Aizawl |March 25, 2019: Vawiin khan Mizoram BJP president Prof JV Hluna chuan press mite kawmin Mizoram BJP in MP candidate atana an chhawp chhuah NIRUPAM CHAKMA (61) chungchang a sawi.
A thusawi ṭhenkhatte;
Pu Nirupama te pafa Mizo zingah an mikhual lo.
1. Pu Nirupama pa Pu Shena Kr Chakma kha Brig. T.Sailo khan duh taka a thlanchhuah PC sorkar chhung zawnga PC MLA rinawm tak, Assembly House chhungah pawh Tawlhloh Muffler awrh ngat thin a ni. Brig.T.Sailo ngaisang thintute’n lo chhinchhiah ila a fapa hi i vote theuh ang u.
2. Pu Nirumpama hi 1986 khan Government Aizawl College atangin B.A.(Pol.Sc Hons) a zawh hnu lawk khan Congress turin Pu Hawla’n a sawm a. Kum 1987 UT atanga State Assembly Election hmasaber-ah uncontest-in a tling a, uncontested-a thlantlin hmasa ber record a ni. Vawi 5 Congress MLA kum 10 Minister a nih chhungin portfolio hrang hrang a chelh a. Chungte chu:
a. Transport
b. Co-orporation
c. Printing and Stationery
d. Sericulture
e. Tourism
f. AH & Vety
g. Aviation
h. I & PR
i. Soil & Water Conservation
j. CMO (Chief Minister Office)
Tourism Minister a nih lai hian Sairang thlanga Missionary hmasa Pu Buanga leh Sap Upa te’n Mizoram leilung an rawn rahna hmasa ber hriatreng nan Rest House tha tak a sa a ni. Hêng Portfolio hrang hranga a thawhpui Department a mi te pawh hian an ngaina a tun tum hi amah in puih theihna hun tha a ni a, vote vek turin kan ngen che u a ni.
3. Lengpui Airport-ah kut a thlak hmasa ber: Pu Hawla’n a ngainat em avangin Lengpui Airport siam dawn pawh khan Aizawl atangin Sorkar Officer zawng zawng an Motor kawl lai nen kalin officer nawlpui telna “Lengpui Airport laih hnatlang” siam a ni a. Pu Hawla thu ang ngeiin “Pu Nirumpama’n a chêk hmasa ber” a nih kha. Congress-a a thiante leh Lengpui Airport chhawr tangkai zawng zawngin Pu Nirumpam-a hnathawh tha hre rengin i vote ang u.
Mizoram Law College atangin LL.B 2007 khan a pass bawk a, Govt. Aizawl College leh Mizoram Law College-a a classmate te leh an zirtirtu te pawhin an ngaina hle thin. Pu Nirumpama hi zaithiam, AIR Artist ngat a ni bawk.
4. Politician a ni: Kan sawi tawh angin a pa atanga MLA, Politician hlun, India dan hre tak chunga rorelna ina thil hrilhfiah thiam tak, mi hmin thei tak a ni. Politician ni lo MP-ah kan thlang fo tawh a, kum nga chhungin an tlangnel hman mang thin lo. Central khuan mahni State-a Minister lo ni tawh thin, experience nei tha chu an ngai pawimawh ngei ngei a, Quarters-ah pawh FLAT mai ni lo, Bangla an luah deuh zel, Pu CL Ruala pawh Congress mah nise heta Minister ni thin a ni a, NDA/BJP Sorkar khuan zah takin Bangla an luah tir a ni.
5. Pu Nirumpama BJP/NDA/NEDA a ni: Pu Hawla te leh Pu Zoramthanga te in nih loh siakna leh an inpuh tawnna party BJP-a kan State Vice President a ni a, chu chu NDA, MP inthlan zawh veleha Sorkar leh mai tura lian ber leh PM chang leh tur Party a ni. NEDA pawh kan ni a, hei hi chu North-East Development atana kan inthlun khawmna mai a ni.
“Sorkar hna rei tak ka thawk tawh a, Delhi-ah ka mikhual lo, State Sorkar project te ka bawkzui thin ang” tih emaw “Football khel ka lo hruai tawh thin a, hlawhtlinna tam tak kan hmu, ka vanglai hun tha a ni” tih te ai chuan Central-a Sorkar leh ngei tur BJP National General Secretary meuhin “Mizoram atanga BJP candidate hi a tling ngat a nih chuan Central sorkar-a Minister a nih ngei nan hma ka la ang” a tih hi chu Minister nih phu reng kan candidate bawk a, a phurawm a ni. Kawng tinrenga Mizoram hmasawnna tan leh kan thalai te eizawnna zau zawk dappuitu atan a itawm tlat.
6. CAB: Pu Amit Shaha’n February 17, 2019 North Lakhimpur-a party Rally-a thu a sawi khan, “NDA kan sorkar leh ang a, CAB hi kan pass ngei ngei tawh ang, amah erawh chu Northeast mite himna turin Provision thar kan dah ang” a tih avanga ASSAM-a AGP ho CAB avanga NDA chhuahsan pawh hlim takin an lut leh tawh a, Minister te pawhin an portfolio ngai an chelh a, MP pawh an chuh ho dawn. AGP in an hlauh tawh loh lo insawi hlauh siak hi a ho mai mai viau a ni. A tha lo zawnga kalpui an tum palh a nih pawhin a sawiselna thei ber leh an ngaih pawimawh ber tur chu keimahni BJP MP tho a ni.
7. Chakma Foreigners: North-Eastern Area Reorginisation Act 1971 hmain Chakma in ram an nei ngai lo, mahse khami tum khan kan Mizo Congress hruaitute remtihna ngeia CADC hi pêk a ni. 1971 hma atanga awm nghet Chakma (Pu Nirumpama te ang) hi chu Indian Constitution in a pawm, a ziak luhte an ni a, heng awm nghet ho hian Foreigners Chakma te lo luh hi an duh bik lo va, lo dan zel an tum zawk a ni. Mizoram a cheng zawng zawng inngeih dial dial leh hmasawnna/intodelhna tura hna thawh hi Pu Nirumpama duh dan a ni.
Hêng avang hian kan District/Block/Unit hruaitu leh workers zawng zawngte phur takin kan candidate tan lo campaign rawh u. Parliament hi sakhaw lam aiawh thlanna a ni lo va, ram roreltu tur thlanna a ni. Pu Nirumpama hi MP-ah thlang ila, kan chan a sang tual tual thei dawn a ni. Mizoram mipui zawng zawng te, kan Symbol Lotus (Tuipui Lilipar)-ah vote vek turin kan ngen a che u.
Post a Comment
He post chungchanga i ngaihdan lo sawi ve rawh: