu' (i hmeh kauh chuan thuziak hi i chhiar thei ang) tiin ama chanchin ka ziak chhuak a." tiin Tebawihi chuan an chanchin a sawi a.

Aizawl a zin tumin Tebawihi leh a fate nen an leng

Zeng leh pianphunga rualban lo vekin an unau hi an piang a. He nun tak mai hi a lehkhabu, "Hringnun Hling Bawm' chu niin, ama hringnun ngei mai hi a ni hlingin a bawm chu tiin thuhmahruai pawh chu ka ziak a. Ka khawngaihna leh lainatna chu hmangaihna-ah a lo chang ta zawk a ni.

Mi inngaizawng chu lirthei nalh tak takah an inphur a, anni erawh a mipa zawk nawr a ngai si...

Tebawihi chuan "Ka thinlung hian zeng enin a en lova, dam lo enkawl ngai enkawl angah ka inngai a, a dinhmun ka khawngaih a, amah hian hmangaih a phu hliah hliah a, mahnia intunnun tum, tumruh leh  tuarchhel, a ni a. Amah-ah rinna ka nghat ngam a, hmangaih a phu ngawih ngawih a ni. Keiin hmangaih taka ka enkawl lohin tuin nge enkawl chuang ang?" tiin Hruaia chungchang hi a sawi.

Heng bakah hian, a fate'n chhuang taka an pa anga an pawm  thu leh, mi hnenah pawh an sawi zel thu a sawi tel bawk.

An chanchin-a i ngaihdan a hnuaiah hian lo comment la, He post hi lo share ve rawh le..

--- Edited on April 16, 2019

An fapa Johan-a thla khat tlinna thlalak: ( Feb 9, 2020)
Updated on Feb 9, 2020

-  H . Zate

Editor, EXPLORE MIZORAM

(A hnuaia fakna awm hi i lo hmet ve kauh dawn nia.)