ZONUNMAWII - 4

(True Story)

BUNG--4 NA

By:- Rs Thangluah

Hun leh ni a liam ve zel a,ka nun pawh tlem tlem chuan a pangngai chho ve hret hret a. Mahse,hahdam taka nun hman chu a harsa ve ṭhin khawp mai,ṭhian fel tak tak ka chhar a. Anni chuan hmangaih takin min dawm ṭhin,ram pawnah ka awm tawh si a. Mizo ṭawng hman a rem tawh si lo;mahse,ka naupan laia ka lehkha zir kha ka theihnghilh bik lova. Bo lo tur tawk chuan ka awmna hmuna an hnam ṭawng hman chu ka thiam ve tawh a,ka ṭhiante chuan min zirtir ve reng bawk a. Ka hnathawhnaah ka tui bawk a,nuam ka ti ve ṭhin khawp mai.

Pic: Lalhriatpuii

Kum tam tak liam ta a ka nun tichhe tu ka pa hrawn chu ka haw em em a. A chungah chuan phuba pawh lak ka châk takzet a ni;mahse,engtinnge phuba chu ka lak ang? Ka fanu an bulah a awm bawk si,ka fanu chu ngâiin thlahlel ve viau ṭhin mah ila,ka bulah ka hruai thei si lo. Ka nu chuan engtinnge a enkawl chhoh ang? Nu hmangaihna a dawng pha ve awm si lo,keimah ang a nun rethei tak hmang tur chuan ka phallo a ni. 

Min hringtu ka pa chu amah hre ngai lo mah ila,ka theihtawpin zawn chhuah ka la tum ṭang ṭang a. Mahse,a hming leh a hmel pawh ka hre si lo,zawn hmuh chu a har viau maithei. Mahse,beidawn mai ka tum bik lo a ni.

Ka hna bang chu ke in ka haw a,thui pawh ka kal hma in ka hnung lam aṭang hian mipa 1 hian a tlan pahin min rawn su thawi fua mai a,"Oooh Sorry,"tih pahin a nui suk a. Keichuan,a hmel pawh en lem lo chuan,"Aw a pawi lo a pawi lo,"ka lo ti liam ve puat a. Ani pawh chu hmanhmawh tih hriat takin a kal liam ve zui nghal a,ngawi rengin ka thlir liam zui ve mai a. Khapa kha ka tawng leh ang tih erawh ka suangtuahna ah pawh ka la suangtuah chhin ngai lo. Mahse,ani nen khan hmangaihna kawng kan zawh ṭan dawn chauh a ni si a.

Inrinni a ni a,ka damṭhat loh avangin in check up turin Damdawiinah ka kal a. Damdawi min lo chawh hnem khawp mai,zan lamah ka mu ṭha lo em em a,chuvang chuan ka taksa in a tuar a ni ber mai. Chawhnu dar 2:00pm velah kan awmna Apartment lam panin ke bawkin ka haw leh a. Mahse,Damdawiin chu a hlat ve tham deuh avangin ke chuan kan Apartment chu ka thleng zo ngang lo a ni. Bus Stand-ah Bus ka chang ta ringawt a,rei pawh ka chan hma in Bus chu a lo thleng ve nghal mai a. Hmanhmawh lem lovin ka lut ve nghal a;mahse,rin aiin mi an lo tam a ṭhutna awl pawh a lo awm tawh lova. A rem laiah chuan ka ding ve ta ringawt a,ka hnung aṭangin tu emaw hian min lo kheuh zauh a,ka hawi let nak chuan hmannia min rawn su tu mipa kha a lo ni a,"Lo ṭhu rawh,"tih pahin a ṭhutna chu min lo kian a. Ka nui a,ka lu ka lo thing a,"Aih a ngai lo,ka ding thei a lawm,"ka lo ti mai a. Mahse,min din tir chu a tum lo chiang khawp mai,"Mipa te chu kan ding thei a lawm,lo ṭhu rawh,"tih pahin a ṭhutna aṭang chuan a rawn tho chhuak a,min nam ṭhu deuh ti tih a. "Aw awle nih ka lawm lutuk e,"tih pah chuan ka nui vur vur a. Ani pawh chuan min rawn nuih vur vur a,"Khawi lamah nge i kal dawn a?,"tiin min zawt leh a. Ka kalna tur lam chu ka hrilh a,kan kalna tur te chu a lo inang zel leh nghal a. Kawngtluan chuan kan inkawm char char a,a felin kawm a nuam phian mai.

Bus aṭang chuan kan chhuk rual a,thui vak lo chu ke in kan kal a. Ke a kan kal chhung chuan,a ṭawng tlem angreng hle mai. Mahse,a nêlawm ru reuh phian a,an In peng kan thlen chuan,"Ka pen san tawh ang che aw,tluang deuhin i kal dawn nia aw,"tiin min thlah liam thlap a. A hmel en aiin a nêlawm a,a polite reuh phian leh nghal a. Mahse,ka theihnghilh lian deuh mai chu,a hming ka zawh theihnghilh daih. Kan la in hmu leh êm ang chu maw,kan inhmuh leh hun hunah a hming ka zawt tawh ngei ngei ang.

Ka roommate English nula bulah chuan ka ṭhianpa chhar thar chanchinte chu hlim takin ka sawi ṭhin. Ka awmna hmunah chuan mizo hmuh tur an vang khawp mai,zan lamah chuan Facebook lamah lutin Mizorama ka ṭhiante ka be ve ṭhin. Ka chanchin lungchhiatthlak tak erawh chu tumah ka hrilh ngai lem lo. Anni chuan ka hun liam tawh an hre lova,tun hnua ka hun hman mek chiah min hriatpui a ni. Mahse,anni chu Social Network aṭanga ka ṭhiante ni mah se,ka nun min ti hlimtu te an ni. A khât tawkin ka chanchin min zawt ve reng a,ka damṭha em tih phei chu min zawt âwl ngai lo. 

Ṭumkhat chu Mizo pakhat ṭhian ṭha tak ka chhar thar a. Ani nen chuan ka hna ban apiangin online in kan inbe ṭhin a,ram hran daiha awm kan nih avangin kan online hun chu a inrual thei meuh lo a ni. Hnathawh nei ve ve kan ni a,kan hnathawh hun chhung chuan Phone kan khawih hman lo ve ve a ni. Ani chu India ramah a awm a,kei erawh India ram pawnah ka awm daih thung si. Ni 1 ah chuan darkar 1 pawh kan inbe hman meuh lo a ni ber mai. Mahse,chuti chung chuan min ngaihsak ve em em ṭhin. Kan inbiak chhunah chuan min ngaihsakin min duat thiam viau ṭhin.

Ka mizo ṭhian chhar thar nen chuan kan inkawm nêl ve tawh khawp mai. A ngaihzawng neih chungchang te min hrilh a,kan hlim dun thei khawp mai. Kan tui zawngte leh kan ngainat zawngte kan inhrilh a,nuam kan ti ve ṭhin khawp mai. Ka hna bang In ka thleng chu ka Phone ka en nghal a,ka ṭhian chhar thar chuan message min lo hnutchhiah ṭeuh tawh a;

"I hna i bang tawh em? Keichu ka haw tawh a,chaw ka eikham chiah,"

India Sanaah chuan zan dar 7:00pm vel a nih ka ring a ni. A message chu ka chhang nghal vat a;

"Imm hei ka haw ve chiah a,In ka thleng fel ve chiah e,"

"I message ka lo nghak reng a,a rawn thleng ve thei hram e. I chau em?,"

"Aih chau love,nang zawk i chau em?,"

"Aih chau love,keite chu Robot ka ni lawm,"

"I ti ve ziah,"

"Hehe tak tak lawm,"

"Zanin chu mut hma deuh ka duh a,min hrethiam mai la,"

"Tehreng mai,i chau awm sia ka hrethiam che lawm,"

"A nih nang pawh mu har lo la aw,muttui phawt aw,"

"Awle mu har lovang,muttui le,"

Zingah chuan min lo wish leh thlap a,a fel reuh khawp mai. Chhun lamah erawh a reh leh tlawk tlawk thung a,kei pawh chuti tho chu ka ni e. Chaw eikhamah hnaa kal turin ka insiam malh malh a,ka ṭhiannu nen chuan kan chhuak rual a. 

Ka nu nen pawh a hma aiin kan inkar a ṭha leh deuh tawh a. A khât tawkin kan inbe leh zauh ṭhin,ka nu nen kan inbiak chhunah chuan ka fanu chanchin ka zawt ngei ngei ṭhin. A damṭha tih ka hriat chuan ka hlim viau ṭhin,thla 1 a nihlai bak kha a hmel ka hmu si lova,ka hmu chak ṭhin khawp mai. Ka nu bulah chuan inthlahrung takin ka fanu thlalak chu remchang hmasa bera min lo thawn turin ka ngen ta ringawt a. Ka nu erawh chuan sum bak ngaihtuah a nei si lo,ka fanu thlalak pawh chu min rawn thawn har khawp mai. Mahse,ka beidawng mai lo,ka nghak a nga,ka nghak chhuak em em ang.

Thawhlehni a ni a,kan hna lamah kan buai deuh avangin kan haw tlai khawp mai. Hmanhmawh takin Bus stand lam pan chuan ka kal hlawk hlawk mai a,Bus stand ka thlen hma deuh chuan ka hnung lam aṭang hian Car 1 hian horn a rawn pe deuh ṭhawt ṭhawt a. Footpath-ah ka kal bawk sia,a chhan ka hre lo hle mai. Muang changin ka hawi let a,ka hnung lawkah chuan Car 1 hi a lo ding reng tawh a,"I va hmanhmawh awm ve a,lo kal rawh ka thlah haw ang che,"tih pahin a lo chhuak nghal a. Khapa bawk kha a ni,ka inthlahrung ang reng khawp mai,"Aaa a ngai hleinem,Bus in ka haw thei a lawm,"ka lo ti mai a. Mahse,ka thusawi chu hre âwm pawn a awm lo,"Lo lut rawh le,"tih pahin a Car kawngkhar chu a hawng nghal a. A nui vur vur a,"Min hlau em ni? Engtinmah ka ti lo ang che,lut rawh,"tih pahin a nui suk a. Inthlahrung tak chung chuan Car-ah chuan ka ṭhu lut ve ta rawih a,"Min hlauh hmel thei em mai,a nuam pawh ka ti lo,"tih pahin za vak lovin a nui a. "Aaa chutiang pawh a ni lo,"ka lo ti nghal vat a,amah bawk chuan,"Tak taka ka fiamthu nihkha,i hming min hrilh thei ang em? Nicky ka nia,"tih pahin a Car chu a ti nung a,a kut dinglam chu a rawn phar chhuak a. "Aaa Zonunmawii ka nia,"tih pahin a kut chu ka lo ban ve nghal vat a,kan inchibai lawp lawp a,"Indian i ni em?,"a rawn ti ta nge nge a. "Aw ni e,"tiin ka lo chhang vat a,ka hming te chu a lam thiam lo khawp mai. Mahse,min koh ve ngei a duh bawk si a,a tawpah chuan,"Jonun,"tiin a lam thiam dan ang berin min ko ta a. Ka nuih a za kher mai;mahse,nuih chi a ni si lo In ka thlen hunah ka nui nasa viau ang.

In ka thlen chuan a lo tlai leh duai tawh a. Ṭhut hahchawlh pahin ka Phone chu ka phawrh a,Facebook-ah bawk chuan ka lut leh a. Ka ṭhian thar Msa chuan message min lo hnutchhiah leh ṭeuh tawh a;

"I hna i bang ve tawh em? Zanin chu kan bang hma a,ka haw hma khawp mai,"

"Zanin chu rin aiin i rawn lang har,in hna in buai deuh a nih ka ring. A tlai tawh sia,ka lo mutsan tawh mai ang che. Tui deuhin i mu dawn nia aw,"

Msa chu a online tawh lova,a message pawh a rawn thawnna a rei tawh viau in ka ring a ni. A active hun pawh 45mins ago tih a ni,zing a thawh huna a hmuh turin message ka hnutchhiah ve ta tho a.

"Zanin chu kan buai lutuk a,kan haw tlai a lawm le. Nang pawh tui deuhin i mu dawn nia aw,"tiin message ka hnutchhiah ve nghal a. 

Ka nun hahthlak leh bumboh tak hi tuman min hriatpui lova,hria pawh nise min hriatthiam sak ka ring ngai lo. Zanah nise,a khât tawkin ka mang lamah ka thil tawn rapthlak tak kha ka mangphan chang lah a tam. Ka nu hnen aṭang lahin hmangaihna aiah endawnna ka dawng bawk si,ka ngaihtuah thui poh leh ka na telh telh mai si. Heng ka chunga thil thleng zawng zawng hi tu emaw hnena inbunruah te pawh ka châk ṭhin. Mahse,chutiang tur chuan tumah rin ngam leh min hriatthiampui tu tur an awm si lo. Kum tam liam ta a depression ka neih kha a chang chuan a rawn chhuak leh ṭhin a. Keimah chauha ka awm phei chuan,thil hi ka ngaihtuah ngut ngut a,keimah leh keimah ka inkhawngaih a. A rukin ka ṭap ka ṭap ṭhin,ṭhian fel tak tak neiin pawn lamah chuan hlim ve viau ṭhin mah ila,ka chhungril erawh natna a khat a ni si a.

Msa nen chuan kan inkawm ngeih chho khawp mai. A bialnu nen an in ṭhen ṭhu te min hrilh a,ka thiam ang tawkin ka hnem ve ṭhin. Mahse,ka hnem zo meuh lo a ni,bialnu neih a tum tawh loh thu te min hrilh a,ka khawngaih khawp mai.

Nicky nen pawh kan innêl ve tawh khawp mai. Msa bulah pawh chuan Nicky nen kan chanchin chu ka hrilh ṭhin,ani chuan Mizo tlangval ngei nei turin min duhsak em em thung a. Mahse,ka dinhmun hian Mizo tlangval fel tak hi a phû mawlh lo a ni,Msa bulah erawh ka nunhlui chanchin ka la hrilh lo. Nicky nen chuan ṭhian angin thla tam kan inkawm hnuah ka hringnunah a vawikhatna turin,hmangaihna kawng ka zawh ve ṭan ta. Nicky nen chuan kan hlim dun thei khawp mai,a chang chuan ka nihna te hi ka lo theihnghilh leh hman ṭhelh ṭhin.


##A hnuaia fakna hi lo hmet ve rawh.##