Party ruihchilh lo bial Aizawl West I hi Lalpa Pathianin Politics Thianghlim bul tan nan leh Zoram Thar in tan nan a hmang dawn a nih ka ring: Zaichhawna

Aizawl | March 25, 2019: Vawiin chhun Dar 12  khan Aizawl DC Office ah Zoram Thar hruaitu Rev. Dr. Zaichhawna Hlawndo chuan a dinna bial ngai Aizawl West I a MLA by Election atan Nomination File.

Zoram Thar hruaitu hi Executive Committee member ten an tawiawm.

Rev. Dr. Zaichhawna Hlawndo chuan chanchinbu mite hnenah, "Party ruihchilh lo bial Aizawl West I hi Lalpa Pathianin Politics Thianghlim bul tan nan leh Zoram Thar in tan nan a hmang dawn a nih ka ring," a ti. A sawi zelna ah, "he by election ah hian opposition MLA tur emaw ruling party te zawm turin emaw ka ding dawn lova, Kan ram rorelna Pathian duh dan ang taka a kal theih nan  Lalpa tan Assembly House ah Puithiam hna thawk a, Bible hmanga rorelna a kal theih nan palai hna thawk turin ka ding ve dawn a ni," a ti a.

 "He by election ah hian Lalpan min tlin tir a nih chuan Kan ram leh hnam kaithawhna tur thu ka dawn te Assembly ah ka pu lut dawn a, Aizawl West I pawh Bial entawn tlak (Model Constituency)ah Pathian chakna rinchhanin bial mipuite nen siam kan tum ang," a ti bawk.

An hruaitupa a din chhan pawh chanchinbu mite hnenah hetiang hian Zoram Thar executive chuan an sawi fiah-

Dr. Zaichhawna Hlawndo hi kan ram rorelna ah hian Lalpa tana huaisen taka a din ve a, kan ram leh hnam damna tur thu a dawn te hi Assembly House ah a sawi ve theih nan. 

Aizawl West I mipui ten party mi bik in thliarna leh duhsak bikna awm lova kan chanvo tur dik tak kan chan vek theih nan.

Aizawl West I hi Zoram politics a Pathian Lal Ram a thlenna hmasa ber a nih theih nan.Thlarau, rilru leh taksa damna Zoram Thar a  lo thlen tan theih nan. 

Aizawl West I Bial atang ngei hian kan ram leh hnam damna tur –Zofate kan sal tanna atanga kan chhuahna (independence) tur bul tan a nih theih nan. 

Lalpa miten kan duhthusam ang ngeia kan ram neitu Lalpa Isua Krista kutah Aizawl West I atanga rorelna thianghlim chu bul tan a lo nih theih nan. 

Aizawl West-I Khawtin leh Vengtinte hmasawna  “Sem sem dam dam eibil thi thi”  tih hmanga kalpui a nih theih nan. 

Mizoram Assembly House rorelna leh Zoram mipuite nun-ah Zoram Thar (Pathian Lal Ram)  a lo thlen theih nan.