Bawihte

(Derek puala thuziak)

- Aremruati Ngente

He hmasawnna leh intlansiakna khawvelah hian, tling lo leh tlak lo bik nih hlauin mi tam tak an intlansiak mup mup a. Lansarh loh leh ropui loh hlauhna rilruin a thunun tawh te thinlungah chuan dikna leh rinawmna chu sawi loh, hmangaihna leh duhsakna pawh a vul thei ta meuh lo anih hi. Ngilneihnain a par chhuan tuma kuhmum a rawn chhuah tan ve dek dek tawh chuan, itsikna thinlungin 'A sir lehlam atanga thlirna' a rawn hring chhuak nghal zel a. He hmasawnna khawvelah hian hmasawnna nasa lutuk karah, intlansiakna beitute chu 'chawlhna tui thiang' dawn chakin,  tuihal leh dang charin an chau a. Mi nung ni chunga an hmuh theih 'chawlhna' chu hnai teah a awm a ni, tih pawh ngaihtuah hman lo in, an zuan phak loh a hla zawk thlirin an thahrui neih chhun an la sawr chhuah belh sauh sauh mai si.

Hlawhtlinna chang tura midang nekchep kher a tul emaw tih tlatna rauin, nang ai a fing leh hre tam inti te ngaihtuahna a luah  khah mek laiin, lalna leh thuneihna chan tuma an huang an zauh mek laiin, kawmchhak nu fak tura kawmthlang nu sawichhiat kher a ngai emaw ti tlat tute finna au thawmin bengchheng a chhuah mek laiin, thingtlang naupang rilru thianghlim tak, hmangaihna leh ngilneihnaa khat khan darkar rei lote chhungin i thiltih leh i thlalak hmangin facebook khawvel i rawn luah ta chuai chuai mai a, nangin vanduainaa i ngaih kha, kei ni tan vanneihna leh zirlai ropui tak min chhawpchhuah saktu a ni tih pawh ngaihtuah thiam hmel pawh i la pu meuh si lo.

I cycle-a i arte chil palh, i pawisa neih zawng zawng nen hospital  i panpui laia i hmangaihna leh ngilneihna thinlung hliam nat turzia ka ngaihtuah a. Chung zawng zawng kara i beiseina hlimthla rawn par chhuak te nen hian, he inchirthehna leh duhamna khawvel hi i cheimawi a, i thiltih khan nang ai a fing leh thil thlir thiam zawk a i ngaih puitling tam tak te khawhawina tukverh thar hawnsakin, an rilru chhungril i khawih sak a ni tih i hriatthiam hunah meuh erawh chuan, he i chenna khawvel hian tuna i rilru put ang pu reng chung chuan hliam tam tak a siamsak hman daih tawh ngei ang che.

Mahse  maw...inthiamlo leh hrehawm ti hmel ngawih ngawiha arte leh Rs 10 i lek lai thlaa, nun thawnthu ngaihnawm inphum leh kha i ngaihtuahna thinghlim tak chhunga 'hringnun darthlalang' inphum kha hloh lo turin nghet takin chelh la, i khawvel su nghing tura hlemhletna thlipui leh duhamna tuifawn a lo thawh hunah leh, lemchanna hmaikawr hlirin fiah che tuma an rawn din hual thup hunah che pawh, kha 'thinlung thianghlim' hmangaihna leh ngilneihnaa khat kha, i chakna thuruk a la ni fo dawn si...