Joint NGO in thu zuk; Total Bandh tur ṭhulh

Aizawl | April 4, 2019: Joint NGO in Tuikuk te duhsak hleihluak leh an duh rwng vanga Mizoram chhuahsante a hrana vote thlak tir tumna duh loh lantir nana Mizoram chhunga Lok Sabha MP inthlan boycott a, April 8 aṭanga total bandh buatsaih an tum chu an ṭhulh leh.

An ṭhulh chhan an thuchhuah chuan tieng hian a tarlang, "Dt. 3.4.2019 zan dar 8:30-a NGO Co-Ordination Committee thukhawm chuan, Tripura Transit Camp-a Tuikuk awm, Mizorama Electoral Roll-a chuangte duhsak bikna Election Commission of India-in a lantir duhlohnan a M.P. Election 2019 Boycott leh Total Bandh Dt. 8.4.2019 atanga neih a lo tum tawh chu, Mizoram Sawrkar aiawh a, Mizoram Chief Secretary-in ziaka ngenna a rawn thlen (Vide No. J. 11029/1/2019- HM (Bru) Dated 3rd April, 2019) chu ngaihtuahin, thu tingah a pawm a, Tuikukte avanga harsatna kan tawh thinte hi a tawp ngei theih a beisei a ni, Mizorama lo let duh lote ngaihsak zui tawh lo tura Mizoram Sawrkar leh Ministry of Home Affairs ten hma lak nghal an tum avang leh Repatriation pawh a tawp tak takna tur atana kum 2019 chhung ngeia zo fel hman tura hmalak an tum hi lawmawm kan ti a, Sawrkar hmalak tumna hi NGO Co-Ordination Committee meeting chuan ring tawkin, M.P. Election 2019 Boycott a tum leh Ni 8.4.2019 atanga tiamchin awm lova Total Bandh huaihawt a tum chu thu leh awm hma chuan thulh turin a rel ta a ni. " 

"Mizoram Sawrkar-in hmalak a tumna hi a hlawhtlin ngei theih nan chak taka hma la turin NGO Co-Ordination Committee chuan Mizoram Sawrkar a beisei nghal bawk ani." 

"Tin, hmalak kan tumna kawnga theihtawp chhuaha NGO Co-Ordination Committee thuchhuakte lo bawhzui a,thahnem ngai taka a hlawhtlin theih nana tha leh zung senga hma latu Sub-Hqrs./Group/Branch-a NGO hrang hrangte leh kan thawhpui CYLA, MTP Gen. Hqrs. ten min thlawpnaah NGO Co-Ordination Committee chuan lawmthu a sawi tak meuh meuh a ni." tiin an thuchhuah chuan a tarlang bawk.