ZONUNMAWII - 7

(True Story)

BUNG--6 NA (Last)

By:- Rs Thangluah

Msa nen chuan ṭhian anga kan awm a ngai leh ta. Mahse,a hma ang khan min la ngaihsak tho a,na viau mah ila a zia deuh e. Kan inṭhen aṭang chuan ngaihzawng em em a nei hran lova,star erawh a ngah thei ṭhin khawp mai. A mit hi a lerh ve a,hmeichhe hmelṭha chu hre ve tak a ni. Mahse,nuthlawi ho hian an star thei phian reuh a. Amah lah hian nuthlawi ho hi an thlavang a hauh nasa thei phian mai bawk si. Lehlam kawng zawng chuan ka tan miṭha tak a ni,min tina tu ni mah se,min thlahthlam ngai lo a ni.

Ka nun pawh Pathian zarah pangngai takin ka hmang chho ve zel a. Mahse,zan lamah ka hun liam tawha ka thil tawn rapthlak tak khan ka mumang lamah min tibuai leh zeuh ṭhin a. Chu chuan min tina nawn leh ṭhin a ni;mahse,beidawnga hnung tawlh mai ka tum lo a ni. Ka theihtawpin hma lam ka pan a,ka fanu tan ka bei a ni.

Pic: Lalhriatpuii

Msa chuan ka fanu chu a hmuh ve chak thu te min hrilh ṭhin a. A thlalak ka neih chhun a ṭhiante ho nen an infiam lai chu ka pe ve ta a;

"A nu a chhun a,a hmelṭha khawp mai,"

"Hmm min bawl kher lo la,"

"Bawl love,a hmelṭha lutuk tak tak lawm,"

"Nih ka lawm e,e hrilh tur che ka nei a sin,"

"Sawi la,"

"Tun kum tawp lamah ka rawn haw thei maithei,"

"A ni maw? Yesss kan inhmu ve thei tawh dawn tihna ni maw?,"

"Imm ni chiang e. Mahse,ka la hre chiang chiah bik lova,"

"Immm i lo haw hrim hrim chuan a ṭha ni mai,"

"Engnge ka lo hawn ang che?,"

"Iihhhh......Cigarrete cial tawk,"

"Ti leh ta,nghei ve tawh la,"

"Nia mahse,min lo hawn tho la,"

"Nia i tih tlat te chuan le,"

"Fel lutuk e,good girl,"

"Hmmm i sual mai e a,"

"Tak taka kan inbual ve lawk nge aw,"

"Awle fai deuh khan aw,"

"Yessi,"

Mizorama haw chu ka châk rual rualin ka huphurh ang reng khawp mai. Mahse,Msa chu hmuh ngei ka tum tlat a ni,ka fanu pawh ka bulah hruai ngei ka tum bawk a.

June ni 16 a ni a,hemi ni hi Father's Day a ni a. Min hringtu ka pa kha ka tunge a nih tih hi hre lo mah ila,Father's Day chuan ka ngâi a ni. A la dam a nihchuan khawiah emaw he hun hi a fate nen an hmang ve ngei awm si a. Fanu a nei tih te hi a hre ve ang em le? Ka nu hian ngatinge ka pa chanchin hi min hrilh a tum ngai miah loh le? Ka pa hi a thi tawh zawk em ni le?

Ka nu nen pawh chuan a khât tawkin kan inbe pawp zeuh zeuh ṭhin a. A châng chuan ṭha deuhin inbe ve ṭhin mah ila,a tawpah chuan kan inhnial kan inhnial a,kan inhnial thinrim leh nge nge ṭhin. Ka fanu erawh a damṭha tih ka hria a,ka lawm a ni. Engtikah emaw chuan ka bulah hian hlim takin a la awm ve ngei ngei ang.

"I nu bulah engmah sawi suh ang che. I sawi vaih chuan i nu ka vuak tir ang che,"ka pa hrawn chuan ka kâ chu a hup ping vek a. Engang pawn âu chhuah tum mah ila,ka âw rawl chu a chhuak thei si lo. Ka pa hrawn chuan min man bet hneh si,tal chhuah ka tumna lamah ka tha te chu a zawi zova. A tawpah phei chuan che tur pawh ka awm tawh lo,thlanin min bual huh vek a ka zawi vek tawh a ni. "I nu bulah i sawi vaih chuan i châk lovang aw. I nu bulah i sawi chuan i thi a ni mai,"tiin min vau zui leh a. Ka hlauh vang chuan ka khur nasa khawp mai,ngawi rengin ka lu chu ka bu nghut ringawt a.

Zing lam dar 2:30am velah chuan ka mutui lai chu ka harh hlawl a. Ka mumanga ka thil hmuh avang chuan ka thinlung chu a rawn na thar leh a. Ring taka ṭah hawm hawm ka châk a;mahse,ka ṭap chhuak thei si lo. Ka biangah chuan hruk sen lohvin mittui a lo luang nghal zung zung a. Kha ramhuaipa kha ka hua a ni,ka nun zawng zawng tichhe vek tu chungah hian phuba chu ka la la ve khawp ang. Kumkhuain ka ngaidam ngai lo ang,ka hua a ni ka hua.

Ka depression neih chu a rawn chhuak leh zauh ṭhin a. Ka depression a rawn chhuah châng chuan zanah ka muhil thei lova,chaw ka ei thei bawk si lo. Ka taksa pawn a tuar ve tawh khawp mai,ka hna ka ṭhulh thei bawk si lo. Chutianga kar 1 vel ka awm hnu chuan loh theih lohvin ka hnathawh naah chuan chawlh ka lak a ngai ta a. Kan pu te pawn min lo hrethiam khawp mai a,thla 1 chhung chawlh min pe ta a. Ka lawm khawp mai,thla 1 chhung chuan uluk taka in enkawl ka mamawh a ni. A hmasa berin rilru lam Doctor ka râwn hmasa ber a,ani chuan damdawi eitur min lo chawh nasa khawp mai. Damdawi eitur ka inchhawp leh rup ta mai,a van hahthlak ṭhin tak êm!

Damdawiin aṭanga ka haw chu ka mu hahdam vang vang phawt a. Chumi hnuah ka Phone chu ka bih thuak thuak a,Msa message pawh a lo awm leh reng tawh a. Min kalsan avang khan a inthiam lo deuh a ni ngei ang. Lo let leh a duh thu leh engkim a siamṭhat tur thu te a rawn sawi duah mai a;

"Amawite,ka tih dik loh zawng zawng kha ka siamṭha leh vek ang a. I hnenah ka rawn let ang,rem i ti em?,"

Msa message chu chhan mai dan tur ka hre lo khawp mai. Msa hian min hmangaih lo tih chu ka hre chiang tawh khawp mai;mahse,tinge rawn let leh a duh le?

"Engnge rawn let i duh chhan?,"

"Iiiih....ka tihnat che avang khan ka tihpalh aw. Engkim ka siamṭha leh vek ang,"

"Chumi avang chuan maw?,"

"Tihnat che ka duh hleinem,"

"Min tihnat i duh lova;mahse,min tina tho sia,"

"Ni e,a dik a lawm;mahse,tun aṭang chuan ka tina tawh lo ang che,"

"Ka ring thei che ang em?,"

"Imm,"

"Awle,nihchuan ka pawm ang,"

"Ka lawm e,"

"Lawmthu sawi a ngai hleinem,"

"Aaaa...iihh...aw awle i ṭha em?,"

"Ṭha chiah lo,"

"Tinge? I damlo leh tawh mi a? Engtinnge i awm a?,"

"Engmah ni love,ka ṭha lawm. Hahchawlh ve lawk ka duh a,kan mu lawk a nge aw,"

"Awle inenkawl ṭha ang che aw,"

Msa message chu ka reply tawh lova. Ka out a,khumah chuan ngawi rengin ka mu meng kur a. Msa chuan min hmangaih lo;mahse,kawng engkimah min ngaihtuah thung a ni. A hnen aṭang hian Hmangaihna tih loh chu ka dawng kim vek ni maiin ka hria. Mahse,hmangaihna tellova in ngaihzawn chu a famkim thei si lo.

Msa nen chuan kar 1 vel chu kan inkawp leh tawh a. Mahse,a hma ang kha a ni thei tawh lo a ni. Min hmangaih lo a ni tih hi ka hming ka hriat chian tluk zetin ka hre chiang si a. Zep lo chuan a hahthlak a ni,hmangaihna tellova ngaihsakna leh duatna ringawt chu a kim lo a ni. Chuvang chuan Msa pawh chu kalsan mai turin ka rilru ka siam fel ta a;mahse,a harsa ve viau mai. Ka tih ngei erawh a ngai si a,ka chunga a ṭhatna leh felna avang hian ka chelh reng thei lo a ni;

"Bestie,i buai loh chuan titi pui che ka va duh ve aw,"

"Aw buai lutuk love,eng lam nge ni ta? I ṭha meuh maw?,"

"Imm ka ṭha lawm,i buai lo maw?,"

"Aw buai love,i duh duh i sawi nghal char char thei,"

"Min hmangaih em?,"

"Aaaa aw ka hmangaih che lawm,"

"Ka hlim nan ringawt i sawi a ni tiraw? Dawt min hrilh suh aw,min hmangaih lo tiraw?,"

"Tinge tiang hi min zawh a?,"

"Min hmangaih nge hmangaih lo?,"

"Ka ṭhian i nih ang chuan ka hmangaih che. Mahse,....ka ka tihpalh,"

"Inkawp zui tawh lo mai ang aw. I tan pawh ka hahthlak lutuk palh ang,"

"Chutiang pawh a ni lo,"

"Ka hria lawm,min hmangaih lo tih chu. I rilru zawng zawng min pe thei lo tih pawh ka hria;mahse,i rilru zawng zawng min pe thei lo chung pawha min ngaihsak na zawng zawngte hi ka tan chuan a tawk lutuk a sin. Chuan,i chungah hian ka thinlung takin ka lawm takzet a nia aw,"

"Amawite,"

"Mahse,ka ṭhian i ni reng thei ang tiraw?,"

"Ka sual ve ngawt mai tiraw?,"

"Ka zawhna chu min chhang rawh. Ka ṭhian i ni reng thei ang tiraw?,"

"Aw thei e,i ṭhian ṭha tak ka ni reng dawn a lawm,"

"Awle tun aṭang chuan kan inkarah inṭhian ṭhatna chiah a awm tawh ang,"

"Aaa aw awle,ka hrethiam e,"

"A nih ka out phawt nge aw,min ngaihtuah lutuk lo la aw,"

"Imm inenkawl ṭha la aw,"

"Awle nang pawh aw,"

"Immm awle,"

Msa chu keimah zawkin ka thlah liam a ngai ta. Mahse,ka theihnghilh theih loh tur chu ka tan miṭha tak a ni tih hi a ni. Ani chu ka tan ṭhian ṭha tak a ni a,chuvang chuan a tan pawh ṭhian ṭha tak nih ka tum ve bawk a ni. Ka nuna thil thleng tam tak avang chuan beidawn chang ka nei fo ṭhin. Mahse,chutih hunah chuan ka ṭhian Msa hian beidawng lo turin min fuih ṭhin. A hnen aṭang hian heng ṭawngkam ,"I ṭha em?," ,"In enkawl ṭha rawh aw," tih hi ka dawng ziah ṭhin.

Beidawng lovin hma lam ka pan ve ṭawk ṭawk a,tlu ṭhin mah ila tluk hlen ka tum ngai lo. Ka nuna thil thleng tam tak chu theihnghilh thei lovin hre reng mah ila,chu thil avang chuan hnungtawlh ka tum ngai lova. Hma lam ka panna kawnga min puitu atan ka hmang zawk ṭhin. Ka pa hrawn chunga phuba lâk ka tumna rilru pawh ka sut leh a,engkim Pathian kutah ka dah a. Pathian a hun a tih hunah phuba chu a rawn la mai ang tiin ka rilru ka siam fel ta zawk a.

----A TAWP TA----