Book of the year 2018 hlan a ni

Aizawl | April 24, 2019: Nimin April 23, 2019 hian Mizo Academy of Letters (MAL) chuan Dincham (Foundation Day) Vawi 55-na chu Conference Hall, Economics and Statistics Directorate Aizawlah an hmang. 

He hun hi MAL President, Prof. Laltluangliana Khiangte chuan kaihruaiin, Foundation day hmang tura rawn kal zawng zawngte lawmna thu sawi pahin Mizo tawng humhalh hi a tul tak tet tet thu leh hnam dang hming leh tawngkauchhehin a chimpil loh nan thapui chhuah a pawimawh thu a sawi a. Mahni tawka Mizo tawng vei urhsun zual hote hi chuan phul pal mai mai lo tura kal khawmte ngenin leh infuih thar reng kan ngaih thu te, chumi kawnga pawimawh tak Mizo thu leh hla tihhausak leh tihhmasawn zelna tura ke penna langsar tak pakhat lehkhabu tha thlan chu MAL in a chhunzawm tak zel thu a sawi a. 

Dr. Rualkhuma Colney Secretary, MAL chuan kum 2018-2019 chhunga MAL chetvelna hrang hrang report a pe a.

 He huna khuallian Pu Zonunsanga Khiangte MJA President chuan kum 2018 chhunga Mizo tawnga lehkhabu chhuak zinga tha ber, Book of the Year 2018 lawmman chu Hringnun Hrualhrui  tih Mafaa Hauhnar (H. Lalrinfela) ziah chu a nu Pi Lalrinliani hnenaha hlan a ni. 

He chawimawina hian thuziak cheimawi (Citation) bakah Tangkafai Rs. 5000/- a keng tel bawk. Chawimawina thucheiah chuan hetiang hian a inziak a. “He lehkhabu hian mihring nun hlutna leh awmzia ngaihnawm takin min hrilh a. Lunglenna leh khawharna ruamah pawh thu leh hla rimawia min awiin, beiseina eng min siamsak a ni” tiin. Mafaa Hauhnar hi boral hnua Book of the Year dawng pathumna a ni bawk.

 He huna khuallian Pu Zonunsanga Khiangte, MJA Presidet chuan Ziakmite hi kan ram rohlu, tawngdik min zirtirtu, thangthar zel tana kan tawng humhalhtu an ni a. Tunlai hian Mizo tawngin nasa takin harsatna a tawk a, a bik takin social media lamah kan tawngin tihduhdahna a tawk nasa tawkin a ziak dik zawng a tan kan lak zel a pawimawh a tih thu sawiin, MJA te pawh MAL nena Mizo tawng dik ziah chungchanga workshop leh seminar hial te pawh neiho a duh a thu a sawi a. Mizo tawngin hma a sawn zel theih nan Mizo tawng hi 8th Scheduled a dah a tul thu te, MAL te pawhin tunlai thiamna hmanga chak leh zuala whatssap, YouTube leh Facebook te pawh hmang tangkai thei tura tan lak a duh thu a sawi bawk.

Chawhnu lamah Book of the Year 2018 top 3 ziaktute kawmna hlimawm tak hman zui a ni a. He hunah hian Zoremi Hmar Zote, Pi Lalrinliani (Mafaa Hauhnar nu) leh Pu Lalthuamliana Tahan te chu kawmna hun hman a ni bawk.