HRINGNUN HLING BÂWM’ NGEI MAI CHU

- Zobiakremi (Tebawhi Pautu)

Hruaia Vandiau Tlanglau lehkhabu ziah, “Hringnun Hling Bâwm” (second edition) chu state library-in bu 400 ngawt mai an order chu vawiin khân press atanga la chhuakin kan theh lût a, he ni hi ka ngaih hlut êm avangin vawiina a ziaktu nena kan thlalâk dun hi ka fb -ah hian ka’n dah tha ang e.

          Tin, he lehkhabu, “Hringnun Hling Bâwm”-ah hian a thuhma ka ziak ve a, lehkhabu-a vawi khat nân thuhma ka han ziak ve râwih a ni a, a phuai hle ang tih ka ring a, ka ziah ang anga min pawmsak avangin a lehkhabu ziaktu chungah ka lâwm hle.

Hei le, ka ‘thuhma’ chu le. Eng tak ang maw!?

HRINGNUN HLING BÂWM’ NGEI MAI CHU

          A hmasain, a lehkhabu-a thuhma tlêm tal ziah ve min rem tihsaktu, Hruaia Vandiau Tlanglau chungah hian lawmthu Ka sawi hmasa phawt duh a.

          Ani nen hian Khawzawl, Darngawn venga ka awm lai, 2014 kum daih tawh khan kan inkâwm ve tan a, thu leh hla a thiamin thu leh hlaa mi tam tak a tihlunglên zîngah chuan ka tel ta a ni. He lehkhabu a buatsaih chungchanga a thuhmahruaia ka hming a tilang tel erawh phu lo ka inti hle.

          Ni e, Lehkhabu a tihchhuah hmasak kha chuan zêp lohah chuan ka phûrpui tak zet a; sûlhnu nei miah lova a talent tha tak phûm bova a awm tur ka ui êm vang a ni.

          Amah hi zeng, kal thei lo tih chu Ka hria a, la hmu lo mah ila, a dinhmun te râlkhat atanga ka hriat avang chuan a lehkhabu tihchhuah chungchangah pawh ka phurpui zual a ni.

          Tichuan, lehkhabu chu harsatna kârah a tichhuak ve ta hlawl a, lehkhabu zuar pahin tlawmngaia zawrhsak tur ka zawng tel nghal a,  mi mal leh pâwlin an lo zawrhsak azarah rei lo teah a hralh zo ta thuai a. Amah hmu lo chung pawha lo khawngaih a, lo zawrhsaktute leh tlawmngaia lo leisaktute chungah lawmthu ka sawi tak meuh a ni.

          Lehkhabu man vêl pe pahin amah ngei hmu tur chuan ka fanu tê ber nen  an khuaah kan zu kal ta a, chutah chuan alawm, HRINGNUN HLING BÂWM ngei mai chu ka hmuh tâk ni...!

          Keini zawng kan Hringnun hi Hlingin a Bâwm ti ve \hîn mah ila, ani lakah chuan eng tham mah a lo ni hauh lo mai.

          An in kan thleng chu phûr taka min lo chibai duh ve hle mah se kan lam takngial pawh chu a lo hawi thei lo va. Zâna kan thlen avangin a thosilen zâr chhûngah chuan lûtin kan chibai ta a. A kut pawh chu a tihchar theih loh avangin chibai takngial pawh chu a lo rem fahran lo lehnghal a.

          A tûk khua a lo vâr chuan a pianphung eng mah dik lai awm ta rêng rêng lo chu chiang takin ka hmu thei ta a, (Karei...!!!) ka rin phâk bâkin a lo nasa a. A ring chu amahin a tung tha thei lo va, a hnungzâng ruh chu a kual lût nasa mai a; chuvang chuan, a thu pawh a dik hlei thei lo va, duh duhin a hawi kual thei hek lo. Chu bâkah, a bân chu char thei lovin a kutbâwr lah chu hmalamah a inpawh tawm tlat avangin duh angin a kut pawh chu a hmang zung zung thei lo va; a ke lampang ni se, naupang ke tiat lek a nih bâkah a dik lo nasa êm êm bawk a; kal ngaihna hi a awm lo rêng rêng. Amahin eng mah a ti thei lo, tih hian a dinhmun chu a hril chiang ber âwm e. Heti ang teh hrep— \hut hahthlâk, mut pawh hah dam chuang lo. Inbual pawha mu chunga inbual ngai. Taksa thak takngial pawh inhiat thei lo, chhûngte’n chhuata \huttir chawpa a hma dawhkan tereuh tê chunga lehkha ziak tura pen fahran pawh lek kual a harsat chunga heti anga lehkhabu, “Hringnun Hling Bâwm” a tichhuak thei mai hi amah ka hmuh chinah a hlutna ka chhar ve ta chauh a; amah ka la hmuh hmaa ka lo phûrpuina kha chu a lo nêpzia ka hmuh chian phah ta a ni.

          Hun a vawng dikin awmze nei takin  a hmang a. Tawngtai, Bible chhiar, lehkhabu chhiar, thu ziah etc. inbûk tâwkin a sem rual thiam hle.

          Sawi tel ngei tûla ka hriat chu, a pa chungchâng hi a ni. Hruaia te unau hi pahnih an ni a, a u nen pianphung inang niin kawng engkima buaipui vek ngai an ni a, mhring lam taka ngaihtuah chuan dam chhûnga enkawl ngai ringawt fa han neih mai chu lungngaih ngawih ngawih tham a nih teh lul nen a pa hi hlim hmêl a pu reng thei a, a fate buaipui chu a huphurh ngai lo mai ni lovin a nuam tih ber emaw tih theih mai turin hah tak chung siin nin hmêl leh beidawn hmêl a pu ngai miah lo. Chu chang a ni lo va, a fate buaipui êm êm chung hian kohhran leh khawtlângah a-kûl-a-tâia inhmangin hruaitu nihna a chelh nual nghe nghe, |anpui ngai zâwk dinhmuna a ding chung hian mite \anpui a \hulh chuang lo. Heti ang dinhmuna a ding chunga Hruaia’n lehkhabu hial chhuah theia a awm pawh hi a pa enkawlna \hatzia a lang chiang hlein ka hria.

          An khua Ka va kal chu hlâwkna tam tak ka chhar a, an nunphung leh chhungkaw khawsak inrêl bâwlna ah entawn tur tam tak a awm bawk a, Sawi vek sen lah a ni si lo.

          Mak ka tih leh deuh pakhat chu, tam tak hi chuan kan retheihna te, kan dam lohna te leh Harsatna dang dang avangin mi dang tanpui beiseiin mi dem te kan chîng a, kut dawh rilru pu rûin vui hmûi kan pu fo thîn. Ani erawh hi zawng heti ang dinhmuna a ding chung hian a vui ngai lo va, mi dangah beisei emaw, phût emaw a nei ngai lo va; eng mah a beisei lo chunga duhsakna thil pêk a dawn châng erawh chuan a beisei loh thil a nih avangin a lâwm em em thung.

          Keini ‘hringnun hling bâwm’ ve mai mai te hi chu ‘hling’ nih a lo tlin lohzia te, mi tam tak hi chu kan nuna hling awm hi keimahni lâk khâwm mai a nihzia te, kan vânneih bikzia te—thil tam tak ngaihtuahna min neihtir phah a. A dinhmun en mai chuan dam nawmna leh thlakhlelh chhan tur rêng awmin a lang lo. A sual bik vang ni hauh lova hringnun harsatna tin rêngin a bâwm khah lûk mai, he lehkhabu ziaktu, tlangval huaisen leh tuarchhel chungchuang hi a ni, ‘Hringnun Hling Bâwm’ ngei mai chu!

Bethlehem Vengthlang, Aizawl

13-Nov-2018